Kalata Ukufuma Kwi Bumba Litungulula

Kuli Bamunyinefwe na Bankashi Abatemwikwa:

Mu Ulupungu lwa kwa Kalinda ulwa bantu bonse ulwa kubalilapo, ulwa January 1, 2008 e mwali icipande ca kubalilapo icaleti: “Pashanyeni Icitetekelo Cabo.” Ukufuma ilya nshita, lyonse nga papita imyeshi itatu mu Ulupungu lwa kwa Kalinda mulaba icipande pali uyu wine mutwe, ico tutemwa sana ukubelenga!

Finshi ababelenga ifi fipande balandapo? Pa numa ya kubelenga icipande icalelanda pali Marita, umwanakashi umo atile: “Ala nalisekele sana ilyo nabelengele ili lyashi pantu naba fye nga ena. Ndatemwa ukupokelela abeni no kubapekanishisha ifingi ica kuti limo ndalaba no kuti mfwile ukulaisha nabo.” Ilyo umukashana wa myaka 15 abelengele ilyashi lya kwa Estere, atile: “Ndemona kwati nga tatutekenye kuti twatemwisha ukulafwala fye ifya kufwala ifipya. Ca cine ukuti tufwile ukulamoneka bwino, lelo tatufwile ukucishamo.” Alandile no kuti: “Yehova abika sana amano ku fyo umutima wesu waba.” Ilyo nkashi umbi na o abelengele icipande icalelanda pa mutumwa Petro, atile: “Ilyashi lyalinsendele sana! Ilyo nalebelenga nale-elenganya ifyo cali kabili nalemona fye kwati e ko nali.”

Abantu abengi ababelenga ifi fipande kumo na ba bene twalandapo balalemba amakala ya kutasha. Ifyo balanda filanga fye ukuti umutumwa Paulo alilandile icishinka ilyo atile: “Fyonse ifyalembelwe kale fyalembelwe ku kutufunda.” (Rom. 15:4) Yehova afwaile ukuti aya malyashi yalembwe mu Baibolo pa kuti tulesambililako amasambililo ayakankaala. Bonse fye nampo nga tuli bapya nelyo twalibombela Lesa pa myaka iingi kuti twasambililako ifingi.

Tulemukoselesha sana ukutendeka bwangu ukubelenga ici citabo. Mulesambililamo na pa Mapepo ya Lupwa, abana benu bakacitemwa nga nshi! Ilyo mukalasambililamo pe Sambililo lya Baibolo pa Cilonganino, mwikapuswako nangu fye mulungu umo! Mulecibelenga mu mutekatima, te kubelenga fye lubilo lubilo. Muletontonkanyapo no kwelenganya ifyo mulebelenga. Esheni ukumfwa ifyo abalandwapo muli ici citabo baleumfwa no kwesha ukumona ifyo balemona. Mulelinganya ifyo bacitile pa fintu fimo ku fyo mwingacita nga ni mwe.

Ala natutemwa ukumupekanishisha ici citabo. Tule-enekela ukuti cikamwafwa no lupwa lwenu. Twalimutemwa sana kabili tulafwaya ukuti Lesa alemupaala,

Ibumba Litungulula Ilya Nte Sha Kwa Yehova