Linda: Ilyo nali ne myaka 12, bamayo balinjebele ukuti nalikwata umwaice wandi umwanakashi uo baseekeshe kumbi. Naletontonkanyapo nati, bushe na o ni nkomamatwi nga ine? Lelo nakulile fye ukwabula ukumwishiba.

Sally: Nshaishibe ukuti abafyashi bandi balinsekeeshe. Abo nalemona ukuti ni bamayo balenguma sana kabili balensunga kwati musha, kanshi nakulile fye uwa nkumba bulili kabili uwa bulanda, apo nali nkomamatwi aya mafya yalengele ndeba sana no bulanda. Nalitampile ukusambilila Baibolo ne Nte sha kwa Yehova. Ilyo fye bamayo baishibe, balimfopawile ku mushipi kabili balifumishe amaloko ya ku fiibi no kubikako yambi, lyonse balenkomena mu ng’anda. Lintu nali ne myaka 20 nalibutwike pa ng’anda, lelo ba Nte balinsendele batendeka ukulansunga. Ku kutampa kwa mwaka wa 2012, nalibatishiwe.

 Linda: Ilyo nali ne myaka 20 nalitendeke ukusambilila Baibolo ne Nte sha kwa Yehova. Mu kupita kwa nshita, nalitampile ukulaya mu kulongana kwa citungu uko balepilibwila bankomamatwi mu Jakarta. Pa kulongana nalikumene na bankomamatwi abengi ukubikako fye na Sally, Nte umukashana uwaleikala ku North Sumatra. Ala twalelanshanya fye kwati ni kale twaishibana lelo nshaishibe icalengele tuleumfwana bwino.

Sally: Ine na Linda twaishileba ifibusa. Kwena nalimwene ukuti ukupalana natupalana, nomba nshabikileko sana amano.

Linda: Mu August 2012, ninshi kwashala fye ubushiku bumo ukuti mbatishiwe, natampile ukutontonkanya sana pa mwaice wandi umwanakashi uo abafyashi bandi baseekeshe. Napapete Yehova nati, “Ngafweni ukusanga umwaice wandi pantu ndefwaya ukumwebako pali imwe.” Ni mu kanwa nkokwele, bamayo bapokelele utufyebo pali lamya utwabula no kwenekela ku muntu uwaishibe ukwali umwaice wandi uo baseekeshe. Apa pene e patendekele ukulondoshanya na Sally.

Sally: Ilyo Linda anjebele ukuti e wali nkashi inandi uo abafyashi bandi baseekeshe kale, ilyo line fye nalininine indeke ukuya mu ku mumona ku Jakarta. Ilyo nafumine mu cikuulwa umufikila abantu pa cibansa ca ndeke, namwene Linda na bafyashi bandi no mukalamba wandi na umbi umwanakashi nabesa mu kunkonkela. Ala nalitemenwe sana. Bonse twalikumbatene lelo bamayo e bakumbatile sana ukucila bonse. Bonse twalelila fye. Ilyo abafyashi bandi bonse babili balombele ubwelelo pa fyo banseekeshe, e lyo bonse twacililemo ukulila no kukumbatana.

Linda: Pa mulandu wa kuti tatwakulile pamo, twali no kusambilila ukwishibana inkulilo ne mibele. Na lyo line, twalitemwana nga nshi.

Sally: Pali ino nshita ine na Linda twikala pamo kabili tulongana mu cilonganino cimo ica bankomamatwi ica mu Jakarta.

Linda: Ine na Sally tatwaishibene pa myaka ukucila pali 20. Ala tulatootela Yehova pantu twalisukile twalondoshanya!