PA NDIMI isho babalilepo ukupilibulamo Baibolo paba iciArmenian, iciCoptic, iciGeorgian, iciLatin, iciSyriac, e lyo ne ndimi shimbi. Ifimfungwa fya kale ifya mu ciGeorgian ifya Mabuuku ya Mbila Nsuma, amakalata ya kwa Paulo, e lyo na Amalumbo filanga ukuti aya mabuuku yapilibwilwe nalimo muli ba 400 C.E. Mu myaka yakonkelepo, umulimo wa kupilibula no kukopolola Baibolo mu ciGeorgian walikulileko ica kuti kwaishileba amaBaibolo ayalekanalekana. *

Baibolo yalilengele abena Georgia bayaluka mu fyo balelemba impapulo ne ntambi balekonka. Ku ca kumwenako, mu lyashi lya bulanda ililanda pali Namfumu Shushanik ilyalembelwe nalimo ku kupwa kwa ba 400 C.E., mwaliba amashiwi yamo ayo bayambula ukufuma mu Baibolo. Mu mushikakulo beta ukuti Vepkhvistqaosani (The Knight in the Panther’s Skin) uo ba Shota Rustaveli balembele nalimo mu 1220 mwaliba amashiwi yamo ayalanda pa mibele isuma iya Bwina Kristu. Balilandile pa mibele pamo nga ukuba ifibusa fisuma, bukapekape e lyo no kutemwa abantu bonse; imibele iisuma iyo abena Georgia bakwata na muno nshiku mwine.

^ para. 3 Nga mulefwaya ukwishibilapo na fimbi, moneni icipande icitila: “Icintu Icacindama Ico Basangile pa Numa ya Myaka Iingi” icali mu Ulupungu lwa kwa Kalinda ulwa June 1, 2013.