Bamishonari Abapwishishe Amasambililo ya Gileadi Bafika

Cali ni mu June 1947, e lintu bamishonari batatu, ba Charles Fitzpatrick, ba George Richardson, na ba Hubert Gresham abapwishishe amasambililo ya ku Isukulu lya Gileadi bafikile mu Freetown. Aba bamunyinefwe e bamishonari babalilepo ukufika.

Bamishonari balimwene ukuti bamunyinefwe mu Freetown balefwaya sana ukulashimikila nomba tabaishibe ifya kubomba bwino umulimo (Mat. 28:20) E ico batendeke ukubasambilisha ifya kucita ifipempu fya kubwelelamo ne fya kutungulula amasambililo ya Baibolo. Na kabili, balibapeele ubutungulushi bupya ubwafumine ku maofeshi yakalamba pa fya kutungulula ukulongana ne fya kubomba imilimo imbi mu kuteyanya. Balitantike ukuti kube ukulongana kwa cintubwingi mu cikuulwa ca Wilberforce Memorial Hall. Bamishonari balitemenwe nga nshi pa kumona abantu 450 baisa ku kulongana! Pa numa bamishonari batantike ukuti kube ubushiku bwa kushalika magazini cila mulungu. Uku kutantika kwalikoseleshe no kukansha aba mu cilonganino ukulabomba bwino ilyo umulimo wasandulwike.

Bamishonari imikalile yalibafishe pa mulandu wa miceele. Lipoti ya ku musambo iya mu 1948 yatile: “Imiceele mu Sierra Leone yalyafya sana. Imfula iloka pa myeshi 6 mu mwaka, e lyo ilaloka sana, iya mabwe, kabili taikalika bwangu. Inshita shimo kulaba umufumbi pa milungu ibili. Mu lusuba, namo kulakaba sana.” Aba ku Bulaya ababalilepo ukuyatandala ku Sierra Leone batile abasungu te kuti bakokole muli ici calo. Mwaliba sana maleria, yellow fever, e lyo  na malwele yambi. Bamishonari balelwala fye umo umo basuka batampa ukulabwelelamo.

Bakasabankanya ba muli ulya musumba balisakamene pa fyalecitika. Nomba tabanenwike. Pa kati ka 1947 na 1952, bakasabankanya balifulileko ukufuma pali 38 ukufika kuli 73. Bapainiya balibombeshe ica kuti balyafwilisheko ukupanga icilonganino mu Waterloo, itauni lyapalamina ku Freetown. Amabumba iyapya aya cilonganino yalipangilwe mu Kissy na mu Wellington, yonse yali ku nse ya musumba wa Freetown. Calimoneke ukuti umulimo mu Sierra Leone wali no kukula. Icalefwaikwa fye kukoselesha bakasabankanya.

Balibakoseleshe Ilyo Babatandalile

Mu November mu 1952, ilyo ba Milton G. Henschel bali mu myaka ya kubangilila iya ba 30, balitandalile umusumba wa Freetown. Ilyo bafikile pa cabu, ba Henschel abafumine ku maofeshi yakalamba aya Nte sha kwa Yehova batile: “Ala nalipapile sana ukumona umusumba uwa busaka nga nshi ukucila imisumba imbi iya mu fyalo ifingi. . . . Imisebo iisuma, amashitolo umwaleisula sana abantu, imyotoka ishipya, e lyo na bantu abengi.”

Munyinefwe Henschel aile pa ng’anda apaleikala bamishonari mu Freetown, iyi ng’anda yali fye amayanda yabili ukufuma pa muti walumbuka uumoneka ngo museshi. Ilyo afikile aebele abalongene ati muno mu Sierra Leone muli no kupokelela aba kumwafwa abengi. Ubushiku bwakonkelepo pa Mulungu, abantu 253 e balongene mu Wilberforce Memorial Hall ku kukutika ku fya kubilisha ifisuma sana. Ba Henschel baebele abalongene ukuti mu Sierra Leone mwali no kuba umusambo, baali no kukwata kangalila wa muputule, baali no kukwata ukulongana kwa muputule, ne cilonganino icipya caali no kapangwa mu Kissy e lyo no mulimo wa kushimikila na o wali no kukulilako sana. Abantu balitemenwe nga nshi!

 Na kabili ba Henschel batile: “Abantu batwalilile ukulanda abati kusheh, icalola mu kuti ‘mwabomba!’ Balisansamwike sana. Abantu bafumine muli cilya cikulwa ninshi napafiita, . . . bamo baleimba ne nyimbo.”

Mishonari umupya, William Nushy, alisontelwe ukuba kangalila wa musambo. Kale ba William balesangila ubwikalo mu kuteya injuka ne fyangalo fya kushitikapo mu fikuulwa mu calo ca America. Ilyo basambilile icine, balilekele iyi ncito no kulakonka sana amafunde ya kwa Lesa, ukucita ifi e kwali no kulenga ukuti bakasabankanya mu Sierra Leone babacindike no kuleka babatemwe.