Bamunyinefwe tabaletiina kabili balitwalilile ukulalongana pamo. Baeluda balibombeshe ukucingilila bakasabankanya. Munyinefwe André Carbonneau uwali ni loya uwafumine ku Canada kabili uwalelandilako aba bwananyina muli ilya myaka atile: “Munyinefwe aleba mupepi na apo twalelonganina ninshi nakwata foni. Nga amona ibumba lya bantu abaleisa mu kubasansa, aleishibisha baeluda bwangu bwangu.”

Abantu ku mufulo fye balyocele ing’anda ya lupwa lwa ba Shamoya (ku kuso) na umo balesungila impapulo (ku kulyo)

Abeminishi babili aba ku musambo baletandalila bamunyinefwe ku kubakoselesha nga ca kuti babasansa. Ba André atile: “Calewama sana abeminishi ba musambo nga baisa no kusanga bamunyinefwe abengi bali ne nsansa pa cifulo apo balelonganina.”

Bamunyinefwe balebacusha na mu cilye mwine

Abo bashalesansa kumo fye na masambililo ya Baibolo nabo bene bali abashipa. Ba André balebukisha ifyabebele umwanakashi uwali fye mupepi no kuba kasabankanya  uushabatishiwa. Abebele ukuti: “Ilyo natambile pa mulabasa ifyo balesansa ba Nte, nalimwene ubupusano bwaba pa Bena Kristu ba cine na ba bufi, kabili ndefwaya ukuba Umwina Kristu wa cine.”

Balishipile pa Kulandilako Abena Kristu Banabo

Muli ilya myaka ilyo ifintu fyayafishe sana, bakasabankanya balilangile ifyo bashipile ne fyo bali ne citetekelo ilyo batwalilile ukuba abacincila mu mulimo wa kubila imbila nsuma. Na balelandilako aba bwananyina mu cilye nabo bene balilangile ukuti bali ne citetekelo.

 Pa malyashi balelanda pa mulabasa, abantu balelanda ifya bufi pali ba Nte. Baletila balalenga indupwa ukukanaikatana, balakaana ukundapwa mu fipatala, kabili balacita ifintu ifipusene na mafunde ya buteko. Ba loya abalelandilako ba Nte bali no kuyonawila amashina nalimo ne ncito yabo nga yalipwile.

Bamunyinefwe ababombela pa musambo wa United States ku Dipartimenti Iilolekesha pa Milandu balishipile pa kulandilako Abena Kristu banabo mu cilye

Ba John Burns, ba loya abafumine ku musambo wa ku Canada abalelandilako bamunyina ba ku Georgia muli ilya myaka, batile: “Bamunyina na bankashi abalebomba umulimo wa buloya baleitemenwa ukwafwa aba bwananyina. Nangu ca kuti bamo incito shali no kupwa, tabaletiina  ukuya mu cilye no kuilondolola ukuti ni Nte sha kwa Yehova.” Aba ba Nte bali abashipa “mu kucingilila no kukosha imbila nsuma ukulingana ne funde.”—Fil. 1:7.

Abena Georgia Tabalefwaya Ubunkalwe Bwali mu Calo

Ba Nte balitwalilile ukubacusha ku bantu abankalwe. E ico, ukutendekela pa 8 January mu 2001, ba Nte balembeele ku cilye pa kuti bengabacingilila ku balebasansa no kwikata abantu bonse abalecena abekala calo aba kaele.

Munyinefwe Burns alondolwele icalengele balembeele ku cilye atile: “Icikalamba sana ico twalefwaya kulanga ukuti Abena Georgia abengi tabatemenwe filya ba Nte balebasansa ku bantu abankalwe kabili nabalengele sana ukuti balebasansa kalibumba akanono akamipepele akapatile ba Nte.”

Mu milungu ibili, abakalamba 133,375 ukufuma mu ncende shonse isha mu Georgia apali abengi abalepepa ku  calici ca Orthodox balisuminisheko ku fyo ba Nte balembeele icilye. Nangu ca kuti batwele ifyo balembele kuli Kateka Shevardnadze, ubunkalwe tabwapwile. Aba mu mipepele abapatile ba Nte balitwalilile ukubacusha.

Abena Georgia abengi balisaine no kusuminishako ku fyo ba Nte balembeele icilye pa kuti baleke ukubacusha

Yehova alitwalilile ukupaala abantu bakwe. Nangu ca kuti aba mu calici ca Orthodox abapatile ba Nte balikoselepo ukucusha abantu ba kwa Lesa, Yehova Lesa aleyafwa abantu ukufuma mu kupepa kwa bufi.

Balifumine mu Kupepa kwa Bufi

Ba Babilina Kharatishvili, balitemenwe sana icalici ca mu Georgia ica Orthodox uko balepepa. Ilyo bali mu myaka ya ba 30, baleya mu matauni na mu mishi mu kusambilisha abantu pa batakatifu.

Nomba ba Babilina balefwaya ukwishibilapo na fimbi pali Lesa. Kanshi bapingwilepo ukulasangwa ku masambililo mu calici ca Orthodox. Bushiku bumo, shimapepo alangile bonse mu calici icitabo citila Ukwishiba Uko Kutungulula ku Mweo wa Muyayaya kabili abakoseleshe ukupokako ici citabo ku Nte sha kwa Yehova. Abebele no kuti: “Muli ici citabo kuti mwasambililamo ifingi pali Baibolo.”

Ba Babilina calibapapwishe sana. Lyonse balesengauka ba Nte, nomba shimapepo alibakoseleshe ukulabelenga ifitabo fya ba Nte. Bayipwishe ukuti, ‘Nga ca kuti mfwile ukusambilila pali Lesa ku Nte sha kwa Yehova, finshi ndecita kuno?’ Tapakokwele balilandile na ba Nte ba mu musumba wa Poti kabili balitendeke ukusambilila Baibolo.

Ilyo ba Babilina basambilile ifingi ukufuma mu Baibolo, balyalwile sana ubumi bwabo. Batile: “Ilyo nasambilile ukuti Baibolo taisuminisha ukupepa utulubi, nalilekele ukubomfya utulubi pa kupepa. Nalishininkishe ukuti nalicitile fye bwino ukuleka ukupepa utulubi.” Pali iyi nshita  ninshi bali ne myaka ukucila pali 70, bapingwilepo ukuba Inte ya kwa Yehova.

Ba Babilina baleebako Izabela umwishikulu wabo umukashana ifyo balesambilila mu Baibolo

Ku ca bulanda mu 2001, ba Babilina balilwele kabili balifwile ninshi tabalabatishiwa no kubatishiwa. Lelo umwishikulu wabo umukashana Izabela alibatishiwe ilyo papitile fye inshita iinono kabili alitwalilila ukubombela Yehova ne cishinka.

Balefwaya Ukuba ba Sista

Ba Eliso Dzidzishvili bali ne myaka 28 ilyo bapingwilepo ukuti balefwaya ukuba ba sista. Apo mwi tauni baleikala ilya Tkibuli tamwali icifulo apa kwikala amasista, bakukiile ku Tbilisi mu 2001. Ilyo balefwaya incende apa kwikala pa cifulo apaleikala amasista, balitendeke ukubombako bukafundisha pa nshiku shimo mu mulungu. Umo pa abo balesambilisha ali mwana wa kwa nkashi Nunu.

Ba Eliso batile: “Ilingi line twalelanda pali Baibolo na ba Nunu. Nalikoselepo sana ukulalandilako icalici ca Orthodox  ukuti caliba fye bwino kabili ba Nunu balitemenwe sana ukumbelengela amalembo. Bushiku bumo baishile na broshuwa itila Cinshi Cintu Lesa Afwaya Kuli Ifwe? Ilyo twalebelenga amaparagrafu na malembo ayalimo, naishileishiba ukuti ukupepa utulubi kutoba ifunde lya kwa Lesa ililanda ukuti tatufwile ukupepa utulubi.”

Lyena, ba Eliso baile ku calici cali mu mushi baleikala kabili bailepusha shimapepo ifipusho. Ifyo shimapepo aleyasuka fyalangile fye ukuti ifyo balesambilisha muli ici calici tafyalefuma mu Baibolo. (Marko 7:7, 8) Ilyo bashininkishe ukuti ba Nte balasambilisha icine, balitendeke ukusambilila Baibolo ne Nte sha kwa Yehova kabili tapakokwele balibatishiwe.

Ba Eliso Dzidzishvili (ku kuso), abalefwaya ukuba ba sista na ba Nunu Kopaliani (ku kulyo)

Balekuula Amayanda ya Bufumu Nangu ca Kuti Kwali Abalebakaanya

Ilyo umwaka wa 2001 walefika, kwali ifilonganino ifingi ifyalekabila ififulo ifisuma apa kupepela. Ukulingana ne  fyo basangile, Amayanda ya Bufumu nalimo 70 e yalekabilwa. Nangu ca kuti kwali abalebakaanya muli ici calo, balitendeke umulimo wa kukuula Amayanda ya Bufumu.—Esra 3:3.

Tapakokwele aba mu makuule balitendeke ukukuula cipya cipya icikuulwa ico ifilonganino ifingi mu Tbilisi fyalelonganinamo. Balitendeke umulimo wa kukuula na umbi ku masamba ya Georgia mu Tbilisi na mu Chiatura.

Ing’anda ya Bufumu iya kale mu Tbilisi (ku kuso) ne ipya (ku kulyo)

Munyina Tamazi Khutsishvili uwabombeleko mu mulimo wali ku Chiatura, atile: “Twali 15 fwe balebomba cila bushiku pa cifulo twalekuula. Tapakokwele bonse mu tauni balishibe ukuti twalekuula Ing’anda ya Bufumu iipya. Limo twaleumfwa amalyashi ya kuti kwali abalefwaya ukwisaonaula Ing’anda ya Bufumu.”

Bushe bali no kutwalilila shani ukukuula nangu ca kuti kwali abalebakaanya? Ba Tamazi batile: “Twalitwalilile ukubomba umulimo wesu kabili mu myeshi itatu twalipwishishe  ukukuula Ing’anda ya Bufumu. Nangu twali no mwenso, abakutukaanya tabaishile no kwisa.” *

Balilekele Ukubacusha

Aba mwi bumba lya calici ca Orthodox abalesansa ba Nte ne ntungulushi yabo Vasili Mkalavishvili abo bakakile

Mu October mu 2003, balitendeke umulimo wa makuule mu musumba wa Samtredia. Na kabili abamipepele abapatile ba Nte balitendeke ukutiinya bamunyinefwe aba muli uyu musumba. Na kuba, abalebakaanya balibongolwele icikuulwa ilyo fye bapwile ukukuula icibumba ninshi ne ndaka shicili tashilauma.

Na lyo line, mu November mu 2003, ifintu fyalyalwike mu Georgia kabili aba bwananyina balilekele ukubacusha.  Ilyo bayalwile ubuteko, abantu balikwete ubuntungwa bwa kupepa. Kabili bonse abali mwi bumba lya calici ca Orthodox abalesansa Inte sha kwa Yehova balibakakile.

Abantu ba kwa Lesa Balipaalilwe Icine Cine

Abantu ba kwa Yehova balipaalilwe lwa ku mupashi ilyo papitile inshita iinono ukutula apo balekeele ukubacusha. Pa kulongana kwa citungu ukwaliko mu 2004, balifumishe Baibolo ya Amalembo ya Calo Cipya aya ciGriki aya Bwina Kristu mu ciGeorgian.

Pa Kulongana kwa Citungu ukwa mu 2006 ukwaleti “Ukulubuka Nakupalama!”, kwali na cimbi icacitike ico abantu bashakalabe. Abalongene balitemenwe icine cine  ilyo baumfwile ukuti munyina Geoffrey Jackson uwa mwi Bumba Litungulula, nakwata ifya kulanda kuli bonse abalongene. Kabili balipapile ilyo munyina Geoffrey Jackson abilishe ukuti Baibolo—Amalembo ya Calo Cipya iya mu ciGeorgian naifuma pantu tabaleenekela!

Bafumya BaiboloAmalembo ya Calo Cipya iya mu ciGeorgian mu 2006

Abengi balilukwishe ifilamba ku nsansa. Nkashi umo atile: “Nshakwete amashiwi ya kubomfya pa kulondolola insansa nakwete ilyo napokelele Baibolo.  . . . Ala ubu bushiku tabwakalabwe.” Abantu ukucila pali 17,000 e basangilwe kuli uyu mutebeto wa ku mupashi kabili uyu e wali umuku wa kubalilapo abantu ba kwa Yehova mu Georgia bakwetepo ukulongana ukwaweme sana nga uku kulongana.

^ para. 29 Ukufuma mu 2001 ukufika mu 2003, Amayanda ya Bufumu ayo bakuulile mu Georgia yali 7.