Tinikeni pa kuti muye ku filimo

Tinikeni pa kuti mumone imitwe iilimo

 ISAMBILILO 24

Abaume 12 Abaile mu Kumona Icalo

Abaume 12 Abaile mu Kumona Icalo

Abena Israele bafumine pa Lupili lwa Sinai no kupita mu mpanga ya Parani kabili baile ku Kadeshe. Ilyo bafikile ku Kadeshe, Yehova aebele Mose ati: ‘Tuma abaume 12 ukufuma mu mikowa 12 aba kuyamona ifyo calo ca Kaanani caba, pantu e calo ico nkapeela abena Israele.’ E ico Mose asalile abaume 12 no kubeba ati: ‘Kabiyeni ku Kaanani muyemona nga ca kuti umushili usuma ne fya kulya kuti fyakula bwino. Kabili muyemona nga ca kuti abena Kaanani ba maka nelyo tabakwata amaka, nga bekala mu matenti nelyo mu misumba.’ Pa baume 12 abaile ku Kaanani pali na Yoshua na Kalebu.

Pa numa ya nshiku 40 aba baume balibwelele kabili baliletele ifisabo pamo nga amakunyu, amapomegranate ne myangashi. Aba baume batile: ‘Icalo cisuma nomba abantu ba maka kabili bekala mu misumba iyakwata amalinga ayatali.’ Lelo Kalebu ena atile: ‘Kuti twabacimfya. Tiyeni nomba line!’ Bushe nawishiba icalengele ukuti Kalebu alande aya mashiwi? Ni co ena na Yoshua balicetekele Yehova. Nomba abaume bambi 10 batile: ‘Awe! Tatufwile ukuya pantu abantu ababamo batali kabili ba maka sana, bamoneka fye kwati mapaka! Ifwe twalemoneka abanono nge fipaso.’

Abena Israele balitiinine sana. Batendeke ukuilishanya abati: ‘Natusale uwa kututungulula umbi tubwelele na ku Egupti.  Tatulingile ukuya kuli ici calo pantu bakayatwipaya.’ Yoshua na Kalebu batile: ‘Mwipondokela Yehova kabili mwitiina. Yehova akatucingilila.’ Lelo abena Israele tabaumfwile, balefwaya no kwipaya Yoshua na Kalebu!

Finshi Yehova acitile? Aebele Mose ati: ‘Abena Israele nalibacitila ifintu ifingi sana lelo tabacita ifyo mbeba. E ico bakekala mu matololo pa myaka 40 kabili e mo bakafwila. Abana babo, Yoshua na Kalebu e bakengila mu calo ico nabalaile.’

“Cinshi muletiinina, mwe ba citetekelo icinono?”—Mateo 8:26