SALENI
Amashiwi

1. Bushe kwaba fye ukupepa kwa cine kumo?

“Cenjeleni kuli bakasesema ba bufi.”—MATEO 7:15.

Yesu aishilelanga abasambi bakwe ukupepa kumo fye, kabili uku kwine e kupepa kwa cine. Kwaba kwati musebo uutungulula ku mweo wa muyayaya. Yesu atile: ‘Banono abasanga’ uyu musebo. (Mateo 7:14) Ukupepa uko Lesa amona ukuti kwa cine ni kulya ukukonka ifyaba mu Cebo cakwe Baibolo. Kanshi ababa mu kupepa kwa cine balikatana kabili basumina muli fimo fine.—Belengeni Yohane 4:23, 24; 14:6; Abena Efese 4:4, 5.

2. Finshi Yesu alandile pa Bena Kristu ba bufi?

“Basosa abati balishiba Lesa, lelo ku fyo bacita balamukaana.”—TITO 1:16.

Yesu atile mu Bena Kristu mwali no kwima bakasesema ba bufi abali no kulalufya abantu. Bakasesema ba bufi bamoneka fye kwati basambi ba kwa Kristu aba cine. Ababa muli aya macalici ya bakasesema ba bufi nabo batila Bena Kristu. Lelo ifyo bacita e filanga ukuti Bena Kristu ba bufi. Nomba kuti twaishiba shani ukupepa kwa cine? Ukupepa kwa cine ni kulya ukusambilisha Abena Kristu ba cine ukuba ne mibele iisuma iyo bonse bamona.—Belengeni Mateo 7:13-23.

3. Finshi twingeshibilako Abena Kristu ba cine?

Kuti twabeshibila ku fintu 5 ifyakonkapo:

  • Abena Kristu ba cine balishiba ukuti Baibolo Cebo ca kwa Lesa. Balakonka sana ifyaba mu Baibolo. Kanshi ukupepa kwa cine kwalipusana no kwa bufi ukusambilisha  amano ya bantunse. (Mateo 15:7-9) Abena Kristu ba cine bacita filya fine basambilisha.—Belengeni Yohane 17:17; 2 Timote 3:16, 17.

  • Abasambi ba kwa Yesu aba cine balacindika ishina lya kwa Lesa, Yehova. Yesu alicindike ishina lya kwa Lesa ilyo alengele bambi ukulishiba. Alyafwile abantu ukwishiba Lesa kabili abasambilishe ukulapepa ukuti ishina lya kwa Lesa libe ilya mushilo. (Mateo 6:9) Uko mwikala, bushe ni bani bashimikila pe shina lya kwa Lesa?—Belengeni Yohane 17:26; Abena Roma 10:13, 14.

  • Abena Kristu ba cine balashimikila pa Bufumu bwa kwa Lesa. Lesa atumine Yesu ukwisa mu kubila imbila nsuma iya Bufumu. Ubufumu bwa kwa Lesa e bukalubula fye abantu. Yesu alitwalilile ukushimikila pa Bufumu mpaka no bushiku afwile. (Luka 4:43; 8:1; 23:42, 43) Alandile ukuti abasambi bakwe bakalashimikila pa Bufumu. Nga umo aisa kuli imwe aleshimikila pa Bufumu bwa kwa Lesa, bushe mutila ni kwi apepa?—Belengeni Mateo 24:14.

  • Abasambi ba kwa Yesu te ba muli ici calo cabipa. Kuti mwabeshiba pantu tababa mu mapolitiki nelyo mu fimfulunganya. (Yohane 17:16; 18:36) Na kabili tabacitako ifyabipa kabili imibele yabo tayaba nga iya bantu ba muli cino calo cabipa.—Belengeni Yakobo 4:4.

  • Abena Kristu ba cine balitemwana nga nshi. Icebo ca kwa Lesa cibasambilisha ukucindika imitundu ne mishobo yonse. Nangu ca kuti aba mu kupepa kwa bufi balafwilisha abalelwa inkondo, Abena Kristu ba cine bena balakaana ukucita ifyo. (Mika 4:1-3) Lelo bena babomfya inshita yabo na maka ku kwafwa no kukoselesha bambi.—Belengeni Yohane 13:34, 35; 1 Yohane 4:20.

4. Bushe kuti mwaishiba ukupepa kwa cine?

Ni bani abacindika ishina lya kwa Lesa, abashimikila ukuti Ubufumu bwa kwa Lesa fye e bukalubula abantu, kabili fyonse ifyo basambilisha fifuma mu Baibolo? Bantu nshi abatemwana sana kabili abashilwako inkondo? Muletontonkanya ukuti ni bani?—Belengeni 1 Yohane 3:10-12.