Tinikeni pa kuti muye ku filimo

Tinikeni pa kuti mumone imitwe iilimo

Filya indaka iikatanya injelwa e fyo ne milandile ya mucinshi ingalenga mwalaumfwana mu cupo

 ABAUPANA

3: Umucinshi

3: Umucinshi

UMO UKUBA NO MUCINSHI KWALOLA

Abaupana ababa no mucinshi balatwalilila ukutemwana na lintu bapusana. Icitabo citila Ten Lessons to Transform Your Marriage cilanda ukuti: “Abaupana ababa no mucinshi tabatwalilila fye ukukansana, lelo balalanshanya pa mafya bakwata. Balakutika ku fyo umwina mwabo alelanda mu mucinshi kabili balasuka basuminishanya pa fyo bengacita pa mafya bakwata.”

ILEMBO ILINGAMWAFWA: “Mu kutemwa . . . tamwaba ukucita ifya kuisekesha.”—1 Abena Korinti 13:4, 5.

“Pa kulanga ukuti nalicindika umukashi wandi, nshifwaya ukucita ifingalenga alaumfwa kwati nalimusuula nelyo ifingalenga twafilwa ukulaumfwana bwino.”—E fyalandile ba Micah.

ICO CACINDAMINA UKUBA NO MUCINSHI

Nga ca kuti umulume nelyo umukashi tali no mucinshi, kuti atendeka ukusuusha, ukusaalula nelyo fye ukusuula umwina mwakwe. Abafwailisha pa fintu basanga ukuti ifya musango uyu nga fyalacitika, kuti fyalenga icupo ukupwa.

“Ukulanda amashiwi ya kusuusha, aya musaalula nelyo imipuulwe yabipa pa mwina mobe kuti kwalenga aisuula nelyo aleka ukukucetekela kabili kuti kwalenga mwaleka ukulaumfwana mu cupo.”—E fyalandile ba Brian.

IFYO MWINGACITA

TONTONKANYENI PALI IFI

Pa mulungu umo, esheni ukubika amano ku fyo mulanda na ku fyo mucita. Lyena muyipushe ukuti:

  • ‘Miku inga nasuushishe abena mwandi, kabili miku inga nabatashishepo?’

  • ‘Ni finshi nacitile ifyalangile ukuti nalicindike abena mwandi?’

LANSHANYENI NA BENA MWENU

  • Finshi mwingacita kabili mashiwi nshi mwingalanda ayengalenga abena mwenu baumfwa ukuti mwalibacindika?

  • Finshi mucita kabili mashiwi nshi mulanda ayalenga abena mwenu baumfwa kwati tamwabacindika?

IFINGAMWAFWA

  • Lembeni ifintu fitatu ifyo mwingatemwa abena mwenu balecita pa kulanga ukuti balimucindika. Ebeni abena mwenu ukucita cimo cine. Peeleni abena mwenu ifyo mwacilemba e lyo nabo bamupeele ifyo bacilemba, kabili muleesha ukulakonka ifyo abena mwenu bacilemba.

  • Lembeni imibele ya bena mwenu iyo mwatemwa. Lyena ebeni abena mwenu ico mwatemenwa iyo imibele.

“Ifyo ncita e filanga ukuti nalicindika abena mwandi kabili ndafwaya ukuti baleba ne nsansa. Utuntu utunono uto ncita e lyo ne fyo nanda e filanga maka maka ukuti nalicindika abena mwandi.”—E fyalandile ba Megan.

Kanshi te imwe mulingile ukumona nga ca kuti mwaliba no mucinshi nelyo iyo, lelo ifyo abena mwenu bomfwa e filingile ukulanga ukuti muli ba mucinshi kuli bena nelyo iyo.

ILEMBO ILINGAMWAFWA: “Fwaleni umutima wa nkumbu, icikuuku, ubupete, ukufuuka, no kushishimisha.”—Abena Kolose 3:12.