Ukutendekela mu September, mu katabo ka Ukulongana kwa Imikalile no Mulimo Tubomba mukalaba ifya kulanda pa kubila imbila nsuma pa mutwe uukalatila, “Mulesambilisha Icine.” Ico mukalabela uyu mutwe ni pa kuti tukalelanshanya na bantu pa cine icaba mu Baibolo ukubomfya fye icipusho ne lembo.

Nga twamona ukuti umuntu alefwaya ukwishibilapo na fimbi, kuti twamupeela ulupapulo ne lyo kuti twamutambisha vidio iyaba pa jw.org, pa kuti afwaisha ukwishibilapo na fimbi ifyo twingayalashanyapo nga twabwelelako. Tufwile ukushininkisha ukuti twabwelelako pa numa fye ya nshiku ishinono pa kuti twayatwalilila ukulanshanya. Ifi ifya kulanda pa kubila imbila nsuma na malyashi ya basambi fikalafuma mu citabo capitulukwamo ica Bushe Cinshi Baibolo Isambilisha? Apakulafuma ifi fyebo ni pa mpela ya cila cipandwa apatila, Ifishinka Mwasambilila. Apa paliba ifipusho fyalundwako na malembo aya kutwafwa ukucita bwino ifipempu fya kubwelelamo nelyo ukutungulula isambililo lya Baibolo ukubomfya fye Baibolo.

Kwaba fye umusebo umo uutwala ku bumi bwa muyayaya. (Mat. 7:13, 14) Apo tulashimikila abantu abapepa ukwalekanalekana kabili aba nkulilo yapusanapusana, tufwile ukulanda pa cine ca mu Baibolo icingabafika pa mutima. (1 Tim. 2:4) Nga tuleishibilako amalyashi yalekanalekana ayaba mu Baibolo kabili tuleishibilako no kusambilisha bwino, ‘tukalalungika pa kusambilisha Icebo ca cine,’ tukalaba sana ne nsansa, kabili tukalasambilisha bwino abantu icine.—2 Tim. 2:15.