Bushe naubamona abaume abali pa cikope?— Amashina yabo ni Mateo, Marko, Luka, Yohane, Petro, Yakobo, Yuda na Paulo. Aba baume bonse baliko ilyo Yesu ali pano calo kabili balilembele ifyacitike pali Yesu. Leka tusambilile na fimbi pali aba baume.

Finshi waishibapo pali aba baume?

Batatu pali aba bali batumwa, abaleshimikila na Yesu. Bushe naubeshiba?— Ni Mateo, Yohane na Petro. Mateo na Yohane balimwishibe bwino sana Yesu kabili balilembele  amabuuku yalanda pali Yesu. Umutumwa Yohane alilembele ibuuku lya Ukusokolola e lyo na mabuuku yambi yatatu aya 1 Yohane, 2 Yohane na 3 Yohane. Umutumwa Petro alembele amabuuku yabili aya mu Baibolo. Aya amabuuku ni 1 Petro e lyo na 2 Petro. Mwi buuku lyakwe ilya bubili, Petro alembele pa fyo Yehova alandile pali Yesu ati: ‘Uyu mwana wandi. Nalimutemwa kabili ndasekela muli ena.’

Bambi abali pa cikope nabo balitweba pali Yesu mu mabuuku balembele. Umo pali aba ni Marko. Marko afwile e ko ali ilyo Yesu bamwikete kabili alimwene fyonse ifyamucitikile. Umbi na o ni Luka. Luka ali ni dokota kabili nalimo aishileba Umwina Kristu ilyo Yesu afwile.

Bambi babili abalembele Baibolo abali pa cikope bali ni bamunyina ba kwa Yesu. Bushe naubeshiba amashina?— Ni Yakobo na Yuda. Pa kubalilapo, tabatetekele Yesu. Baletontonkanya no kuti Yesu alifulungene. Lelo ilyo papitile inshita balitetekele Yesu kabili baishileba Abena Kristu.

Umbi uwalembele Baibolo uuli pa cikope ni Paulo. Ilyo talaba Umwina Kristu, ali ni Sauli. Alipatile Abena Kristu kabili alebacusha. Bushe walishiba icalengele ukuti Paulo abe Umwina Kristu?— Bushiku bumo ilyo Paulo ali pa lwendo, aishileumfwa fye ishiwi ukufuma ku muulu. Yesu e walandile nankwe. Aipwishe Paulo ati: ‘Cinshi ucushisha Abena Kristu?’ Aya amashiwi yalengele Paulo ukwaluka no kuba Umwina Kristu. Paulo alembele amabuuku ya mu Baibolo 14. Aya amabuuku yatendekela pe buuku lya Abena Roma ukufika ku AbaHebere.

Tulabelenga Baibolo cila bushiku, bushe te ifyo?— Ukubelenga Baibolo kulalenga twaishiba ifingi pali Yesu. Bushe kuti watemwa ukwishibilapo na fimbi pali Yesu?—