UMULIMO wa kubila imbila nsuma walicindama icine cine. Lelo abantu bamo abo tubilako imbila nsuma tabamona ukuti yalicindama. Nangu ni balya aba kuti balitemwa ifyo Baibolo isambilisha, batontonkanya ukuti ukusambilila Icebo ca kwa Lesa na ifwe takwacindama.

Natulande pali ba Gavin. Ba Gavin balesangwa ku kulongana pa Ng’anda ya Bufumu, lelo tabalefwaya ukulasambilila Baibolo. Ba Gavin balondolwele ukuti baishibe fye ifinono pa fyo Baibolo isambilisha, kabili tabalefwaya umuntu nangu umo ukwishiba ukuti baishiba fye ifinono. Tabalefwaya no kuti umuntu abasembeleke ukuba mu mipepele imo. Bushe mulemona shani, bushe ba Gavin balino kusumina ukusambilila Baibolo? Tontonkanyeni pa fyo umuntu enganonkelamo nga aishiba ifyo Baibolo isambilisha. Yehova aebele abena Israele ati: “Ifyebo fyandi fyalakonkoloka ngo mume, nge mfula iilemiima pa cani.” (Amalango 31:19, 30; 32:2) Natulande pa fyo umume waba e lyo tulinganye umume ku mulimo tubomba uwa kubila imbila nsuma pa kuti tuleishiba bwino ifya kwafwa “abantu balekanalekana.”—1 Timote 2:3, 4.

 BUSHE UMULIMO WA KUBILA IMBILA NSUMA WABA SHANI NGO MUME?

Umume walinakilila. Umume upangwa panono panono nga ca kuti amenshi ayali mu mwela yawa kufimenwa. Bushe ifyo Yehova alelanda ‘fyalekonkoloka shani ngo mume’? Pa kulanda na bantu bakwe alelanda cikuuku cikuuku, alenakilila, kabili alelanda mu nshila iyalelanga ukuti alibabikileko sana amano. Kuti tulepashanya Yehova nga tatulesuusha ifyo bambi basuminamo, lelo tubakoselesha fye ukuti bafwailishe pa kuti bapingulepo abene ifya kucita. Nga tulebika amano ku bantu, nabo bakalafwaya ukukutika ku fyo tulelanda kabili tukabomba bwino umulimo wa kubila imbila nsuma.

Umume taonaula ifimenwa. Imbila nsuma kuti yasansamusha abantu abengi kabili kuti basambilila icine nga tulebashimikila ukubomfya inshila shalekanalekana. Munyinefwe Chris uwabalilepo ukweba ba Gavin ukuti alebasambilisha Baibolo, tabapatikishe iyo. Lelo abomfeshe inshila iyalengele ba Gavin batemwa ukulasambilila Baibolo. Munyinefwe Chris aebele ba Gavin ukuti muli Baibolo mwaliba ilyashi ilyacindama nga nshi, abebele no kuti nga basambilila pali ili lyashi, bakalaumfwikisha ifyo bakalasambilila pa kulongana. Lyena ba Chris balondolwele ukuti ukusesema kwaba mu Baibolo kwalilenga bashininkisha ukuti ifyo Baibolo yalanda fya cine. Ifi balandile fyalengele ukuti balelanshanya na ba Gavin libili libili pa masesemo ne fyo yafikilishiwe. Ba Gavin balitemenwe sana ifyo balelanshanya ica kuti na pa kulekelesha balisumine ukutendeka ukusambilila Baibolo.

Umume walicindama pa kuti ifimenwa fikule. Ilingi line mu nshita ya lusuba imfula tailoka mu Israele pa myeshi iingi. Kanshi nga takuli umume, ifimenwa filoma. Yehova asobele ukuti mu nshita tuleikalamo, abantu bakaba ne cilaka “ca kuumfwa amashiwi ya kwa Yehova.” (Amose 8:11) Asobele no kuti abasubwa bali no kuba “ngo mume ukufuma kuli Yehova” ilyo baleshimikila abantu imbila nsuma ya Bufumu capamo ne “mpaanga shimbi.” (Mika 5:7; Yohane 10:16) Imbila nsuma tubila yaba pa fintu ifyo Yehova abomfya ku kupeela ubumi ku bantu ababa ne cilaka ca kusambilila icine. Bushe twalicindika imbila tubila?

Umume lipaalo ukufuma kuli Yehova. (Amalango 33:13) Umulimo wa kubila imbila nsuma lipaalo nelyo ubupe kubomfwa imbila nsuma. Isambililo lya Baibolo lyali lipaalo kuli ba Gavin pantu lyalibafwile ukusanga amasuko ku mepusho yonse ayo bakwete. Ba Gavin balilundulwike bwangu, kabili balibatishiwe, ino nshita balashimikila abantu imbila nsuma ya Bufumu pamo na bena mwabo ba Joyce.

Inte sha kwa Yehova balebila imbila nsuma ya Bufumu mwi sonde lyonse

MULEMONA UMULIMO WA KUBILA UKUTI WALICINDAMA

Nga tulemona umulimo wa kubila imbila nsuma ukuti waba ngo mume, kuti catwafwa no kwishiba ukuti ifyo cila kasabankanya abomba uyu mulimo fyalicindama. Cinshi twalandila ifi? Itoni limo fye ilya mume te kuti linashe umushili, kano umume nga naufula sana. E fyo caba na ku mbila nsuma iyo tubila, umuntu fye umo te kuti ashimikile ku bantu abengi. Lelo apo tubombela pamo na babomfi ba kwa Yehova abengi nga nshi, calenga ukuti tulebila imbila nsuma “ku nko shonse.” (Mateo 24:14) Bushe imbila nsuma ikaba lipaalo lya kwa Yehova ku bantu tubilako? Ee, ikaba lipaalo nga ca kuti ili ngo mume, e kutila, nga tulelanda cikuuku cikuuku, tulesansamusha abantu, kabili nga ikalenga baba no bumi!