Tinikeni pa kuti muye ku filimo

Tinikeni pa kuti mumone imitwe iilimo

Abaupana balingile ukulabombela pamo nga filya uwensha indeke na kafwa wakwe babombela pamo

 ABAUPANA

2: Ukubombela Pamo

2: Ukubombela Pamo

UMO UKUBOMBELA PAMO KWALOLA

Nga ca kuti umulume no mukashi balebombela pamo, kuti baleafwana nga filya kensha wa ndeke na kafwa wakwe bafwana. Nangu bakwata amafya, bonse babili batontonkanya pa fyo bengayapwisha.

ILEMBO ILINGAMWAFWA: “Tabali babili na kabili iyo, lelo bali umubili umo.”—Mateo 19:6.

“Umulume no mukashi balingile ukubombela pamo pa kuti baleikala bwino mu cupo.”—E fyalandile ba Christopher.

ICO CACINDAMINA UKUBOMBELA PAMO

Nga ca kuti umulume no mukashi tababombela pamo e lyo bakwata ubwafya, balaipeela imilandu mu nshita ya kuti bapwishe ubwafya. Ici cilalenga amafya ayanono yakula sana.

“Abaupana bafwile fye ukulabombela pamo. Nga ca kuti ine na balume bandi tatubombela pamo, nga twaba fye kwati tatwaupana, kabili nga twaba kwati bantu abekala fye ing’anda imo, lelo abashumfwana.”—E fyalandile ba Alexandra.

IFYO MWINGACITA

TONTONKANYENI PALI IFI

  • Bushe indalama nkwata nshimona ukuti “shandi fye neka”?

  • Bushe imona ukuti te kuti ntuushe bwino bwino nga ca kuti ndi no mwina mwandi?

  • Bushe nshumfwana sana na balupwa ba mwina mwandi nangu ca kuti umwina mwandi ena alomfwana nabo?

LANSHANYENI NA BENA MWENU

  • Ni muli finshi umo tubombela bwino pamo na bena mwandi?

  • Ni muli finshi tulingile ukuwamyako?

  • Finshi tulingile ukucita pa kuti tulebombela pamo?

IFINGAMWAFWA

  • Elenganyeni ifyo cingaba nga muleteya icangalo umo mulecimfyanya na bena mwenu. Finshi mwingacita pa kuti mutendeke ukuteyela pamo na bena mwenu?

  • Mu nshita ya kulatontonkanya ukutila, ‘Kuti nacita shani pa kuti ncimfye?’ muletontonkanya ukutila ‘Kuti twacita shani pa kuti tucimfye?’

“Mwilabika amano ku kwishiba uupangile icilubo. Icacindama sana mu cupo cenu kupanga umutende e lyo no kulaumfwana.”—E fyalandile ba Ethan.

ILEMBO ILINGAMWAFWA: “Tamubika fye amano ku fyo mulefwaya fye mwe bene, lelo mulabika amano na ku fyo bambi bafwaya.”—Abena Filipi 2:3, 4.