• Tutile mulefwaya ukuleka ukulya ifya kulya ifingalenga mwaina, lelo mwakumbwa ice cream kabili mwalafwaisha ukuilya.

  • Tutile mulefwaya ukuleka ukupeepa fwaka, lelo cibusa wenu uwaishiba ukuti mulefwaya ukuleka ukupeepa, amupeela fwaka.

  • Tutile mulefwaya ukutukushako umubili, nomba camukosela fye no kusenda insapato sha kubutukilamo mwi fungu lya busanshi.

Bushe namumona ifipalene muli ifi twalandapo? Ilingi line, uko tusangwa e lyo na bantu tusangwa nabo kuti fyalenga twaba ne misango yabipa nelyo ukuba ne mibele iisuma.

ILEMBO ILINGAMWAFWA: “Uwasalapuka nga amona ububi alabelama, lelo imbulwa mano shena shiya fye no kukandwa.”Amapinda 22:3.

Baibolo ilatukoselesha ukulatontonkanishisha libela. Nga tulecita ifi, tatwakulasangwa na bantu nelyo ukuba ku cifulo icingalenga twafilwa ukufikilisha ifyo tulefwaya ukubombelepo. (2 Timote 2:22) Mu mashiwi yambi kuti twatila cilaba bwino nga ca kuti tulesala abantu tulesangwa nabo ne fiba ku cifulo tulesangwako.

Mulecita ifingalenga camwangukila ukucita ifisuma no kumukosela ukucita ifibi

IFYO MULINGILE UKUCITA

  • Mulecita ifingalenga camwangukila ukucita ifisuma. Ku ca kumwenako, nga ca kuti mulefwaya ukuleka ukulya ifya kulya ifishawama ku bumi, tamulingile ukulasunga ifyo ifya kulya mu ng’anda. Nga mulecita ifi, cikalamwangukila ukukaanalya ifyo ifya kulya.

  • Mwilacita ifingalenga camwafya ukucita ifisuma. Ku ca kumwenako, nga ca kuti mulefwaya ukulatukusha umubili ulucelo celo, ilyo mushilalala, mulebikila calimo ifya kufwala pa kuya mu kutukusha umubili. Pa kutendeka kuti cilemwafya, lelo nga mwakonkanyapo ukulacita ifi, tacakulamwafya.

  • Mulesala bwino ifibusa. Ilingi line, tutendeka ukucita filya fine ificita abantu abo tusangwa nabo. (1 Abena Korinti 15:33) Kanshi tamufwile ukulasangwa na bantu abengalenga mwalacita ifyo mulefwaya ukuleka, lelo mufwile ukulasangwa na balya abengamukoselesha ukuba ne mibele isuma.