Tinikeni pa kuti muye ku filimo

Tinikeni pa kuti mumone imitwe iilimo

 ISAMBILILO 12

Umwipwa wa kwa Paulo Aali Uwashipa

Umwipwa wa kwa Paulo Aali Uwashipa

Natusambilile pa mwipwa wa kwa Paulo. Uyu mulumendo e wapuswishe Paulo. Tatwaishiba ishina lyakwe, lelo twalishiba ukuti alicitile icalangile ukuti ali uwashipa. Bushe kuti watemwa ukwishiba ico acitile?—

Paulo aali mu cifungo mu Yerusalemu. Balimukakile pantu aleshimikila pali Yesu. Abantu babipa balipatile Paulo, e co balepanga ukumwipaya. Batile: ‘Natwebe umukalamba wa bashilika ukweba abashilika ukuti balete Paulo ku cilye. Tukafisama mu mbali ya nshila kabili ilyo Paulo akalapita, tukamwipaya.’

Umwipwa wa kwa Paulo aebele umukalamba wa bashilika na Paulo pa fyo abalwani balepanga ukumwipaya

Umwipwa wakwe alyumfwile ifyo abantu babipa balepanga ukucita. Finshi acitile? Aile ku cifungo mu kweba Paulo. Apo pene Paulo amwebele ukuti ebe umukalamba wa bashilika pa fyo abantu babipa balepanga ukucita. Bushe calimwangukile ukuyalanda no mukalamba wa bashilika?— Awe, pantu umukalamba wa bashilika ali muntu uwacindama. Lelo umwipwa wa kwa Paulo ali uwashipa, e ico alilandile no mukalamba wa bashilika.

Uyu umushilika alishibe ifyo ali no kucita. Alyebele abashilika nalimo 500 ukushindika Paulo ubushiku pa kuti bamucingilile ilyo aleya ku Kaisarea! Bushe Paulo alipuswike?— Ee, abantu babipa tabamusanshile kabili ifyo balepanga ukucita tafyabombele.

Finshi wingasambilila kuli uyu umulumendo?— Na iwe wine kuti waba uwashipa nga filya umwipwa wa kwa Paulo aali. Tufwile ukuba abashipa nga tulefwaya ukusambilisha abantu pali Yehova. Bushe wakulashipa no kutwalilila ukusambilisha abantu pali Yehova?— Nga wakulacita ifi, ukapusushako bambi.