Tinikeni pa kuti muye ku filimo

Tinikeni pa kuti mumone fimbi ifilimo

Tinikeni pa kuti mumone imitwe iilimo

Inte sha kwa Yehova

Cibemba

Ulupungu lwa kwa Kalinda  |  No. 5 2017

 ICIPANDE ICIKALAMBA | BAMALAIKA—BUSHE E KO BABA? CINSHI TUFWILE UKWISHIBILA ICISHINKA?

Bushe Bamalaika Kuti Batwafwa Nelyo Ukucita Ifyabipa Kuli Ifwe?

Bushe Bamalaika Kuti Batwafwa Nelyo Ukucita Ifyabipa Kuli Ifwe?

Bushiku bumo pa Mulungu akasuba, ba Kenneth na ba Filomena abekala ku Curaçao, baile mu kumona abalume na bakashi abo balesambilisha Baibolo.

Ba Kenneth batile: “Ilyo twafikile pa ng’anda, twasangile iciibi nacikomwa e lyo na motoka tapali. Nomba nshaishibe icalengele ukuti ntumine abakashi foni.”

Abakashi balyaswike foni kabili balandile ukuti abena mwabo baali ku ncito. Nomba ilyo baishibe ukuti ba Kenneth na ba Filomena baali pa nse, baliswile iciibi no kubengisha mu ng’anda.

Ilyo baiswile iciibi, balimwene ukuti balya abanakashi bacilalila. Ilyo ba Kenneth balepepa pa kuti batendeke ukusambilila, balya banakashi batampile ukulila na kabili. E ico ba Kenneth na ba Filomena balibepwishe icalengele balelila.

Balondolwele ukuti balefwaya ukuyipaya pali ilya iine inshita, kabili ilyo ba Kenneth babatumiine foni, ninshi balelembela abena mwabo kalata pa kuti bayipaye nga bapwisha. Balandile ukuti balilwele amasakamika, e ico balibakoseleshe ukubomfya Baibolo. Ifyo babakoseleshe fyalengele bakaana ukuyipaya.

Ba Kenneth batile: “Tulatasha Yehova pa fyo atubomfeshe ukwafwa balya banakashi abali no bulanda. Nalimo abomfeshe malaika nelyo umupashi wa mushilo ukututungulula ukuti tutume foni!” *

Bushe filya ba Kenneth na ba Filomena balemona ukutila Lesa alibatungulwile ukubomfya malaika nelyo umupashi wa mushilo pa kuti bapusushe balya banakashi, fyali fya cine? Nelyo cali fye nkuma pa kuti ba Kenneth batumine balya banakashi foni?

Tatwaishiba bwino icalengele. Nomba twalishiba ukutila Lesa alabomfya bamalaika pa kwafwa abantu mu fya kwa Lesa. Ku ca kumwenako, Baibolo ilanda ukuti Lesa alibomfeshe malaika ukutungulula Filipi Umwina Kristu kabili kabila wa mbila nsuma ukwafwa cilolo umwina Etiopia uwalefwaisha ukwishiba ifya kwa Lesa.—Imilimo 8:26-31.

Aba mu mipepele yalekanalekana balanda ukuti kwaliba ifibumbwa fya mupashi ifibomba imilimo ya kwa Lesa e lyo no kucingilila abantu. Abantu abengi tabasumina fye ukutila bamalaika e ko baba, lelo balisumina no kuti balabafwa nelyo ukucita ifyabipa kuli bena. Na lyo line, abantu bambi basumina ukuti takwaba bamalaika.

Bushe bamalaika e ko baba? Nga e ko baba, ni kwi bafumine? Bushe baba shani? Bushe kuti bacita ifisuma nelyo ifyabipa kuli imwe? Natusange amasuko kuli aya mepusho.

^ para. 8 Baibolo itila ishina lya kwa Lesa ni Yehova.—Amalumbo 83:18.