“Icilubula umweo wa muntu fyuma fyakwe, lelo umupiina tomfwa ukukalipilwa.”—AMAPINDA 13:8.

NANGU ca kuti ukuba ne cuma limo kusuma lelo kulaleta na mafya, maka maka muli shino nshiku tuleikala ishayafya. (2 Timote 3:1-5) Mu fyalo fimo, ababa ne fyuma, ukubikako fye na batandashi abamoneka aba cuma balabebila sana kabili balabekata no kubafisa pa kuti abakabalubula bakalipile indalama.

Lipoti imo yalandile pa calo cimo icipiina ukuti: “Abapuupu abenda ne fyanso, abantu abebila bambi mu bucenjeshi e lyo na beketa abantu no kubafisa, balilenga aba fyuma ukupatana sana na bapiina. Pa fikuulwa baliila ifya kulya palaba bamalonda abakwata ifyanso; e lyo amayanda yaba fyuma nayo yalakwata ulupango apaba amawaya ayatwa, amalaiti ayaka sana, amakamera, e lyo na bamalonda.” Ifi fine e fyo caba na mu fyalo fimbi.

Lelo Baibolo itila “umupiina tomfwa ukukalipilwa.” Bushe aya mashiwi kuti yamunonsha shani? Nga ca kuti mwikala ku ncende ukwaba sana ulukaakala nelyo nga ca kuti mulefwaya ukuya ku cifulo ca musango uyu, mwilamoneka ukuti mwalikwata icuma. Nga muleya ku ncende ukuba sana abantu, muletontonkanya sana pa fyo mulefwaya ukufwala no kusenda, maka maka nga ca kuti ifyo fintu kuti fyalenga ifipondo fyalamukonka. Pa Amapinda 22:3 patila: “Uwasalapuka nga amona ububi alabelama, lelo imbulwa mano shena shiya fye no kukandwa.”

Ukupanda amano ukwaba mu Baibolo kulanga fye ukuti Kabumba wesu alitubikako sana amano. Afwaya tuleba abacingililwa. Pali Lukala Milandu 7:12 patila, “amano yalacingilila” pantu “yalapususha ubumi bwa bayakwata.”