Israel

Czech Republic

Benin

Cayman Islands

Bushe kuti mwatemwa ukufwailisha ifyebo pa kuti mwishibilepo na fimbi pa fya mu Baibolo? Bushe kwaliba ilembo, umuntu, icifulo nelyo icintu cimo ico Baibolo yalandapo ico mufwaya ukwishiba? Nelyo bushe mulafwaya ukwishiba nga ca kutila Icebo ca kwa Lesa kuti camwafwa pa fimusakamika? Laibrare iyaba pa Ng’anda ya Bufumu kuti yamwafwa.

Mwaliba impapulo umo mwingafwayafwaya ifyebo. Kwena te kuti mukwate magazini ne fitabo fyonse ifya Nte sha kwa Yehova mu citundu cenu. Lelo mu laibrare ya pa Ng’anda ya Bufumu, mulaba impapulo ishingi isha nomba line. Mumo mulaba na maBaibolo yalekanalekana na madikishonari ayasuma e lyo ne fitabo fimbi umo mwingasanga ifyebo fimo. Kuti mulebomfyako ifitabo fyaba muli iyi laibrare ilyo ukulongana kushilatendeka na pa numa ya kulongana. Nga mwaliba na kompyuta, bafwile balibikapo na Watchtower Library. Iyi ni laibrare ya pa kompyuta iyakwata impapulo shesu ishingi isho twingabelengela palya pene. Paliba na programu iitwafwa ukusanga bwangu ifyebo, nampo nga tulefwaya icipande, ishiwi, nelyo ilembo.

Ilaafwa sana abalembesha mu Ukulongana kwa Imikalile ya Bwina Kristu no Mulimo Tubomba. Kuti mulebomfya laibrare ya pa Ng’anda ya Bufumu pa kupekanya amalyashi. Kangalila wa Ukulongana kwa Imikalile no Mulimo Tubomba e ulolekesha pali iyi laibrare no kushininkisha ukuti magazini ne fitabo fya nomba line e mo fili no kuti nabafitantika bwino. Uumusambilisha Baibolo nelyo kangalila we sukulu kuti amulanga ifya kusanga ifyebo mulefwaya. Lelo tamufwile ukusenda icitabo icili conse ica mu laibrare ku ng’anda. E lyo tufwile ukusunga bwino ifi ifitabo, kabili tatufwile ukushilamo.

Baibolo itila pa kusanga ifyebo ifingatwafwa “ukwishiba Lesa,” tufwile “ukufifwayafwaya nge fyuma fyashikama.” (Amapinda 2:1-5) Kuti mulebomfya laibrare ya pa Ng’anda ya Bufumu pa kufwailisha ifyo fyebo.

  • Finshi fiba mu laibrare ya pa Ng’anda ya Bufumu ifyo twingabomfya pa kufwailisha ifyebo?

  • Ni bani bengamulanga ifya kubomfya bwino laibrare?