Ica bupe conse icisuma no bupe bonse ubwapwililika fifuma [kuli] . . . Lesa.”—YAKO. 1:17.

INYIMBO: 148, 109

1. Mapaalo nshi twakwata pa mulandu wa cilubula?

ICILUBULA ca mfwa ya kwa Yesu Kristu calilenga twakwata amapaalo ayengi. Cikalenga abana ba kwa Adamu abatemwa ubulungami bakabe mu lupwa lwa kwa Lesa. Na kabili icilubula calilenga ukuti tukekale umuyayaya. Ala fingi icilubula ca kwa Kristu cacita! Ifi Yesu afwile uwa cishinka kuli Yehova calenga imilandu iyakuma ifibumbwa fya ku muulu ne fya pano sonde ukwasukwa.—Heb. 1:8, 9.

2. (a) Milandu nshi iyakuma ifibumbwa fya ku muulu ne fya pano isonde iyaba mwi pepo lya kwa Yesu? (Moneni icikope pa muulu.) (b) Finshi twalasambilila muli cino cipande?

2 Ilyo kwashele imyaka ibili ukuti Yesu apeele ubumi bwakwe ilambo, asambilishe abasambi bakwe ifya kupepa, abebele ukulapepa ati: “Shifwe wa mu muulu, ishina lyenu libe ilya mushilo. Ubufumu bwenu bwise. Ukufwaya kwenu kucitwe pano isonde nga mu muulu.” (Mat. 6:9, 10) Pa kuti tuletasha sana pa  cilubula, natusambilile ifyo cakuma ishina lya kwa Lesa, Ubufumu bwa kwa Lesa e lyo no bufwayo bwakwe.

“ISHINA LYENU LIBE ILYA MUSHILO”

3. Finshi fyaba mwi shina lya kwa Yehova, kabili Satana asaalwile shani ili ishina lya mushilo?

3 Mwi pepo Yesu asambilishe abasambi bakwe, abalilepo ukulanda pa kulenga ishina lya kwa Lesa ukuba ilya mushilo. Ishina lya kwa Yehova lilangilila ukuti alipulamo, alicindama, kabili wa mushilo. Na kabili mwi pepo Yesu apepele aitile Yehova ati “Tata wa mushilo.” (Yoh. 17:11) Apo Yehova wa mushilo, na mafunde yakwe yonse ya mushilo. Na lyo line, Satana abomfeshe ubucenjeshi mwi bala lya Edeni ilyo atwishike insambu Lesa akwata ishakupeela abantu amafunde. Satana alisaalwile ishina lya kwa Lesa ilya mushilo ilyo alandile ubufi pali Yehova.—Ukute. 3:1-5.

4. Bushe Yesu alengele shani ishina lya kwa Lesa ukuba ilya mushilo?

4 Yesu ena alitemenwe sana ishina lya kwa Yehova. (Yoh. 17:25, 26) Yesu alilengele ishina lya kwa Lesa ukuba ilya mushilo. (Belengeni Amalumbo 40:8-10.) Ilyo Yesu ali pano isonde, alecita ifyalelanga ukuti Yehova alilinga ukupeela bamalaika na bantunse amafunde. Na lintu Satana alengele Yesu afwa imfwa iyabipisha, Yesu alitwalilile uwa cishinka kuli Wishi wa ku muulu. Filya Yesu ali uwa cishinka, alangile ukuti umuntu uwapwililika kuti atwalilila ukukonka amafunde ya kwa Lesa.

5. Bushe kuti twalenga shani ishina lya kwa Lesa ukuba ilya mushilo?

5 Kuti twalanga shani ukuti twalitemwa ishina lya kwa Yehova? Ifyo tucita e fingalanga. Yehova afwaya ukuti tube aba mushilo. (Belengeni 1 Petro 1:15, 16.) Ici cilolele mu kuti tufwile ukulapepa fye Yehova no kulamumfwila no mutima wesu onse. Nangu ni lintu abantu baletucusha, tulingile ukwesha na maka ukulakonka amafunde yakwe mu mikalile yesu. Nga tulebomba imilimo iisuma, tulalenga ulubuuto lwesu lwabalika, ne ci cilalenga ishina lya kwa Yehova lyacindikwa. (Mat. 5:14-16) Apo tuli bantu bamushilo, imikalile yesu ifwile ukulanga ukuti amafunde ya kwa Yehova yasuma kabili yalilungama no kuti ifyo Satana alandile fya bufi. Kanshi apo bonse tulalufyanya, nga twalufyanya tulingile ukulapila no kuleka ukucita ifintu ifilenga Yehova alesaalulwa.—Amalu. 79:9.

6. Cinshi Yehova atumwena ukuti tuli balungami nangu ca kuti tatwapwililika?

6 Yehova alelela bonse ababa ne citetekelo ukubomfya ilambo lya kwa Kristu. Alasuminisha abaipeela kuli ena ukuba bakapepa bakwe. Yehova amona Abena Kristu basubwa ukuti balungami kabili bana bakwe, e lyo aba mu “mpaanga shimbi” abamona ukuti balungami kabili fibusa fyakwe. (Yoh. 10:16; Rom. 5:1, 2; Yako. 2:21-25) Kanshi na pali nomba, icilubula cilalenga twaba ifibusa na Shifwe kabili cilalenga ne shina lyakwe ukuba ilya mushilo.

“UBUFUMU BWENU BWISE”

7. Mapaalo nshi ayo tukakwata ilyo Ubufumu bukalateka pa mulandu wa cilubula?

7 Ica bubili ico Yesu alandile mwi pepo ilyo asambilishe abasambi bakwe ukupepa, atile: “Ubufumu bwenu bwise.” Bushe icilubula cayampana shani no Bufumu bwa kwa Lesa? Icilubula e calenga ukuti ba 144,000 balonganikwe, aba bakaba ishamfumu kabili bashimapepo pamo na Kristu ku muulu.  (Ukus. 5:9, 10; 14:1) Yesu na bo akateka nabo, e bakapanga Ubufumu bwa kwa Lesa, bakalenga abantu bacumfwila bakanonkelamo sana mu cilubula pa myaka 1,000. Muli iyi myaka, isonde lyonse likaba paradaise, e lyo abantu bonse aba cishinka bakaba abapwililika, kabili ababomfi ba kwa Lesa aba ku muulu na ba pano isonde bakekatana. (Ukus. 5:13; 20:6) Yesu akafwanta umutwe wa nsoka kabili akafumyapo amafya yonse ayo Satana aleta.—Ukute. 3:15.

8. (a) Bushe Yesu ayafwile shani abasambi bakwe ukwishiba ifyo Ubufumu bwa kwa Lesa bwacindama? (b) Tulanga shani ukuti tulatungilila Ubufumu?

8 Ilyo Yesu ali pano isonde, alyafwile abasambi bakwe ukwishiba ifyo Ubufumu bwa kwa Lesa bwacindama. Ilyo fye Yesu abatishiwe, alebila “imbila nsuma iya Bufumu bwa kwa Lesa.” (Luka 4:43) Ilyo Yesu ashilabwelelamo ku muulu aebele abasambi ukuba inte shakwe “na ku mpela ya pano isonde.” (Imil. 1:6-8) Ukupitila mu mulimo wa kubila imbila nsuma ya Bufumu, abantu mwi sonde lyonse bali no kusambilila pa cilubula no kuba abatekwa ba Bufumu bwa kwa Lesa. Muno nshiku, tulanga ukuti tulatungilila Ubufumu nga tuleyafwa bamunyina ba kwa Kristu umulimo wa kubila imbila nsuma ya Bufumu mwi sonde lyonse.—Mat. 24:14; 25:40.

“UKUFWAYA KWENU KUCITWE”

9. Cinshi cingalenga twacetekela ukuti Yehova akafikilisha ubufwayo bwakwe ku bantunse?

9 Bushe Yesu aloseshe mwi ilyo alandile ati: “Ukufwaya kwenu kucitwe”? Yehova e Kabumba. Nga alanda ukuti cimo cicitike, ciba fye kwati nacicitika na kale. (Esa. 55:11) Takasuminishe bucipondoka bwa kwa Satana ukulesha ubufwayo bwakwe ku bantunse ukucitika. Ukutula fye na pa kutendeka, Yehova alefwaya mwi sonde lyonse mwaba abana abapwililika aba kwa Adamu na Efa. (Ukute. 1:28) Adamu na Efa abafwa ukwabula ukukwatapo umwana, ubufwayo bwa kwa Lesa ubwa kuti abana babo bakakumane pano isonde nga tabwacitike. E ico ilyo Adamu na Efa babembwike, Yehova alibasuminishe ukukwata abana. Ukupitila mu cilubula, Lesa alipeela abantu bonse ababa ne citetekelo ishuko lya kuti bakabe abapwililika kabili bakabe no bumi bwa muyayaya. Yehova alitemwa abantu, kabili afwaya ukuti abamumfwila bakaleikala nge fyo umwine alefwaya pa kutendeka.

10. Bushe abafwa bakanonkelamo shani mu cilubula?

10 Cikaba shani ku bantu abengi sana abafwa ukwabula ukusambilila pali Yehova no kumubombela? Icilubula calenga ukuti kukabe ukubuuka kwa bafwa. Shifwe wa ku muulu uwatutemwa akababuusha, kabili akabapeela ishuko lya kusambilila pa bufwayo bwakwe kabili bakakwata umweo wa muyayaya. (Imil. 24:15) Yehova afwaya abantu batwalilila ukuba no bumi, tafwaya ukuti balefwa. Apo Yehova e ntulo ya bumi, akaba Shibo wa bantu bonse abakabuushiwa. (Amalu. 36:9) Kanshi ipepo Yesu atusambilishe ukupepa lyalilinga ilya kuti: “Shifwe wa mu muulu.” (Mat. 6:9) Yehova alipeelako Yesu umulimo wa kubuusha abafwa. (Yoh. 6:40, 44) Mu Paradaise Yesu akafikilisha ifyo alandile ati, “Nine kubuuka kabili umweo.”—Yoh. 11:25.

11. Cinshi Lesa afwaya ukucitila “ibumba likalamba”?

11 Yehova takacitile fye ifisuma abantu abanono, pantu Yesu alandile ati: “Onse uucita ukufwaya kwa kwa Lesa, e munyinane kabili e nkashi yandi kabili e mayo.” (Marko  3:35) Lesa afwaya ukuti “ibumba ilikalamba” ilya bantu abafuma mu nko shonse, imitundu ne ndimi baba bakapepa bakwe. Bonse ababa ne citetekelo mu cilubula ca kwa Kristu kabili abacita ukufwaya kwa kwa Lesa kuti baba pa babilikisha abati: “Ipusukilo lyesu lyafuma kuli Lesa wesu, uwaikala pa cipuna ca bufumu, na ku Mwana wa mpaanga.”—Ukus. 7:9, 10.

12. Finshi ipepo lya kwa Yesu ilya cilangililo litusambilisha pa bufwayo bwa kwa Lesa ku bantunse bacumfwila?

12 Twasambilila ifingi pa bufwayo bwa kwa Yehova ku bantunse ababa ne cumfwila mwi pepo ilyo Yesu asambilishe abasambi bakwe. Ukulingana ne fyaba muli ili pepo, tulingile ukulaibikilishako ukulacita ifingalenga ishina lya kwa Yehova ukuba ilya mushilo. (Esa. 8:13) Na kuba ishina lya kwa Yesu lyalola mu kuti “Yehova E Pusukilo,” kabili ifi icilubula cikalenga tukapusuke filenga ishina lya kwa Yehova lyacindikwa kabili lyalumbanishiwa. Lesa akabomfya Ubufumu bwakwe ku kuleta amapaalo ku bantu bacumfwila pa kuti bakanonkelemo mu cilubula. Ukwabula no kutwishika, ipepo Yesu asambilishe abasambi bakwe ukupepa lyalenga twacetekela ukuti tapali nangu cimo icingalenga Lesa afilwa ukufikilisha ukufwaya kwakwe.—Amalu. 135:6; Esa. 46:9, 10.

MULETASHA PA CILUBULA

13. Finshi tulanga nga twabatishiwa?

13 Inshila imo iyo twingalangilamo ukuti tulatasha pa cilubula, kuipeela kuli Yehova pa mulandu wa citetekelo twakwata mu cilubula e lyo no kubatishiwa. Nga twabatishiwa tulanga ukuti “tuli ba kwa Yehova.” (Rom. 14:8) Nga twabatishiwa ninshi tulelomba Lesa ukuti atupeele  kampingu umusuma. (1 Pet. 3:21) Yehova na o alatupeela kampingu musuma ilyo atusangulula ku mulopa we lambo lya kwa Kristu. Kanshi twalicetekela sana ukuti akatupeela fyonse ifyo atulaya.—Rom. 8:32.

Ni mu nshila nshi tulangila ukuti tulatasha pa cilubula? (Moneni paragrafu 13 na 14)

14. Mulandu nshi Lesa atwebela ukutemwa abantu banensu?

14 Ni nshila nshi na imbi iyo twingalangilamo ukuti tulatasha pa cilubula? Apo ukutemwa e kulenga Yehova alecita fyonse ifyo acita, kanshi afwaya ukuti bakapepa bakwe bonse baleba no kutemwa. (1 Yoh. 4:8-11) Nga twatemwa abanensu tulanga ukuti tulafwaya ukuba “abana ba kwa [Shifwe] uwaba mu muulu.” (Mat. 5:43-48) Kwaba amafunde yabili ayakalamba, ilya ntanshi kutemwa Yehova, e lyo ilya cibili kutemwa abanensu. (Mat. 22:37-40) TuIanga sana ukuti twalitemwa abanensu nga tulebashimikilako imbila nsuma ya Bufumu bwa kwa Lesa. Nga twalitemwa abantu banensu ninshi tulabalanga ubukata bwa kwa Lesa. Na kuba tukalanga ukuti twalitemwa Lesa nga tuletemwa abantu banensu maka maka aba bwananyina.—1 Yoh. 4:12, 20.

ICILUBULA CILALENGA YEHOVA ‘ALATUPUUPUUTULA’

15. (a) Bushe Yehova atupaala shani pali nomba? (b) Mapaalo nshi ayo tukakwata ku ntanshi?

15 Nga twacetekela icilubula, Lesa alatwelela imembu shesu umupwilapo. Icebo ca kwa Lesa citweba ukuti imembu shesu ‘shilafuutwa.’ (Belengeni Imilimo 3:19-21.) Nga fintu tusambilile kale, pa mulandu wa cilubula Yehova alisala abasubwa ukuba abana bakwe. (Rom. 8:15-17) E lyo fwe baba mu “mpaanga shimbi,” caba kwati Yehova alilembela libela icipepala ca kutweba ukuti tukaba abana bakwe, kabili alilembapo ne shina lyesu. Lyena nga twapwililika, kabili twapita na pa bwesho bwakulekelesha, cikaba kwati Yehova asaina icipepala ca kuti tube abana bakwe abo atemwa abakalaikala pano isonde. (Rom. 8:20, 21; Ukus. 20:7-9) Yehova akatwalilila ukutemwa abana bakwe kabili bakwatwalilila fye ukunonkelamo mu cilubula. (Heb. 9:12) Ubu ubupe tabwakaleke ukubomba, kabili takwaba umuntu nangu umo nelyo ubuteko ubwingatupoka ubu bupe.

16. Bushe icilubula calenga shani twalubulwa?

16 Takuli nangu cimo ico Satana Kaseebanya engacita icingalesha bonse abalapila ukwisaba mu lupwa lwa kwa Yehova. Yesu alishile pano isonde kabili afwile “umuku fye umo capwa.” Kanshi icilubula calilipilwa kale. (Heb. 9:24-26) Icilubula califuuta ulubembu twapyana kuli Adamu. Pa mulandu wa cilubula ca kwa Kristu, twalilubuka kuli ici calo icitekwa na Satana, kabili tatutiina imfwa.—Heb. 2:14, 15.

17. Bushe mwanonkelamo shani mu kutemwa kwa kwa Yehova?

17 Ukwabula no kutwishika fyonse ifyo Lesa atulaya fikafikilishiwa. Nga filya fine amafunde abika mu fyabumbwa yashaluka, Yehova na o taluka. (Mal. 3:6) Yehova tapelela fye pa kutupeela ubumi, lelo alitutemwa no kututemwa. Baibolo itila: “Twalishiba kabili twalisumina ukutemwa uko Lesa atutemwa. Lesa kutemwa.” (1 Yoh. 4:16) Isonde lyonse likaba paradaise, umukaba ukusekelela nga nshi, kabili abantu bonse bakatemwana. Kanshi na ifwe tufwile ukulalandila pamo ne fibumbwa fya kwa Lesa ifya ku muulu atuti: “Ipaalo no bukata na mano no kutootela no mucinshi na maka no bukose fibe kuli Lesa wesu pe na pe. Ameni.”—Ukus. 7:12.