Bushe calyafya ukucita ifisuma?— Abantu abengi e fyo bamona. Baibolo itila calyafishe sana ukuti Yoshia alecita fisuma pantu ali umwaice. Lelo alikwete abanankwe abasuma abalemwafwa ukucita ifisuma. Natusambilile pali Yoshia na banankwe.

Imfumu ya baYuda Amone, e wali wishi wa kwa Yoshia. Amone alecita sana ifyabipa kabili alepepa utulubi. Ilyo afwile, Yoshia e waishileba imfumu ya baYuda. Lelo ali fye ne myaka 8! Bushe alecita ifyabipa nga filya bawishi balecita?— Awe talecita ifyabipa.

Sefania alisokele abantu ukuti tabalingile ukupepa utulubi

Na lintu ali umwaice sana, Yoshia alefwaya ukumfwila Yehova. E co asalilepo ukwangala na batemwa Yehova. Abanankwe balemwafwa ukucita ifisuma. Ni bani abali abanankwe?

Umo ali ni Sefania. Sefania ali ni kasesema uwalesoka abaYuda ukuti ifintu ifyabipa fyali no kubacitikila nga ca kuti  balepepa utulubi. Yoshia alyumfwilile Sefania kabili talepepa utulubi, lelo alepepa Yehova.

Na umbi umunankwe wa kwa Yoshia ali ni Yeremia. Tabapusene sana imyaka, baleikala ku cifulo cimo cine kabili balekulila pamo. Baleumfwana sana ica kuti ilyo Yoshia afwile, Yeremia alilembele ulwimbo ukulanga ifyo alefuluka Yoshia. Yeremia na Yoshia balekoseleshanya ukucita ifisuma no kumfwila Yehova.

Yoshia na Yeremia balekoseleshanya ukucita ifisuma

Finshi wingasambilila kuli Yoshia?— Na lintu Yoshia ali umwaice sana, alefwaisha ukucita ifisuma. Alishibe ukuti alingile ukukwata abanankwe abatemenwe Yehova. Na iwe ulingile ukusala abanobe abatemwa Yehova kabili abengakwafwa ukucita ifisuma.

BELENGA MULI BAIBOLO YOBE