• BAFYELWE MU 1915

  • BABATISHIWE MU 1940

  • Baali bapainiya abatwalilile ukuba abashipa lintu balebatiinya ilyo balebalubulwisha.

ILYO kwali Inkondo ya Calo Iyalenga Bubili, munyinefwe Elias no mwina mwakwe Josephine balibetile ku mukalamba wa mu buteko mu Sukabumi, ku West Java ukwali iofeshi ilikalamba ilya bakapokola ba ku Japan ilyo baleita ukuti Kempeitai. Ilyo bafikile kuli ili ofeshi, babalilepo ukulubulwisha ba André. Lyena balibepwishe ifipusho ifingi mu kukonkana pamo nga: “Bushe Inte sha kwa Yehova ni bani? Bushe mulakaana ubuteko bwa Japan? Bushe uli nengu?”

Ba André bamwaswike abati, “Tuli babomfi ba kwa Lesa wa Maka Yonse kabili tapali nangu cimo icabipa ico tucitile? Lyena uyu umukalamba wa bakapokola asomwene ulupanga ku cibumba ulo baleita ukuti samurai no kulwimya mu muulu.

“Inga nakwipaya kuti caba shani?” Ba André bakontamine pe tebulo mwi ofeshi lya uyu muntu no kupepa mu mutima. Ilyo papitile akashita, uyu mukalamba wa bashilika aponene mu nseko e lyo aeba ba André ati, “Kwena walishipa!” Pa numa, aitile ba Josephine mwi ofeshi. Ilyo ba Josephine bamwaswike  fimo fine ifyo ba André bamwaswike, apundile ati, “Fumeni apa! Tamuli nengu iyo.”

Ilyo papitile imyeshi iingi, “aba bwananyina ba bufi” balibepeshe munyinefwe André kabili balimukakile mu cifungo. (2 Kor. 11:26) Pa myeshi iingi alelya fye utwa kulya uto aletoolelesha mu cifungo. Na lyo line, alitwalilile fye ukuba ne cishinka. Ilyo ba Josephine baile mu kumona ba André, babatepeleshe abati: “Wisakama. Nampo nga bakanjipaya nelyo bakankakula, nkatwalilila fye ukuba ne cishinka kuli Yehova. Kuti cawamapo bansenda icitumbi ukucila ukupondokela Lesa.”

Pa numa ya kwikala mu cifungo pa myeshi 6 ba André balilubulwile mu cilye cikalamba ica mu Jakarta kabili balibafumishe mu cifungo.

Ilyo papitile imyaka 30, loya wa buteko uwa mu musumba wa Manado uwabela ku North Sulawesi, alitile ba André kwi ofeshi lyakwe ku kubalubulwisha. Pali iyi nshita ninshi ubuteko bwa Indonesia bwalibinda Inte sha kwa Yehova muli ici calo. Uyu loya aipwishe ba André ati, “Bushe nawishiba ukuti ubuteko bwalibinda Inte sha kwa Yehova na kabili?”

Ba André bamwaswike abati, “Ee nalishiba.”

Lyena abepwishe ati, “Bushe nauipekanya ukuleka ukuba Inte ya kwa Yehova?”

Ba André balikape nga nshi balayuma na pa cifuba pa kumwasuka abati, “Nga ulefwaya kuti wafumyamo umutima, lelo te kuti undeshe ukuba Inte.”

Pa numa, uyu loya alilekele ba André baya kabili tabacushishepo na kabili.

Ba André bafwile mu 2000 ninshi bali ne myaka 85. Balibombeshe bupainiya pa myaka 60.