Mu calo icali ku kabanga ka calo ca Israele mwali abantu abasumiine ukuti intanda kuti shabatungulula. Bushiku bumo mu nshita ya bushiku, abaume aba ku kabanga bamwene icalemoneka ngo lutanda cileenda mu muulu, kabili balicikonkele. Ulu lutanda lwabatwele ku Yerusalemu. Aba baume batendeke ukwipusha abantu abati: ‘Ali kwi umwana uukaba imfumu ya baYuda? Twaisa mu kumufukamina.’

Ilyo Herode imfumu ya mu Yerusalemu aumfwile ukuti kuli imfumu iipya, alisakamene sana. Aipwishe intungulushi sha bashimapepo ati: ‘Ni kwi uko imfumu ilingile ukufyalilwa?’ Bashimapepo bamwebele ati: ‘Bakasesema balandile ati akafyalilwa mu Betelehemu.’ Lyena Herode aitile abaume aba ku kabanga kabili abebele ati: ‘Kabiyeni ku Betelehemu eko muyefwaya uyu mwana. Mukabwele mukesenjeba uko ali. Ndefwaya na ine nkaye mufukamina.’ Lelo ifi alandile bufi.

Ulutanda lwalitendeke ukwenda na kabili. Abaume balilukonkele kabili lwabatwele ku Betelehemu. Ulutanda lwaiminine pa muulu wa ng’anda kabili abaume balingiile mu ng’anda. Ilyo baingile mukati basangile Yesu ali na Maria, nyina. Awe balifukamine umwana kabili balimupeele golde, ifyanunkila na muri. Bushe ni Yehova uwatumine aba baume ukuya mu kufwaya Yesu? Awe.

Mu nshita ya bushiku, Yehova aebele Yosefe mu ciloto ukuti: ‘Herode alefwaya ukwipaya Yesu. Senda umukashi obe no mwana, kabiyeni ku Egupti. Mukekale muli ici cine calo mpaka nkamwebe ukubwela.’ Ilyo line fye Yosefe na ulupwa lwakwe baile ku Egupti.

Yehova alyebele abaume aba ku kabanga ukuti bebwelela kuli Herode. Ilyo Herode ailwike ukuti abaume tababwelele, alifulilwe sana. Apo alifililwe ukusanga Yesu, atumine abakuyaipaya abana abaume bonse mu Betelehemu abali ne myaka iyo Yesu akwete. Lelo Yesu tali mu Betelehemu ali ku Egupti ukutali sana.

 Mu kupita kwa nshita, Herode alifwile. Lyena Yehova aebele Yosefe ati: ‘Nomba uwalefwaya ukwipaya umwana nafwa kuti mwabwelelamo.’ E ico Yosefe, Maria na Yesu balibwelelemo ku Israele, kabili batendeke ukwikala mu musumba wa Nasarete.

“Ne cebo icifuma mu kanwa kandi . . . , cikacita ico mfwaya, kabili cikafikilisha ico nacitumina.”—Esaya 55:11