Tinikeni pa kuti muye ku filimo

Tinikeni pa kuti mumone imitwe iilimo

 ISAMBILILO 1

Inkama Iyo Twaishiba

Inkama Iyo Twaishiba

Bushe kwaliba abakwebapo inkama?— * Baibolo yalilanda pa nkama iyacindama iyo beta ati “inkama ya kwa Lesa.” Iyi nkama yalicindama pantu ni Lesa e watweba. Baita ukuti inkama pantu abantu tabayishibe. Nangu fye ni bamalaika balefwaya ukwishiba iyi inkama. Bushe kuti watemwa ukwishiba iyi inkama?—

Finshi bamalaika balefwaya ukwishiba?

Kale sana, Lesa alipangile umwaume no mwanakashi wa ntanshi. Abenike ati Adamu na Efa. Lesa alibapeele icifulo ca kwikalamo icisuma ico baleita ukuti Edeni. Nga ca kuti balyumfwilile Lesa, bena e lyo na bana babo nga balilengele icalo conse ukuba paradaise nga filya Edeni yali. Na kabili nga balikeele mu Paradaise ukwabula ukufwa. Lelo bushe walishiba ifyo Adamu na Efa bacitile?—

Adamu na Efa tabaumfwilile Lesa, e calenga ukuti twilaikala mu paradaise. Lelo, Lesa alitweba ukuti akawamya cino calo, e lyo abantu tabakalefwa kabili bakaba aba nsansa. Finshi akacita? Pa myaka iingi, abantu tabaishibe ifyo Lesa aali no kucita pantu yali ni nkama.

Ilyo Yesu aishile pano calo, alelanda sana pali iyi inkama. Iyi inkama, Bufumu bwa kwa Lesa. Yesu aebele abantu ukulapepa ukuti ubu Ubufumu bwise. Ubufumu bwa kwa Lesa e bukalenga icalo ukuba paradaise.

Bushe watemwa ukwishiba iyi inkama?— Ufwile ukwishiba ukuti abomfwila Yehova e bakekala fye mu Paradaise. Mu Baibolo mwaliba amalyashi ayengi ayalanda pa baume na banakashi abaleumfwila Yehova. Bushe kuti watemwa ukusambilila pali aba baume na banakashi?— Leka tusambilile pali bamo bamo e lyo tumone ne fyo twingabapashanya.

^ para. 3 Amasambililo yonse muli kano katabo nayakwata umo bashilile pa mpela ya cipusho. Nga mwasanga umo bashilile, ninshi mufwile mwalolelako pa kuti abana balandepo.