Mu Kaisarea mwali umukalamba we bumba lya bashilika abena Roma uo baleita ati Korneli. Nangu ca kuti tali muYuda, abaYuda balimucindike. Aleyafwa abapiina. Korneli alisumiine muli Yehova kabili alepepa lyonse kuli ena. Bushiku bumo, malaika aile kuli Korneli no kumweba ati: ‘Lesa naumfwa amapepo yobe. Nomba tuma abantu ku musumba wa Yopa ku kwita Petro.’ Apo pene fye Korneli atumine abaume batatu ku Yopa, apali amakilomita nalimo 50 ukuya ku kapinda ka ku kulyo aka Kaisarea.

Petro na o ilyo ali mu Yopa alimwene icimonwa. Amwene inama isho abaYuda babakeenye ukulya, kabili aumfwile ishiwi lilemweba ati alye. Petro alikeene ukulya, atile: ‘Nshalyapo inama ishakowela ukutula apo nafyalilwa.’ Ishiwi lya mwebele ati: ‘Wilalanda ati ishi nama shalikowela. Lesa nashisangulula.’ Petro bamwebele no kuti: ‘Kuli abaume batatu abali pa mwinshi wa ng’anda yobe. Ubakonke.’ Petro aile ku mwinshi wa ng’anda kabili aipwishe abaume ico bakonkele. Bamwebele ati: ‘Korneli umukalamba wa bashilika e ututumine. Alefwaya tuye na imwe ku ng’anda yakwe  ku Kaisarea.’ Petro aebele abaume ukuti balaale ku mwakwe. Ubushiku bwakonkelepo, Petro aile nabo ku Kaisarea pamo na ba bwananyina bamo aba mu Yopa.

Ilyo Korneli amwene Petro, alimufukamine. Nomba Petro amwebele ati: ‘Ima! Na ine ndi muntu fye nga iwe. Lesa anjebele ukwisa kuli ino ng’anda nangu ca kuti abaYuda tabengila mu mayanda ya bena Fyalo. Njeba ico unjitiile.’

Korneli aebele Petro ati: ‘Napapita inshiku shine ukutula apo nalepepela kuli Lesa, kabili malaika anjebele ukuti ntume abakwisa musenda. Mukwai tusambilisheni amashiwi ya kwa Yehova.’ Petro atile: ‘Nasambilila ukuti Lesa takwata akapatulula. Alapokelela onse uulefwaya ukumupepa.’ Petro alibasambilishe ifintu ifingi pali Yesu. Lyena umupashi wa mushilo waishile pali Korneli na bonse abali nankwe, kabili bonse balibatishiwe.

“Umuntu uwa mu luko lonse uutiina Lesa no kucita icalungama alapokelelwa kuli ena.”—Imilimo 10:35