Mu July 1951, aba mu cilonganino ca mu Jakarta balilongene ku kupokelela ba Peter Vanderhaegen, bamishonari ba kubalilapo ukwisa mu Indonesia ukufuma kwi Sukulu lya Gileadi. Ilyo umwaka walepwa, bamishonari na bambi 15 balishile ukufuma ku Australia, ku Germany na ku Netherlands ica kuti ne mpendwa ya bakasabankanya yalikulileko mu Indonesia.

Ba Fredrika Renskers bamishonari abafumine ku Netherlands batile, “Naletontonkanya ukuti nakulabomfya fye amaboko no mutwe pa kushimikila abantu imbila nsuma ku ng’anda ne ng’anda, lelo apo abantu abengi balelanda iciDutch, nalitampile ukulanda ulu ululimi pa kubashimikila imbila nsuma.” Ba Ronald jacka abafumine ku Australia nabo batile, “Bambi pa kubila imbila nsuma, twalebomfya kardi apalembelwe ilyashi lya Baibolo ilipi fye mu ciIndonesian. Kanshi ilyo nshilakonkonsha pa ciibi nalelolesha pali kardi e lyo nalanda amashiwi ayalembelwepo ku mutwe fye.

Apo bamishonari balebombesha mu mulimo wa kubila imbila nsuma, mu mwaka fye umo bakasabankanya abaali 34 bafikile 91. Pa 1 September 1951, ba Watch Tower Society baliswile Iofeshi lya musambo pa ng’anda ya kwa munyina Andre Elias mu Central Jakarta. Ba Ronald Jacka e bo basontele ukuba umubomfi wa musambo.

Abaleikala Mu Fishi Fimbi Nabo Basambilila Icine

Mu Novenber 1951, ba Peter Van balibatumine ukuya mu kubombela ku Manado mu North Sulawesi uko ba Theo Ratu na bena mwabo bapangile ibumba ilinono ilya bakasabankanya. Apo abantu abaleikala mu Manado baleimona ukuti bena Kristu, balicindike sana Icebo ca kwa Lesa. Kanshi balesumina ukulanshanya na ba Nte kabili balebepusha no kuti babalondolweleko ifyo Baibolo isambililsha. Ilingi line,  balelanshanya na bantu abaleba 10. Lelo nga papita fye amamineti nalimo 15, abantu balefika nalimo 50. Kabili nga papita fye iawala limo abantu balefika na 200 ica kuti baleselela na pa ncende iikulileko.

Ku kutampa kwa mwaka wa 1952, ba Albert na ba Jean Maltby balifwaile ing’anda apa kwikala bamishonari mu Surabaya ku East Java. Uyu e musumba walenga bubili pa misumba iikalamba mu Indonesia. Lyena bankashi 6 bamishonari, ba Gertrud Ott, ba Fredrika Renskers, ba Susie na ba Marian Stoove, ba Eveline Platte, na ba Mimi Harp balishile mu kubombela pamo nabo. Ba Fredrika Renskers batile: “Abantu abengi  mu Surabaya baali baShilamu kabili baali bwino sana. Apo abantu abengi balefwaisha ukusambilila icine, tacayafishe ukutendeka amasambililo ya Baibolo. Mu myaka fye itatu, mu cilonganino ca mu Surabaya mwali bakasabankanya 75.”

Ing’anda ya bamishonari mu Jakarta

Nalimo pali iyo ine inshita, umwaume umuShilamu Azis, uwa ku Padang, ku West Sumatra alilembeele aba kwi ofeshi lya musambo no kubeba ukuti alefwaya ukumwafwa ukwishiba Lesa. Uyu mwaume alisambililepo na bapainiya abena Australia mu myaka yaba 1930, lelo isambililo talyatwalilile ilyo abena Japan baleteka mu Indonesia. Bushiku bumo alisangile icitabo icapulintilwe ne Nte sha kwa Yehova. Alembele ukuti “Ilyo namwene adresi ye ofeshi lya musambo mu Jakarta mu citabo, nalitampile ukufwaisha ukusambilila na kabili.” Bwangu bwagu balitumine kangalila wa muputule Frans van Vliet ku Padang. Ilyo bafikile basangile ukuti ba Azis balyebeleko na bena mupalamano babo ba Nazar Ris ababomfi ba buteko kabili nabo bene balefwaisha ukusambilila Baibolo. Bonse babili ne ndupwa shabo balisambilile icine. Munyinefwe Azis alibombele bueluda ne cishinka. Munyinefwe Nazar Ris na o aishileba painiya waibela kabili abana bakwe abengi ni bakasabankanya ababombesha.

Ba Frans van Vliet na baice babo ba Nel

Tapapitile na nshita ba Frans balitandalile munyina uwalekele ukushimikila, uwalewamya icikuulwa umo balewamisha oilo icaonaike ilyo kwali inkondo mu Balikpapan. Ba Frans baleya nankwe mu mulimo kabili balemukoselesha ukulasambilisha abantu abengi Baibolo. Ilyo uyu munyinefwe ashilabwelelelamo ku Netherlands, alipangile ibumba ilinono ilya bakasabankanya mu Balikpapan.

Pa numa, nkanshi Titi Koetin ninshi e lyo abatishiwe fye alikuukile ku Banjarmasin, ku South Kalimantan. Nkashi Titi alishimikile ba lupwa wakwe imbila nsuma mu mushi wa Dayak kabili alyafwile abantu abengi ukusambilila icine. Bamo pali aba abasambilile icine balibwelelemo ku mishi yabo ku Kalimantan kabili bailepanga amabumba ayakulile yaba ne filonganino ifyakosa.

 Ukupulinta Impapulo mu ciIndonesian

Apo bamunyinefwe balebombesha ukubila imbila nsuma ku bantu abengi, balingile ukukwata impapulo isha mu ciIndonesian ishingi. Mu 1951, icitabo ca kuti “Lekeni Lesa Abe Uwa Cine” calipilibwilwe mu ciIndonesian lelo aba mu buteko balyalwile ifya kulemba amashiwi muli ulu lulimi kabili calengene ukuti iofeshi lya musambo lipitulukemo no kwalulako fimo fimo mu milembele muli ici citabo. * Ilyo ici citabo cafumine, abena Indonesia abengi balicitemenwe nga nshi.

Mu 1953, iofeshi lya musambo lyalipulintile amakope 250 aya Ulupungu lwa kwa Kalinda mu ciIndonesian ninshi napapita ne myaka 12 apo bapulintile Ulupungu lwa kwa Kalinda ulwa kubalilapo mu Indonesia. Pa kupanga iyi magazini iyalekwata amabula 12, balebomfya mashini iyo beta ukuti mimeograph kabili ilyo batendeke ukupulinta iyi magazini, yalekwata fye ifipande fya kusambililamo. Ilyo papitile imyaka itatu, iyi magazini yatendeke ukulakwata amabula 16 kabili akampani kamo kalepulinta amakope ya iyi magazini 10,000 pa mweshi.

Lyena mu 1957 balitendeke ukupulinta Loleni! mu ciIndonesian. Mu nshita fye iinono impendwa yalikulileko yafika na  ku makope 10,000. Apo amapepala ya kupulintapo yalicepele mu calo, aba bwananyina balingile ukukwata icipepala ca kushitilapo amapepala. Umukalamba wa buteko uwalebombela pali ici cipepala abebele ati: “Menara Pengawal (Ulupungu lwa kwa Kalinda) e magazini yawamisha muli cino calo kabili nintemwa sana ukubombela pali ici icipepala cenu.”

^ par.1 Ukutula mu 1945, ubuteko bwa Indonesia bwalyalula imilembele ya mashiwi imiku ibili pa kuti baleke ukulakonka imilembele iyo abena Netherlands babashilile.