Tinikeni pa kuti muye ku filimo

Tinikeni pa kuti mumone imitwe iilimo

 INDONESIA

Cine cine, Baali Bana ba kwa Sara

Ba Titi Koetin

Cine cine, Baali Bana ba kwa Sara
  • BAFYELWE MU 1928

  • BABATISHIWE MU 1957

  • Baali ni bankashi abayafwile abena mwabo ukusambilila icine. Abashimike ili lyashi bana babo abaume ba Mario Koetin.

BA MAYO baali no mutima uusuma, balitemenwe abantu kabili balitemenwe sana Baibolo. Ilyo bamonene na ba Gertrud Ott abali bamishonari ku Manado, umusumba uwabela ku North Sulawesi, balisumine isambililo lya Baibolo kabili no kubatishiwa balibatishiwe. Lelo batata ba Erwin, abalebomba incito ya pa muulu mu banki kabili abaishiletampa ukwangalila akampani akalelolekesha pa makwebo mu musumba wa Jakarta aka Jakarta Stock Exchange, balebakaanya.

Bushiku bumo, batata balitiinishe bamayo.

Babebele ukuti, “Salapo ico ulefwaya, pali ine na pa mipepele yobe!”

Bamayo balitontonkenyepo sana. Lyena babaswike abati, “Ndefwaya bonse babili, imwe na Yehova.”

Ilyo batata baumfwile ifi, baikele fye tondolo kabili no bukali bwalipwile.

Mu kupita kwa nshita, batata balilekele ukukaanya bamayo nge fyo balebakaanya kale pantu balibatemenwe nga nshi kabili balibacindike pa mulandu wa kuti baali na mano.

 Na lyo line, bamayo balefwaisha ukuti batata basambilile icine. Ilyo bamayo bapepelepo sana, baishileibukisha ukuti batata balitemwa ukusambilila indimi. E ico batendeke ukulabika amalembo yamo aya muli Baibolo ya mu ciNgeleshi mu ng’anda yesu. Baebele batata ukuti, “Ndefwaya ukwishibilako iciNgeleshi.” Na kabili bamayo balibukishe ukuti batata balitemenwe ukulanda ku cintubwingi, e co balibebele ukuti balekutika ilyo bamayo balepituluka mu malyashi ayo baali no kulanda mwi Sukulu lya Butumikishi Ilya Bulesa. Batata balisumine. Apo bamayo balishibe ukuti batata bali ne cileela, bamayo balibepwishe nga kuti babasuminisha ukupokelela kangalila wa muputule mu ng’anda mu mwesu ilyo aishile mu kubombela icilonganino cesu. Batata balisumine. Na kabili, bamayo balishibe ukuti batata balitutemenwe bonse mu lupwa, e ico balibepwishe nga kuti basumina ukuya nabo ku kulongana kwa citungu no kubeeba ukuti bakatemwa sana ukwikala pamo na ifwe. Batata balisumine.

Ukutekanya kwa bamayo ne fyo balecita fyalengele batata bayamba ukutemwe icine. Ilyo twakuukile ku England, batata balitendeke ukulongana kabili baishileba cibusa wa ba John Barr abaishileba mwi Bumba Litungulula Ilya Nte sha kwa Yehova. Muli ulya wine mwaka, batata balibatishiwe kabili ici calengele bamayo basansamuke icine cine. Mu myaka yakonkelepo, batata balitemenweko bamayo no kubatentemba nga nshi.

Abanensu bamo balepashanya bamayo kuli Lidia, umwina Kristu umwanakashi uwaliko mu nshita ya batumwa, uwali ne cileela sana. (Imilimo 16:14, 15) Lelo ine mbapashanya kuli Sara uwaleitemenwa ukunakila umwina mwakwe Abrahamu. (1 Pet. 3:4-6) Bamayo bali ne mibele iisuma, no mucinshi kabili balibikile amano ku fya kwa Lesa ica kuti abantu bonse ababeshibe balibatemenwe sana. Ifyo balecita e fyalengele batata batemwe icine. Ala kuli ine bamayo cine cine baali fye kwati mwana wa kwa Sara.

Bamayo bali ne mibele iisuma no mucinshi kabili balibikile amano ku fya kwa Lesa ica kuti abantu bonse ababeshibe balibatemenwe sana