Tinikeni pa kuti muye ku filimo

Tinikeni pa kuti mumone imitwe iilimo

 ISAMBILILO 5

Samwele Alecita Ifisuma

Samwele Alecita Ifisuma

Ukutula fye ku bwaice, Samwele aleikala pe hema kabili e po alebombela. Pe hema e po abantu baleya mu kupepa Yehova. Bushe walishiba icalengele ukuti Samwele alebombela pe hema? Natubale tulande pali Hana, nyina wa kwa Samwele.

Hana alefwaisha ukukwata umwana, lelo talekwata. E ico alipepele kuli Yehova ukuti amwafwe. Alaile ukuti nga akwata umwana, akamupeela kuli Yehova pa kuti aleikala no kubombela pe hema. Yehova alyaswike ipepo lyakwe kabili alikwete umwana umwaume. Amwinike ati Samwele. Ilyo Samwele ali ne myaka ukucila pali itatu, Hana alimutwele kwi hema pa kuti alebombela Lesa nga filya fine alaile.

Eli e wali shimapepo mukalamba pe hema. Abana bakwe abaume babili nabo e po balebombela. Pe hema e po abantu baleya mu kupepela Lesa kabili abalebombela palya balingile ukulacita ifisuma. Abana ba kwa Eli bena balecita ifyabipa. Samwele alishibe ifyo balecita. Bushe Samwele alecita ifyabipa nga filya abana ba kwa Eli balecita?— Awe, ena alecita ifisuma, filya fine abafyashi bakwe bamusambilishe.

Bushe finshi Eli alingile ukucita pa fyo abana bakwe balecita?— Alingile ukubakanda no kubalesha ukubombela pa ng’anda ya kwa Lesa. Lelo te fyo Eli acitile, e co Yehova alikalipile Eli na bana bakwe no kubakanda.

Samwele alyebele Eli ifyo Yehova amutumine

Ubushiku ninshi Samwele nalaala, aumfwile uwalemwita ati: ‘Samwele!’ Samwele abutukile kuli Eli, lelo Eli atile: ‘Nshikwitile.’ Alyumfwile imiku na imbi ibili ukuti kuli uulemwita. Pa muku walenga butatu, Eli aebele Samwele ati nga waumfwa bakwita na kabili, wasuke ati: ‘Soseni, mwe Yehova, ndekutika.’ Ifi fine e fyo Samwele acitile. E lyo Yehova aebele Samwele ati: ‘Webe Eli ati nkakanda aba mu ng’anda yakwe pa filubo fyabo.’  Bushe calyangwike ukweba Eli aya mashiwi?— Awe tacayangwike. Nangu ca kuti Samwele ali no mwenso, alicitile ifyo Yehova amwebele. Ifyo Yehova alandile, fyalicitike. Eli na bana bakwe babili balifwile.

Samwele alicitile ifintu ifisuma ifyo na ifwe twingacita. Alecita ifisuma nangu ca kuti alemona uko abantu bambi balecita ifyabipa. Inga iwe? Bushe kuti watwalilila ukucita ifisuma nga filya Samwele alecita? Nga e fyo ukalacita ninshi ukalenga abafyashi bobe na Yehova bakabe ne nsansa.

BELENGA MULI BAIBOLO YOBE