Tinikeni pa kuti muye ku filimo

Tinikeni pa kuti mumone imitwe iilimo

Finshi Fikafumapo Ubufumu bwa kwa Lesa nga Bwaisa?

Finshi Fikafumapo Ubufumu bwa kwa Lesa nga Bwaisa?

“Ici cine calo cileya pamo no lunkumbwa lwa ciko, lelo uucita ukufwaya kwa kwa Lesa akekalilila umuyayaya.”—1 YOH. 2:17.

INYIMBO: 134, 24

1, 2. (a) Bushe cino calo cabipa capalana shani ne cipondo ico baletwala mu kwipaya? (Moneni icikope pa muulu.) (b) Bushe ifibumbwa fya ku muulu ne fya pano calo fikomfwa shani ilyo cino calo cabipa cikonaulwa?

ELENGANYENI ukuti icipondo icabipisha nabacipingwila ukufwa, kabili abalonda abafungwa balecitwala ku kwipaiwa. Nangu ca kuti ici cipondo cilemoneka fye bwino kabili cili no bumi ubusuma, cileya mu kufwa.

2 Cino calo naco caba ngo mwaume uo bapingwila ukufwa. Calipingulwa kale kabili nomba line calaonaulwa. Baibolo itila: “Icalo cileya.” (1 Yoh. 2:17) Nangu cikabe shani, cino calo cikonaulwa. Na lyo line pali ubupusano ubukalamba pa mufungwa bapingwila ukufwa na pa konaulwa kwa cino calo. Umufungwa nga bamupingwila ukufwa, bamo kuti bakaana ubupingushi, kuti batwishika nga ca kuti ubupingushi bwali fye bwino nelyo kuti balasubila ukuti nalimo tabakamwipaye bwangu bakashingashingako. Lelo cino calo cena uwapingula ukuti cikonaulwa ni kapingula uwa mulinganya Mulopwe wa bubumbo bonse. (Amala. 32:4) Ubupingushi bwa konaula cino calo tabwakaaluke, tabwakashingashinge, kabili tapali  nangu umo uukatwishika ubupingushi bwa kwa Lesa. Cino calo nga caonaulwa, ifibumbwa fyonse ifya ku muulu na pano isonde fikasumina ukuti ubupingushi bwa kwa Yehova bwa mulinganya. Ifibumbwa fyonse fikaba no mutende nga nshi!

3. Fintu nshi fine ifyo twalasambililapo ifikaya ilyo Ubufumu bwa kwa Lesa bukesa?

3 Finshi fyaba mu “calo icileya”? Ifintu ifingi ifyo abantu bamona ukuti fikatwalilila fye ukubako, fikaya. Bushe ili, lyashi ilibi? Awe nakalya! Na kuba ili lyashi lyaba pa “mbila nsuma . . . iya bufumu” iyo tubila. (Mat. 24:14) Kanshi natulande pa fikaya ilyo Ubufumu bwa kwa Lesa bukesa. Twalalanda pa fintu fine: abantu ababipa, ifyo utubungwe tucita, imibele yabipa e lyo ne fyabipa ifilecitika. Ilyo twakulalanda pali cimo na cimo pali ifi fine, twalasambilila (1) ifyo fitukuma, (2) ifyo Yehova akacitapo na (3) ifyo akafifumyapo no kuletapo ifintu ifisuma sana.

ABANTU ABABIPA

4. Bushe ifyo abantu ababipa bacita fitukuma shani?

4 Bushe ifyo abantu ababipa bacita fitukuma shani? Pa numa ya kusobela ukuti mu nshiku sha kulekelesha “mukesaba inshita ishayafya nga nshi,” Lesa alengele umutumwa Paulo ukulemba ati: “Ababifi kabili incenjeshi bakaya balebipilako fye.” (2 Tim. 3:1-5, 13) Bushe mulemona ifyo ubu busesemo bulefikilishiwa? Fwe bengi balitucushapo ku bantu ababipa pamo nga abantu abacusha abanabo, ababa no lupato, nelyo ifipondo. Abantu bamo balacita ifyabipa pa lwalala e lyo bambi ni ncenjeshi, bamoneka kwati balacita ifisuma lelo ni mbifi. Nangu ca kuti tabatucushapo, ifyabipa ifyo abantu bacita filatukuma. Tulomfwa ububi sana nga twaumfwa ifyabipa ifyo bacita. Ifyo abantu ababipa bacusha abana, abakalamba na bashakwata aba kubafwa filalenga twaba sana no mwenso. Abantu ababipa baba ne mibele ya bunama nelyo iya buciwa. (Yako. 3:15) Lelo Amashiwi ya kwa Yehova yalatupeela isubilo.

5. (a) Lishuko nshi onse uucita ifyabipa akwata pali ino nshita? (b) Finshi fikacitikila abacita ifyabipa abashifwaya ukwaluka?

5 Finshi Yehova akacitapo? Yehova alipeela ababifi inshita ya kwaluka. (Esa. 55:7) Pali ino nshita umuntu umo na umo uucita ifyabipa talapingulwa. Lelo cino calo cena calipingulwa. Nomba cikaba shani nga ca kuti umuntu akaana ukwaluka kabili atwalilila fye ukutungilila cino calo mpaka na lintu ubucushi bukalamba bukatendeka? Yehova alaya ukuti akafumyapo ababifi pa calo umuyayaya. (Belengeni Amalumbo 37:10.) Ababifi kuti bamona kwati tabakonaulwe. Abengi balishiba ifya kufisa ifyabipa ifyo bacita, kabili ilingi line bamoneka kwati te kuti babasange no mulandu pa fyabipa ifyo bacita. (Yobo 21:7, 9) Lelo Baibolo itweba ati: “Amenso ya kwa [Lesa] yali pa mibele ya muntu. Kabili alamona intampulo shakwe shonse. Takuli imfifi nangu ukufiita fititi umo abacita ifyabipa bengabelama.” (Yobo 34:21, 22) Ta kuli uko ababifi bengaya pa kuti babelame kuli Yehova Lesa. Takwaba incenjeshi iingabepa Yehova pantu alamona fyonse ifyo ababifi bacita, alamona na mu mfifi iyafiitisha. Pa numa ya Armagedone tukalolesha apaali ababifi lelo tatwakabamone. Bakafumishiwapo umuyayaya!—Amalu. 37:12-15.

6. Ni bani bakashala ilyo ababifi bakafumishiwapo, kabili mulandu nshi iyi ibelele ni mbila nsuma?

 6 Ni bani bakashala ilyo ababifi bakafumishiwapo? Yehova atulaya ati: “Abafuuka e bakekala mu calo, kabili bakasekelela nga nshi pantu umutende ukafula.” Kabili atulaya no kuti: “Abalungama e bakekala mu calo, kabili bakekalamo umuyayaya.” (Amalu. 37:11, 29) Bushe “abafuuka” na “abalungama” ni bani? Abafuuka bantu abaicefya abasumina ukusambilishiwa na Yehova kabili abanakila ubutungulushi bwakwe, e lyo abalungama bantu abatemwa ukucita ifyo Yehova Lesa amona ukuti fyalilungama. Muno nshiku, abalungama banono sana nga kubalinganya ku babifi. Lelo mu calo cipya abafuuka na balungama ebakabamo fye beka beka. Ukwabula no kutwishika aba bantu bakalenga isonde likabe paradaise!

IFYO UTUBUNGWE TUCITA

7. Bushe ifyo utubungwe tucita fitukuma shani?

7 Bushe ifyo utubungwe tucita fitukuma shani? Ifyabipa ifingi ificitika mu calo te bantu bacita lelo tubungwe. Ku ca kumwenako, utubungwe twamapepo tulabepa abantu pa fyo Lesa aba, pali Baibolo, pa fikacitika ku calo na ku bantu, e lyo na pa fintu fimbi ifingi. Amabuteko yalatungilila inkondo no bunkalwe pa mishobo iyalekanalekana, e lyo yalatitikisha abapiina na bashakwata wa kubacingilila kabili yalitemwa amafisakanwa na kapatulula. Utubungwe utwatemwa indalama tulakowesha icalo, kabili tulonaula ifyabumbwa. Tulaliila abantu amasuku pa mutwe no kulenga abantu abanono ukunonka icuma e lyo abantu abengi nga nshi bashala ne nsala. Ukwabula no kutwishika utubungwe tulalenga abantu balecula sana.

8. Ukulingana na Baibolo, finshi fikacitikila utubungwe uto abantu bamona ukuti te kuti tonaulwe?

8 Finshi Yehova akacitapo? Ubucushi bukalamba bukatendeka ilyo utubungwe twa mapolitiki tukemina utubungwe twa mipepele ya bufi utwimininwako na cilende uwitwa ati Babiloni Mukalamba. (Ukus. 17:1, 2, 16; 18:1-4) Utu utubungwe twa mipepele tukonaulwa umupwilapo. Cikaba shani ku tubungwe tumbi? Baibolo ipashanya utubungwe ku mpili ne fishi ifyo abantu bamona ukuti fyalikosa. (Belengeni Ukusokolola 6:14.) Icebo ca kwa Lesa casobele ukuti amabuteko no tubungwe tonse fikonaulwa. Ilyo ubucushi bukalamba bukafika ku mpela, amabuteko yonse yakonaulwa pamo na bonse abayatungilila abashitungilila Ubufumu bwa kwa Lesa. (Yer. 25:31-33) Ifi nga fyapita, takwakabe utubungwe utukalacita ifyabipa!

9. Mulandu nshi twingacetekelela ukuti isonde ilipya likateyanishiwa bwino?

9 Finshi fikapyana pa tubungwe? Bushe pa numa ya Armagedone kukaba akabungwe akali konse pano isonde? Baibolo itila: “Tulelolela imyulu ipya ne sonde lipya ifyo Lesa alaya, umukaba ubulungami.” (2 Pet. 3:13) Imyulu ya kale ne sonde lya kale e kutila amabuteko na bantu aba pano calo abatungululwa na aya mabuteko fikafumishiwapo. Finshi fikesapo? Amashiwi ya kuti “imyulu ipya ne sonde lipya” yalola mu kuti kukaba ubuteko ubupya e lyo na bantu abasuma abakaba pano isonde abo ubu buteko bukalateka. Mu Bufumu  ubo Yesu Kristu abapo imfumu tamwakabe icimfulunganya pantu Yehova Lesa te wacimfulunganya. (1 Kor. 14:33) Kanshi abakapanga “isonde lipya” bakateyanishiwa bwino. Kukaba abaume abakalaangalila ifintu. (Amalu. 45:16) Bakalatungululwa na Kristu e lyo na ba 144,000 abo akalateka nabo. Elenganyeni ifyo mwi sonde mukaba ilyo mushakabe utubungwe utucita ifyabipa!

IMIBELE YABIPA

10. Mibele nshi iyabipa iyo abantu bakwata ku ncende uko mwikala, kabili imukuma shani no lupwa lwenu?

10 Bushe imibele yabipa itukuma shani muno nshiku? Twikala mwi sonde umo abantu bacita ifyabipa ifingi. Mu calo mwalifula ubupulumushi, ubunkalwe e lyo abantu tababa na cishinka. Abafyashi balabombesha pa kucingilila abana babo ku fyabipa. Ifya kuleseshamo icitendwe ifyo bapanga, filelenga ifyabipa filemoneka kwati fisuma sana kabili filelenga abantu balesuula amafunde ya kwa Yehova. (Esa. 5:20) Abena Kristu balingile ukubombesha pa kuti tabalekonkelela ifi ifintu fyabipa. Balingile ukulaesha na maka ukuba aba kaele mu calo umwaba abantu abashicindika amafunde ya kwa Yehova.

11. Finshi tulesambilila kuli filya Yehova aonawile Sodomu na Gomora?

11 Finshi Yehova akacitapo pa mibele yabipa? Natulande pa fyo acitile pa mibele yabipa iyali mu musumba wa Sodomu na uwa Gomora. (Belengeni 2 Petro 2:6-8.) Lote no lupwa lwakwe baleumfwa sana ububi pa mibele yabipa iyo abantu baleikala nabo bakwete. Ilyo Yehova aonawile iyi misumba, alyonawile na bali ne mibele yabipa, kabili ici cali “cilangililo ca fyo akacita ku bantu abashipepa.” Filya fine Yehova aonawile abali ne mibele yabipa pali ilya nshita, e fyo akacita na muno nshiku mwine ilyo akonaula cino calo cabipa.

12. Milimo nshi mufwaisha ukwisabombako ilyo bakafumyapo cino calo cabipa?

12 Finshi fikapyana pa mibele yabipa? Abantu abakaba mu Paradaise bakalabomba imilimo iikalalenga bakaleba ne nsansa. Tontonkanyeni pa mulimo wa kulenga isonde ukuba paradaise nelyo uwa kukuula amayanda yesu na ya banensu. Tontonkanyeni ne fyo tukalaba ne nsansa ilyo tukalasengela amamilioni ya bantu abafwa no kubasambilisha pa mibele ya kwa Yehova na pa fyo alecitila abantu. (Esa. 65:21, 22; Imil. 24:15) Tukalabomba imilimo iikalenga tukaleba ne nsansa kabili iikalalenga Yehova akalelumbanishiwa!

IFYABIPA IFILECITIKA

13. Bushe bucipondoka bwa kwa Satana, Adamu, na Efa bwalenga mu calo mwaba finshi?

13 Bushe ifyabipa ifilecitika fitukuma shani muno nshiku? Abantu ababipa, utubungwe utucita ifyabipa, ne mibele yabipa filelenga ifintu mu calo ukulabipilako. Ni bani pali ifwe abengalanda ukuti inkondo, ubupiina no lupato lwa mushobo tafibakuma? Ni bani bengatila ukulwala ne mfwa tafibakuma? Ifi ifyabipa ifilecitika filatukuma fye bonse. Icalenga ifyabipa filecitika ni co Satana, Adamu na Efa balipondokele Yehova. Takuli nangu umo uwingafisama ifyabipa ifyo bucipondoka bwabo bwaleta.

14. Finshi Yehova akacita pa fyabipa ifilecitika mu calo? Langilileni.

14 Finshi Yehova akacitapo pa fyabipa ifilecitika?  Yehova alilaya ukuti akafumyapo inkondo umuyayaya. (Belengeni Amalumbo 46:8, 9.) Alilaya no kuti akafumyapo ukulwala. (Esa. 33:24) Yehova akamina ne mfwa umuyayaya! (Esa. 25:8) Akafumyapo no bupiina. (Amalu. 72:12-16) Yehova akafumyapo ne fyabipa fimbi ifilenga abantu balecula. Akafumyapo no “mupashi” wa ici calo, pantu akafumyapo Satana ne fibanda fyakwe.—Efes. 2:2.

Elenganyeni ifyo icalo cikaba ilyo kushakabe inkondo, amalwele, nelyo imfwa! (Moneni paragrafu 15)

15. Fintu nshi fimo ifikafumishiwapo umuyayaya pa numa ya Armagedone?

15 Bushe kuti mwaelenganya ifyo cikaba ilyo inkondo, ukulwala ne mfwa fikafumishiwapo? Takwakabe abashilika! Takwakabe ifyanso fya nkondo ne fyo bapanga ifya kwibukishishako abafwile mu nkondo. Takwakabe ifipatala, bashing’anga, banasi, nelyo inshuwalansi ya bumi; takwakabe saini umwakusungila ifitumbi, amayanda ya malilo, nelyo inshishi! Apo takwakabe bumpulamafunde, bamalonda, amaalamu, bakapokola, nalimo na maloko na maki tafyakabeko. Elenganyeni ifyo cikaba ilyo ifi fyonse ifilenga tulesakamana fikafumishiwapo.

16, 17. (a) Fisuma nshi abakapusuka Armagedone bakaipakisha? Langilileni. (b) Finshi tulingile ukulacita pa kuti tukekalilile umuyayaya ilyo cino calo cabipa cikonaulwa?

16 Bushe ubumi bukaba shani ilyo ifyabipa ifilecitika fikafumishiwapo? Nalimo kuti twafilwa ukwelenganya ifyo bukaba pantu pa myaka iingi twaikala mu calo umucitika ifyabipa ica kuti twalileka no kumona ifyo ifyabipa fitukuma. E fyo caba na ku bantu abekala mupepi ne citesheni ce shitima, balaleka ukumfwa icongo ce shitima, kabili na abekala mupepi na uko bapoosa ifisoso nalimo balaleka ukumfwa icena ca fisoso. Nomba elenganyeni ifyo bengomfwa nga bafumyapo ifyo fintu!

17 Finshi fikabapo nga bafumyapo ifilenga tulesakamana? Amalumbo 37:11 yatila: “Abafuuka e bakekala mu calo, kabili bakasekelela nga nshi pantu umutende ukafula.” Bushe tamumfwa bwino nga mwabelenga aya amashiwi? Ifi e fyo Yehova afwaya mukaleikala. E ico mulebombesha pa kuti mulepalama sana kuli Yehova Lesa na ku cilonganino cakwe muli shino nshiku shakulekelesha! Muletasha pe subilo mwakwata, muletontonkanyapo, mulemona ukuti ifi fikacitika kabili muleebako na bantu bambi! (1 Tim. 4:15, 16; 1 Pet. 3:15) Nga mulecita ifi, tamwakayile pamo ne ici icalo cabipa. Lelo mukekalilila umuyayaya kabili mukaba ne nsansa umuyayaya!