PA FINTU ifilenga umuntu aaba no bumi paliba ne fyo umubili undapa ifilonda e lyo no kupanga insandesande nga pali ishonaike. Lilya line fye umuntu aicena, umubili ulatendeka ukuyundapa.

Tontonkanyeni pali ici: Kwaliba ifintu ifingi ificitika pa kuti umubili uyundape:

  • Insandesande shimo shilaya apali icilonda pa kuti umulopa uuminine na pa kuti shicilike imishipa iitwala umulopa ukuli icilonda.

  • Pa cilonda palafimba pa kuti pelaingila utushiishi na pa kuti insandesande ishaconaika shifume mu mubili.

  • Mu nshiku fye ishinono, umubili ulatendeka ukupanga insandesande ishipya, icilonda cilatendeka ukupola kabili umubili ulatendeka ukundapa imishipa iyaonaike.

  • Lyena umubili ulatendeka ukupanga icibala pa kuti apali icilonda pakose.

Ilyo abapanga ifintu basambilile ifyo umubili uyundapa, balitendeke ukupanga amapulastiki ayaiwamya nga yatulika. Muli aya amapulastiki, mulaba ifintu fimo “ifisuuma” nga ca kuti iyo pulastiki yatulika. Nga fyasaakana, filatendeka ukucilika apacitulika. Lyena nga fyakosa, filalenga apacitulika pakosa, paba fye nga filya pulastiki yonse ili. Umuntu umo uwasambilila sana alandile ati pa kupanga iyi pulastiki tulepashanya fye ifintu ifyabako.

Muletipo shani? Bushe ifi umubili uyundapa nga wakwata icilonda, kuti twatila wasangwike fye nelyo kwali uwaupangile?