• IFYALO 49

  • IMPENDWA YA BANTU 4,464,374,770

  • BAKASABANKANYA 728,989

  • AMASAMBILILO YA BAIBOLO 771,272

Umuntu umo Alengele Abengi Basambilila Icine

Ilyo ba Jonathan abekala ku Philippines, balelolela shing’anga ukubamona, ba Laila ababombela apa kupokelela abantu, balimwene ukuti ba Jonathan balifwele bwino. E ico balibepwishe nga ca kuti bafumine ku kampani ka inshuwalansi. Ba Jonathan balandile ukuti ni Nte ya kwa Yehova kabili baile mu kwafwilisha Nte munabo  uwalekabila ubwafwilisho. Ba Laila balitemenwe sana ifyo babebele e ico baebele ba Jonathan ukuti bawishi abafwile fye nomba line balitemenwe ukubelenga Ulupungu lwa kwa Kalinda. Ba Jonathan balibabelengele Yohane 5:28, 29 no kubapeela trakiti itila Lisubilo Nshi Ilya Batemwikwa Besu Abafwa?

Philippines: Ba Jonathan baleshimikila ku banakashi ababomba apo bapokelela abeni

Lyonse ba Jonathan nga baya ku cipatala, baletwalilako ba Laila impapulo kabili balibatwele na kuli nkashi uwatendeke ukubasambilisha Baibolo. Mu kuya kwa nshita abalume  ba ba Laila, bankashi inabo na banyina balitendeke ukusambilila Baibolo.

Ba Rose abekala mupepi na ba Laila balipwishe ba Laila icalengele balekwata sana abeni pa ng’anda. Ba Laila balandile ukuti balesambilila Baibolo ne Nte sha kwa Yehova. Ici calengele ba Rose nabo batendeke ukusambilila Baibolo, kabili ilyo baile mu kutandalila ba nkashi inabo ba Abigail, balibashimikileko ifyo balesambilila. Ba Abigail balefwaisha ukwishiba ifingi pa fyo babashimikile e ico balitendeke ukusambilila Baibolo. Banyina ba ba Rose nabo balitendeke ukusambilila Baibolo.

Ba Laila balibatishiwa pa kulongana kwa citungu ukwaliko nomba line. Banyina nabo balibatishiwa. Abena mupalamano babo ba Rose, e lyo na bankashi inabo babatishiwe uyu mwaka wapwile. Banyina ba ba Rose pali ino nshita balalongana lyonse. Na kabili, bambi pali balupwa lwa ba Laila balitwalilila ukusambilila Baibolo. Icalengele bonse aba basambilile icine ni pa mulandu wa muntu umo uo munyinefwe ashimikile ilyo aile ku cipatala.

Ukubomfya Ifya Kupangapanga pa Kushimikila Kuli Bankomamatwi

Bankomamatwi abalesambilila icine mu Sri Lanka balefulilako. Mu 2015, ama adresi ya bankomamatwi ayo ba Nte bakwete mu Sri Lanka tayafikile na 80 kabili bayalembele fye pa cipepala. Ukutula mu 2015, icilonganino ca bankomamatwi mu Sri Lanka calipangwa kabili balipanga programu ya pa kompyuta umo balemba amashina ya bankomamatwi 420 e lyo ne filembo fya pa Intaneti ifibafwa ukwishiba amayanda apo bekala. Bamunyinefwe balitandalilapo abengi pali aba bankomamatwi nelyo ukulanshanya nabo ukubomfya amavidio nelyo amameseji. Bamishonari  abaupana balandile ukuti: “Pali ino nshita kuti twapeela bamunyinefwe bankomamatwi umwakulabombela nangu ca kuti pa kubala baleshimikila ku bantu abo baishibe fye kale.”

Umulashi wa Buteko Atasha

Bamunyinefwe mu Mongolia balabombako umulimo wa kushimikila ku cintubwingi nangu nakutalala sana. Umulashi wa buteko umo alisendeleko ulupapulo lumo pali ka standi ka mawilo kabili pa numa alilembele kalata ya kutasha. Atile: “Ndi muBuddha. Nomba nalifwailisha pa mipepele iingi pantu naishiba ukuti tatufwile ukulakonka fye inshila imo lelo tufwile ukwishiba inshila ishingi. Pa numa ya kubelenga impapulo ishimo isho mwalemba, nalemba ino kalata ku kumutasha. Nalimona ukuti mulabombesha sana kabili mulabomfya inshita iikalamba pa kupekanya ifi ifyebo ifyatwafwa icine cine. Cimo ico nasambilila mu mpapulo shenu ca kutila Baibolo citabo ico umuntu onse alingile ukubelenga. Muli ici icitabo e mwaba icine. Ifyaba muli Baibolo filatwafwa mu bumi. Ndetasha bonse ababombesha ukupilibwila impapulo mu ciMongolian. Na kabili ndetasha na bonse abapeela abantu impapulo nangu ca kuti na kutatalala sana nelyo nakukaba sana.”

Mongolia: Baleshimikila ku cintubwingi ninshi nakutalala

Lesa Alyaswike Ipepo Lyabo

Ba Brett bapainiya abekala ku Hong Kong, baliile ku baume abali ne myaka mupepi na 30 no kubapeela trakiti itila Cinshi Cingalenga Ulupwa Luleba ne Nsansa? Ilyo aba abaume bamwene trakiti, balitendeke ukulila. Balandile ukuti bakuliile mu lupwa lwa ba Nte nomba ilyo baali ne myaka 16, balibutwike pa ng’anda. Pa myaka yakonkelepo 5, baleikala mu misebo kabili balikunkwime mu kubomfya imiti ikola bubi bubi mpaka ilyo batendeke ukubafwa ku kabungwe akafwilisha abantu.

 Balandile no kuti ulucelo ilyo bashilakumanya munyinefwe balipepele ukuti, “Nga ca kuti uko nalepepa ilyo nali umwaice e cilonganino ca cine, nangeni icishibilo lelo.” Kanshi balimwene ukuti Lesa alyaswike ipepo lyabo. Munyinefwe alisendele aba abaume umo bashitisha kofi kabili balilanshenye ifyebo fyaba muli broshuwa itila Bweleleni Kuli Yehova. Apo balya baume balingile ukubwelela ku France, cilya cungulo, balipeeleshenye ama adresi. Ilyo papitile inshita, balya abaume balilembeele ba Brett ukuti: “Munyinane, Yehova alyasuka amapepo yandi. Pa Mulungu nkaya ku Ng’anda ya Bufumu iyaba mupepi.” Ilyo bali ku France balilanshanye na ba Nte kabili balitendeke ukusambilila Baibolo e lyo no kulongana.