Ilyo Song Hee aali ne myaka 11, banyina balimwene ukuti umungololo wakwe walemoneka uwaongama. Badokota bamusangile no bulwele bwa Scoliosis, ubulwele ubulenga umungololo ukongama. Ubulwele ubo Song Hee alwele bwalibipishe ica kuti balingile ukumulepula (opareshoni). Na lyo line, Song Hee alikeene ukumubikamo umulopa pa kumulepula. Abalemba “Loleni!” balimwipwishe pa fyo cali.

Bushe badokota balikwafwile ilyo bakusangile no bu ubulwele?

Nangu ca kuti badokota baleisa mu kumona ifyo ndi pa myaka itatu, umungololo waleya uleongaminako fye ica kuti watendeke no kutitikisha ku mutima na kuli bapwapwa, kabii ici calelenga ndefilwa ukupeema bwino. Kanshi badokota balingile fye ukundepula.

Bushe walisumiine ukuti bakulepule?

Ee nalisumiine. Na lyo line, badokota banjebele ukuti nali no kukwata ubwafya nga bandepula, pantu umungololo walyongeme sana. Ilyo banjebele ukuti bali no kundepula, nalikwete ubwafya na bumbi pantu ifyo nasambilila mu Baibolo fyalengele nkane ukumbikamo umulopa. *

Bushe kwali dokota uwasumiine ukukulepula ukwabula ukukubikamo umulopa?

Twaile na bamayo mu kumona badokota kuno kwine twikala ku Florida, mu America. Ilyo naebele badokota ukuti tabalingile ukumbikamo umulopa, banjebele ukuti apo ubu ubulwele bwalibipishe, takuli dokota uwingandepula ukwabula ukumbikamo umulopa. Ne cabipishe ca kuti banjebele ukutila nshakafishe imyaka 20 nga ca kuti tabandepwile. Pali iyi inshita, nali fye ne myaka 14.

Bushe walyebele badokota icalengele ukuti ukaane ukukubikamo umulopa?

Ee nalibebele. Naebele badokota ukuti ifyo nasambilila mu Baibolo e fyalenga nkaane ukumbikamo umulopa. Nabebele ukuti Lesa alanda ukuti umulopa wa muntu nelyo uwa nama walishila.2 Umwina Israele nga alya umulopa, ninshi acita ulubembu ulwa kufwilapo.3 Nalibelengeele badokota ne lembo lya Imilimo ya Batumwa 15:19, 20. Ili ilembo lyeba Abena Kristu ukuti balingile: “Ukutaluka . . . ku mulopa.” Ici calola mu kuti umuntu talingile ukulya nelyo ukubikwamo umulopa.

Bushe badokota balisumiine ilyo wabebele?

Bakoselepo fye ukuti bafwile ukumbikamo umulopa. Cimbi icampapwishe ca kuti aba mu cipatala banjebele ukuti nga nasumina ukumbikamo umulopa, tabaali no kundipilisha pa kundepula.

 Balefwaya sana ukumwafwa! Nomba bushe mwalisumiine?

Nangu ca kuti takwali badokota abasumiine ukundepula ukwabula ukumbikamo umulopa, ine na bamayo twalikeene ukuti bembikamo umulopa. Ici calengele ifintu fibipileko. Apo nali umwaice ukulingana ne funde, kabili ubulwele bwandi bwalebipilako fye, badokota batwele umulandu ku cilye. Na lyo line, twalitemenwe pantu baloya ba ku cilye ca mu Florida batwebele ukuti tukafwaye dokota mu nshiku 30, uwingangundapa ukulingana ne fyo nalefwaya.

Bushe mwalimusangile?

Ee twalimusangile. Ba Nte ababa mu Komiti ya Kumfwaninamo ne Fipatala aba mu Florida, balifwaile dokota uwaishiba ubulwele nalwele, uwa ku New York, kabili uyu dokota alisumiine ukwisa mu kungundapa ukwabula ukumbikamo umulopa. Kanshi twalicitile ifyo aba ku cilye batwebele muli ilya ine inshita batwebele.4

Bushe balikulepwile ukwabula ubwafya ubuli bonse?

Ee, balindepwile ukwabula ubwafya! Pa kuti bolole umungololo, ba Dr. Robert M. Bernstein, bambikile utuntu tumo mu mungololo. Balindepwile pa muku wa kubalilapo kabili ilyo papitile imilungu ibili balindepwile na kabili.

Cinshi bakulepwilile imiku ibili?

Badokota batile nga ca kuti pa kundepula pa muku wa kubalilapo umulopa wafuma uwingi, ninshi nga papita inshita, umubili kuti wapanga umulopa na umbi ilyo bashilandepula umuku walenga bubili. Badokota balibombeshe sana pantu pa miku ibili iyo bandepwile, umulopa uunono fye e wafumine. Nalipolele bwangu kabili nshakwete amafya yalya abo babikamo umulopa bakwata.5

Bushe badokota baumfwile shani ilyo bakundepe?

Badokota bafwile ukulakonka ifyo umulwele alefwaya

Balitemenwe sana. Balandile ukuti: “Ukusakamana abalwele, te kwishiba fye bwino ifya kubalepula.” Balandile no kuti badokota bafwile no kulakonka ifyo abalwele balefwaya ukubondapa e lyo ne fyo abalwele basuminamo. Inte sha kwa Yehova e lyo na bantu fye bambi abengi balatemwa sana nga ca kuti ifi e fyo badokota balecita.

^ par. 7 Banyina ba kwa Song Hee ni ba Nte. Song Hee nao ni Nte kabili abatishiwe mu 2012 ninshi ali ne myaka 16.

Ukutendeka 9:3-5.

Ubwina Lebi 17:10-14.

Ababa mu Makomiti ya Kumfwaninamo ne Fipatala balaafwa ba Nte abalwele pa kubafwaila badokota abengabondapa bwino ukwabula ukubabikamo umulopa.

Icipande icilanda pa bubi bwaba mu kubikwamo umulopa icalembele akabungwe ka Clinical Excellence Commission, New South Wales (Australia) Health, citila: “Ukubikwamo umulopa cimo no kubuula icilundwa ca muntu no kucibika mu muntu umbi. Nga babuula icilundwa ca muntu no kucibika mu muntu umbi, umubili babikamo tauba bwino. Kanshi umuntu afwile ukutontonkanyapo sana ilyo bashilamubikamo umulopa.”