Bamalaika ba cishinka balibika sana amano ku bantu kabili balabombesha ukwafwa abalecita ifyo Yehova afwaya. Ilyo Lesa apangile isonde, bamalaika ‘balyawilile utupundu pamo, kabili abana baume bonse aba kwa Lesa baliweleshe.’ (Yobo 38:4, 7) Ukufuma fye na kale, bamalaika balafwaisha ukumona uko amasesemo yalefikilishiwa pe sonde.—1 Petro 1:11, 12.

Baibolo ilanda ukuti pa nshita shimo bamalaika balecingilila bakapepa ba kwa Lesa aba cine pa kuti bafikilishe ukufwaya kwa kwa Lesa. (Amalumbo 34:7) Ku ca kumwenako:

  • Ilyo Yehova aonawile imisumba yabipa iya Sodomu na Gomora, bamalaika balyafwile Lote no lupwa lwakwe ukufulumuka.—Ukutendeka 19:1, 15-26.

  • Kale mu Babiloni ilyo abalumendo batatu abaHebere babapoosele mwi lungu lya mulilo, Lesa ‘alitumine malaika wakwe no kupususha ababomfi bakwe.’—Daniele 3:19-28.

  • Ilyo Daniele uwali umulungami bamupoosele mu cilindi ca nkalamo, alandile ukuti icalengele apusuke ni co ‘Lesa alitumine malaika wakwe no kucilika utunwa twa nkalamo.’—Daniele 6:16, 22.

Bamalaika balafwilisha abantu ba cishinka ukufuma fye na ku kale

BAMALAIKA BALEYAFWA ABENA KRISTU BA KUBALILAPO

Inshita shimo, bamalaika ba kwa Lesa baleyafwilisha Abena Kristu ba kubalilapo pa kuti bafikilishe ubufwayo bwa kwa Yehova. Ku ca kumwenako:

  • Malaika aliswile ifiibi fya mu cifungo kabili aebele abatumwa ukutwalilila ukushimikila abantu mwi tempele.—Imilimo 5:17-21.

  • Malaika alyebele Filipi kabila wa mbila nsuma ukuya mu musebo wa mu ciswebebe uwafuma ku Yerusalemu ukuya ku Gasa pa kuti ashimikile umwina Etiopia uwaile ku Yerusalemu mu kupepa.—Imilimo 8:26-33.

  • Ilyo Lesa alefwaya abena fyalo batendeke ukuba Abena Kristu, malaika amonekeele kuli Korneli uwali umukalamba wabashilika Abena Roma kabili amwebele ukwita umutumwa Petro ku ng’anda ku mwakwe.—Imilimo 10:3-5.

  • Ilyo umutumwa Petro bamukakile, malaika alimonekeele kuli ena kabili alimufumishe mu cifungo.—Imilimo 12:1-11.

IFYO BAMALAIKA BENGAMWAFWA

Muno nshiku takwaba ifilanga ukuti Lesa alabomfya bamalaika ukwafwa abantu mu cipesha  amano, nga fintu alecita ku bantu abalembwa mu Baibolo. Na lyo line, ilyo Yesu alandile pa fyali no kulacitika muno nshiku atile: “Imbila nsuma iyi iya Bufumu ikabilwa ku bantu bonse aba pe sonde ku kuba ubunte ku nko shonse, e lyo impela ikesa.” (Mateo 24:14) Bushe mwalishiba ukuti ilyo abasambi ba kwa Kristu balebila imbila nsuma, bamalaika e babatungulula?

Bamalaika balatungulula abalebila imbila nsuma mwi sonde lyonse

Ibuuku lya Ukusokolola lyalandile ukuti bamalaika bakalayafwilisha abantu pe sonde ukusambilila pali Yehova Lesa na pa fyo afwaya ukucitila abantu. Umutumwa Yohane alembele ukuti: “Namwene malaika umbi alepupuka mu muulu, kabili aali ne mbila nsuma ya muyayaya iya kubila ku baikala pe sonde, na ku nko shonse na ku mitundu yonse na ku ba ndimi shonse na ku bantu bonse, alesosa ishiwi ilikalamba, ati: ‘Tiineni Lesa no kumupeela umucinshi, pantu inshita ya bupingushi bwakwe naifika, e ico pepeni Uwapangile umuulu ne sonde na bemba no tumfukumfuku twa menshi.’” (Ukusokolola 14:6, 7) Kwaliba ifintu ifingi ifilanga ukuti bamalaika balafwilisha umulimo wa Bufumu mwi sonde lyonse. Na kuba, umuntu uwabembwike nga alapila no kubwelela kuli Yehova, “bamalaika ba kwa Lesa balasekelela.”—Luka 15:10.

Cikaba shani ilyo tukaleka ukushimikila abantu imbila nsuma? “Amabumba ya mu muulu” aya bamalaika, yakaafwa Yesu Kristu Imfumu ya sha Mfumu ukulwa “inkondo ya bushiku bukalamba ubwa kwa Lesa Wa Maka Yonse” iya Armagedone. (Ukusokolola 16:14-16; 19:14-16) Bamalaika ba maka bakabomba umulimo wa konaula abantu ilyo Shikulu Yesu “akaleta icilandushi pa . . . bashinakila imbila nsuma iya kwa Shikulwifwe Yesu.”—2 Abena Tesalonika 1:7, 8.

Mufwile ukulaibukisha ukuti bamalaika balimubikako sana amano. Balibika sana amano ku bantu abafwaya ukubombela Lesa, kabili Yehova alitwalilila ukubabomfya pa kukosha no kucingilila ababomfi bakwe aba cishinka pe sonde.—AbaHebere 1:14.

Kanshi bonse tulingile ukusalapo nampo nga ku kutika ku mbila nsuma nelyo iyo. Bushe twakulakutika ku mbila nsuma iilebilwa mwi sonde lyonse? Inte sha kwa Yehova ku ncende mwikala kuti batemwa ukumwafwa ukwishiba ifyo mwinganonkelamo mu fyo bamalaika ba cishinka batwafwa.