Mulandu nshi impapulo sha Nte sha kwa Yehova shilangila umutumwa Paulo ne pala nelyo no mushishi uunono?

Ukulanda fye icishinka, muno nshiku takwaba umuntu nangu umo uwaishiba ifyo Paulo alemoneka. Ifikope ifyo balenga ifiba mu mpapulo shesu bafyelenganya fye, takwaba ifyo bashula ifilanga ifyo Paulo alemoneka.

Na lyo line, kwaliba fimo ifilanga ifyo Paulo alemoneka. Ku ca kumwenako, Zion’s Watch Tower iya March 1, 1902, yalilandile pa cintu cimo, yatile: “Nga kulanda pa fyo Paulo alemoneka: . . . Mu citabo citila Acts of Paul and Thecla,’ . . . ico balembele mu myaka ya ba 150 ninshi Yesu aliya kale ku muulu, calondolola ifyo Paulo nalimo alemoneka kabili ifyo na bantu basumine. Camulondolola ukuti ‘ali umwipi, ali ne pala, ali na mangobe, ali uwalunduka, inkopyo shalikumene; kabili ali no mona uutali.’”

Dikishonari imo yalandile pa fyaba muli ici citabo aiti: “Amalyashi ya kale yamo ayaba mu citabo ca The Acts of Paul and Thecla ya cine.” (The Oxford Dictionary of the Christian Church 1997 edition) Icitabo ca The Acts of Paul and Thecla balicicindike sana imyaka iingi ukutula apo calembeelwe, pantu na kuba amamanyuskripti aya ciGriki 80 aya ici citabo e po yacili, ukubikako fye na ya mu ndimi shimbi. Kanshi ifikope fyesu filanga fye ifyo amalyashi yamo aya kale yalanda pa fyo umutumwa alemoneka.

Kwena ico mufwile ukulaibukisha ca kuti kwaliba ifintu ifyacindama sana ukucila na pa fyo Paulo alemoneka. Na lintu Paulo alebila imbila nsuma, abantu bamo abalemusuusha balelanda abati “umwine nga e po ali, tamoneka bwino ne milandile yakwe yaba fye iya fye.” (2 Kor. 10:10) Lelo tatulingile ukulaba ukuti aishileba Umwina Kristu ilyo Yesu alandile nankwe mu cipesha mano. Na kabili tufwile ukutontonkanya pa fyo Paulo acitile apo ali ‘cipe ico Kristu asalile ku kutwala ishina lyakwe ku bena fyalo.’ (Imil. 9:3-5, 15; 22:6-8) Tontonkanyeni na pa fintu ifingi ifyo tunonkelamo mu mabuuku ayo Yehova alengele Paulo alembe.

Paulo taleitakisha pa fyo acitile ilyo ashilaba Umwina Kristu, kabili talelanda pa fyo alemoneka. (Imil. 26:4, 5; Fil. 3:4-6) Paulo alandile ati: “Nine nacepesha pa batumwa, kabili nshalinga ukwitwa umutumwa.” (1 Kor. 15:9) Pa numa alembele ati: “Ine, ne muntu uwacepesha pa ba mushilo bonse, napeelwe ici cikuuku ca kwa Lesa, ku kuyabila ku bena fyalo imbila nsuma pa bukankaala bushingapimwa ubwa kwa Kristu.” (Efes. 3:8) Iyi imbila nsuma yalicindama sana ukucila na pa kufwaya ukwishiba ifyo Paulo alemoneka.