Tinikeni pa kuti muye ku filimo

Tinikeni pa kuti mumone imitwe iilimo

Germany: Baleshimikila ku cintubwingi na kastandi ka mawilo mupepi ne nkambi ya mbutushi

 IFYACITIKE UMWAKA WAPWILE

Amalyashi—Ifilecitika mu Fyalo Fimo

Amalyashi—Ifilecitika mu Fyalo Fimo

Ukushimikila ku Mbutushi na ku Bafuma ku Fyalo Fimbi

Pa mulandu wa mbutushi na bantu abafuma ku fyalo fimbi, abantu mu Germany abalanda indimi sha bafuma ku fyalo fimbi nabafula sana. Nomba line fye mu myeshi 9 iyapitapo, balipanga amabumba 229 ayabomfya indimi sha ku fyalo fimbi e lyo no tumabumba utunono. Nalimo bakasabankanya 800 balasangwa ku masukulu 30 ayo bapanga umo basambilila indimi 13.

Bamunyinefwe balashimikila ku mbutushi pa fifulo apafikila abeni. Bamunyinefwe balipeela abantu impapulo  nalimo 640,000 ilyo bashimikila ukubomfya utumastandi twa mawilo mu fifulo ukucila pali 200.

Ibumba Litungulula lyalisuminishe ukuti kube kampeni yaibela ukutendekela mu May ukufika mu July mu 2016. Bakasabankanya nalimo 700 abalanda iciArabic abafumine mu fyalo 7 baliile mu kubila imbila nsuma ku balanda iciArabic abekala mu ncende 10 ishaba mu Austria na mu Germany.

Baletoola Amakobili mu Musebo

Bakasabankanya 50 ababa mu cilonganino ca Faber’s Road Kriol mu Belize ilingi bashimikila pa makasa mu cifulo babombela. Bamunyina abengi bapiina, nomba balafwaisha ukulanga bukapekape. Papita fye imyaka iinono ukutula apo bamunyinefwe batendekele ukutoola amakobili ayo balesanga mu misebo umwaba sana ulukungu nga baleshimikila ku ng’anda ne ng’anda. Ukutula fye apo batendekela ukutoola amakobili, pa mpela ya cila mwaka balayasamfya, ukuyakanya no kuyapenda.

Nangu ca kuti amakobili te ndalama sha maka sana, amakobili batoola cila mwaka yalingana fye na madola ya ku America 225 (K2,475). Bamunyina balabomfyapo indalama shimo ku kulipila ku fya kubomfya pa Ng’anda ya Bufumu, e lyo shimbi balashituma ku kwafwilisha umulimo wa mwi sonde lyonse.

Abantu 4 Milioni E Bakutikeko

Icintu icacindama ico abena Burundi bashakalabe cacitike pa 5 March mu 2016, ilyo umwiminishi wa maofeshi yakalamba munyina Anthony Griffin atandalile umusambo. Ifilonganino fyonse fyalikutikeko kuli uku kulongana uko basabankenye ukubomfya umulabasa ukulamba muli ici calo. Abakutikeko kuli uku kulongana bali nalimo 4 milioni.

 Ukusabankanya uku ukulongana pa mulabasa kwalilengele abantu abengi baumfwa imbila nsuma, kabili abantu abengi baletasha. Uubomba ku mulabasa umo uwalebafwilishako ukusabankanya atile: “Mufwile ukulakwatako uku kulongana lyonse!” Na kabili, umbi uubomba kuli uyu mulabasa atile: “Ndemukoselesha ukutwalilila ukulakwata uku kulongana ukukalenga abantu abengi ukupusuka.” Banamutekenya ba mabasi na mataxi balekutika kuli iyi programu pa filimba fyabo.

Inyimbo Shalilekele Ukulila

Ilyo kwashele ubushiku bumo ukuti bamunyinefwe aba mwi bumba ilinono mu Nepal bakwate Icibukisho mu 2016, balisakamene sana ilyo baishibe ukuti pa sukulu lyali mupepi ne cikuulwa basonkeele umo bali no kukwatila Icibukisho, pali no kuba iciila apo bali no kulalisha sana icilimba.

Ilingi abantu nga nabakwata iciila kulaba sana icongo. Ilyo bamunyinefwe balewamya umo bali no kukwatila Icibukisho, uwalepekanya iciila abebele ukuti: “Tamwakulaumfwa ifili fyonse, mukalaumfwa fye inyimbo shesu.”

Iciila calitendeke akasuba kabili pali sana icongo nga filya fine baebele bamunyinefwe. Nangu ca kuti icilimba bamunyinefwe bakwete calelila sana ukucila ico balebomfya pa ciila, tabaleumfwa ifili fyonse ilyo baleesha ifisoselo. Bamunyinefwe balisakamene pa fyo bali no kulongana lelo balipepele sana. Lyena, ilyo kwashele amamineti 30 ukuti batendeke ukulongana ninshi na bamunyinefwe abengi nabatendeka kale ukufika, inyimbo balelisha pa ciila shalilekele ukulila ukwabula ukwenekela. Abali pa ciila abalenwa ubwalwa balitendeke ukulwa kabili bakapokola balishile no kuputukisha iciila. Bamunyinefwe balilongene bwino sana Icibukisho ninshi kuli na tondolo kabili takwali icili conse ica kubapumfyanya.

 Balitashishe Pali Webusaiti ya jw.org

Ba Giuseppe ni bapainiya ku Italy. Babomba ku kampani akafwilisha abantu pa fya Intaneti lelo babombela pa ng’anda pa mwabo. Mu May mu 2016, balikwete ukukumana na bo babomba nabo 70 pa kuti balanshenye pa fyo bali no kulabomba bwino pa kampani. Umukalamba wa pa kampani abalilepo ukubeba ukuti bamoneko pa mawebusaiti yamo pa kuti bakopeko ifyo bengacita pa kuti akampani kalebomba bwino. Lyena alibalangileko webusaiti imo. Ba Giuseppe balipapile sana ilyo bamwene ukuti ni webusaiti ya jw.org balebalanga. Umukalamba wa pa kampani atile, “Iyi webusaiti yalicila amawebusaiti yonse mu calo!” Lyena atendeke ukulanda pa fyo webusaiti ya jw.org ibomba. Alilandile ifisuma pali webusaiti, pa fyo yayanguka ukuyapo na pa fikope ifisuma ifibapo.

 Ba Giuseppe batile: “Abanandi balipapile sana ukumona indimi ubwingi ishaba pa webusaiti. Ilyo twapwile ukukumana, uwangalila incito momba aebele abali pa kukumana no mukalamba wa pa kampani ukuti, ‘Giuseppe ni Nte ya kwa Yehova.’ Umukalamba wa pa kampani anjebele ukuti: ‘Uko upepa kusuma sana. Mwalipanga webusaiti iyo akampani nelyo akabungwe akali konse kengatemwa ukukwata. Mufwile mulabombesha sana pa kuti mubikepo ifipya kabili mufwile mulabikako sana amano pa kuti pabe fyonse ifilingile ukubapo.’ Nalyumfwile insoni pa fyo balentasha kwati nine napangile webusaiti. Nomba nalitemenwe sana pantu calilengele abengi baishibako fimo pa Nte sha kwa Yehova. Pali ino nshita, ndalanshanya na bo momba nabo kabili nalitendeka no kusambilisha batatu Baibolo.” Aba pa kampani kabombako ba Giuseppe balitwalilila “ukusambilila” na fimbi pali webusaiti ya jw.org kabili ba Giuseppe balitwalilila ukulanshanya na abo babomba nabo Baibolo.

Taileko mu Kuteya Umupila

Argentina: Jorge aleteya umupila na bamunyinefwe

Jorge musepela kabili ekala ku Argentina. Jorge aumfwilepo imbila nsuma pa muku wa kubalilapo ku mwana we sukulu munankwe ku kutendeka kwa mwaka wa 2010. Lyena atendeke ukusambilila Baibolo mu citabo citila Bushe Cinshi Baibolo Isambilisha? Pali iyi nshita ninshi alateya no mupila. Aleteya bwino sana kabili balimusalile ukulateya mwi bumba ilikalamba ilya bakateya ba mupila. Mu April mu 2014, alipokelele ishuko ilisuma nga nshi ilya kuya mu kuteya mwi bumba ilikalamba ilya bakateya ba mupila ku Germany. Alitemenwe ukuti ali no kuba kateya wa mupila uwalumbuka sana kabili alisumine ukuya. Ilyo kwashele inshiku ishinono ukuti Jorge aye ku Germany, uwalemukansha ukuteya umupila amwebele ukuti: “Uli Nte ya kwa Yehova. Nga waya ku calo cimbi kuti wayaonaika. Na ine ilyo nali  umwaice, nali Inte ya kwa Yehova. Balinjebele ukuya mu kuteya umupila ku calo cimo ica ku Asia. Bandaile ukumpeela ifintu ifingi kabili e fyo naletontonkanyapo fye lyonse. Naliile pamo no lupwa lwandi lelo ifyo twaleenekela, te fyacitike kanshi twalibwelele.” Jorge atile: “Ifyo balandile fyalimfikile sana pa mutima kabili napingwilepo ukukanaya ku Germany. Mu 2015, nali kasabankanya kabili nalibatishiwe.”

Ipaalo Ilyabula Ukulipilapo Nangu Kamo

Mu September mu 2015, kwali ukulongana kwa Citungu mu Kampala ku Uganda ukwaleti “Mulepashanya Yesu!” Abasangilwe pali uku kulongana balitemenwe sana ilyo munyina Mark Sanderson uwa mwi Bumba Litungulula afumishe Baibolo—Amalembo ya Calo Cipya mu ciLuganda.

Umo uusambilila Baibolo atile: “Nalitemenwe sana ilyo napokelele iyi Baibolo iisuma sana! Pali iyi nshita ninshi abantu balelolela papa uwali no kutandala. Pa kuti bakwate indalama sha kubomfya, baleshitisha amakolona ‘ayapaalwa’ pa madola ya ku America 30 (K300). Abantu balefwaya ukubapaala, lelo abengi tabakwete indalama. Nomba ine napokelele ipaalo ilyabula ukulipilapo nangu kamo. Yehova apaalile bonse abaishile pa kulongana kwa Citungu ilyo bapokelele Baibolo kabili cashalile kuli cila muntu ukupeela ubupe ubwa kufuma pa nshi ya mutima. Cila bushiku nga ndebelenga Icebo ca kwa Yehova mu lulimi lwandi no kumwishiba bwino bwino, ndatemwa icine cine. Ndatasha sana Yehova pa kumpeela Baibolo.”

Bapulintila Impapulo Shabo ku Cifulo ca Mipashi

Pa kuti abantu baleke ukubomfya webusaiti ya www.jw.org, bashimapepo ba mu macalici yamo ku Congo (Kinshasa) balesambilisha abantu babo ukuti Inte sha kwa Yehova bapulintila impapulo shabo ku cifulo ca mipashi. Pa  kuti balenge abantu bomfwile ifyo balelanda, babebele ukuti ifilembo fya “www” fimininako inambala ya 666 iyaba mwi buuku lya Ukusokolola. (Ukus. 13:18) Ici calengele bamo abalesambilila Baibolo ukuleka ukusambilila.

Pa numa ya kupepelapo pa fyacitike, abaupana bapainiya balitile abasambi babo aba Baibolo na bena mwabo ku ng’anda ku mwabo. Indupwa shitatu baliile kabili pa numa ya kulya ica kulya, ba Nte abaupana balibatambisheko vidio itila Inte sha kwa Yehova—Balashimikila Imbila Nsuma mwi Sonde Lyonse. Ifyo abeni batambile muli vidio fyalilengele baishiba uko impapulo shesu shifuma. Umulungu wakonkelepo, ilyo bapainiya balesambilisha bamo pali balya abasambi abatambile vidio, abalume babo nangu ca kuti tabalesambilila Baibolo balifumishe amadola ya ku America 100 (K1,000) no kweba bapainiya ukuti bayesangwilako ku mulimo wa mwi sonde lyonse.

Ukusambilila Inyimbo Ishipya

Nangu ca kuti bamunyinefwe abekala ku ncende imo iyabela ukutali mu Papua New Guinea tabakwata Intaneti, balafwaisha ukusambilila inyimbo sha Bufumu ishipya. Kanshi aba mu cilonganino ca Mundip balatuma munyina kwi tauni ilyabela mupepi apa kwenda amaawala yabili na maawala na yambi yabili aya kwenda na basi. Nga afika apali Intaneti, alalemba inyimbo ishipya mwi buuku no kubwelelamo ku ng’anda kabili alalemba inyimbo pa cipampa mu Ng’anda ya Bufumu pa kuti bonse baleshimona. Lyena aba mu cilonganino balakopolola ishi inyimbo pa kuti baleshibomfya pa kulongana. Balatemwa sana ukwimbila pamo ne filonganino fimbi mwi sonde lyonse pantu ukwimba lubali lwa kupepa Yehova.