Ucita shani nga waumfwa umwenso?— Nalimo ulabutukila kuli banoko nelyo bawiso ukuti bakwafwe. Lelo kwaliba na umbi uwingakwafwa. Alikwata sana amaka ukucila uli onse. Bushe walimwishiba?— Ni Yehova Lesa. Natulande pali Davidi, umulumendo uo Baibolo yalandapo. Alishibe ukuti Yehova akulamwafwa, e co taletiina.

Ukutula ku bwaice, abafyashi bakwe balemusambilisha ukuti afwile ukutemwa Yehova. Ici calengele Davidi ukukanatiina nangu ca kuti limo kwaleba ifyalemutiinya. Alishibe ukuti Yehova munankwe kabili ali no kumwafwa. Bushiku bumo ilyo Davidi alecema impaanga, inkalamo iikalamba yalikete impaanga. Bushe walishiba ifyo Davidi acitile? Alipepeke inkalamo no kuipaya ku minwe fye. Na kabili Davidi alipeye bere ilyo yaikete impaanga. Bushe ni nani ayafwile Davidi?— Ni Yehova.

Kwali inshita na imbi ilyo Davidi ali uwashipa sana. Abena Israele balelwa na baPelishiti. Umushilika umo uwa baPelishiti aali umutali sana kabili ipaka. Ishina lyakwe aali ni Galyati. Ili ipaka lyalesuusha Yehova e lyo na bashilika ba bena Israele. Galyati kutumfya kutumfya aleita abena Israele ukuti balwe nankwe. Lelo abena Israele balemutiina. Ilyo Davidi aumfwile, aebele Galyati ati: ‘Nkalwa na iwe! Yehova akangafwa kabili nkakucimfya!’ Bushe uletontonkanya ukuti Davidi taumfwile umwenso?— Taumfwile umwenso. Bushe ulefwaya ukwishiba ifyacitike?

Davidi abuulile icisukushilo na mabwe ayatelela 5 e lyo aya mu kulwa na Galyati. Apo Davidi aali umwaice, ilyo Galyati amumwene atendeke ukumuseka. Lelo Davidi amwebele ati: ‘Iwe uleisa no lupanga kuli ine, lelo ine ndeisa kuli iwe mwi shina lya kwa Yehova!’ Davidi abikile ilibwe mu cisukushilo kabili alashile Galyati. Ilibwe lyalashile Galyati pa kati ka menso. Ipaka lyaliwile pa nshi no kufwa lyafwa! AbaPelishiti balyumfwile umwenso  e co bonse balibutwike. Cinshi calengele Davidi umwaice ukwipaya Galyati?— Apo Yehova alikwatisha amaka, e wayafwile Davidi ukwipaya ipaka!

Davidi taali no mwenso pantu alishibe ukutila Yehova kuti amwafwa

Finshi wingasambilila ku lyashi lya kwa Davidi?— Yehova alikwatisha amaka ukucila abantu bonse. Na iwe Yehova munobe. Inshita ili yonse ilyo ukomfwa umwenso, ukebukishe ukuti Yehova kuti akukosha.

BELENGA MULI BAIBOLO YOBE