• IFYALO 47

  • IMPENDWA YA BANTU 741,311,996

  • BAKASABANKANYA 1,611,036

  • AMASAMBILILO YA BAIBOLO 847,343

Abana be Sukulu Batandalile Ing’anda ya Bufumu

Finland: Abana be sukulu ba gredi 4, batandalila Ing’anda ya Bufumu

Ilyo Ines uuli mu gredi 4 uwikala ku Finland, aumfwile ukuti abana be sukulu abo alesambilila nabo bali no kusambilila pa Nte sha kwa Yehova, abebele ukuyatandalila Ing’anda ya Bufumu. Abana be sukulu na bakafundisha balisumine ukuya.

Umulungu wakonkelepo, abana be sukulu 38 balicofele incinga ukuya ku Ng’anda ya Bufumu apalepele nalimo amakilomita 5.  Kafundisha mukalamba na bakafundisha bambi babili nabo balikonkele. Pa Ng’anda ya Bufumu basangilepo bamunyinefwe babili na bankashi batatu. Abana be sukulu baleipusha amepusho pa lwa Ng’anda ya Bufumu uku ninshi balelyako na tumo. Baleipusha abati: “Bushe mulongana shani?” “Inga ulya muputule wa nshi?” Baleipusha pali laibrare. “Mulandu nshi balembela pa cibumba ukuti, ‘6 mwingishemo 10?’” Baleipusha pe lembo lya mwaka ilyali pali Mateo 6:10. *

Apo pa sukulu apafumine aba bana balasambililako ne fya kucincitila icimusango ca bana be sukulu ica kucusha abanabo, bamunyinefwe balibatambishe vidio ya tukadoli utwa kulenga iya Beat a Bully Without Using Your Fists, iyaba pa jw.org. Balibalangile na fimbi ifyaba pa Webu saiti yesu kabili balibalishisheko no lwimbo lwa Bufumu. Pa Ng’anda ya Bufumu baikelepo nalimo iawala limo.

Kafundisha mukalamba na bakafundisha bambi e lyo na bana baliipakishe nga nshi ukutandala. Kafundisha mukalamba alitemenwe sana ifyo atambile pa Webu saiti ica kuti amwene ukutila kuti bafibomfya na mu kusambilisha abana pa fya kwa Lesa. Alitemenwe ilyo bamwebele ukuti abana be sukulu na bambi kuti batandala ku Ng’anda ya Bufumu. Ne ci calengele ukuti ubushiku bwakonkelepo, kafundisha we kalasi limbi alombe ba Nte nga ca kuti na o kuti atwala abana be sukulu ku kutandala ku Ng’anda ya Bufumu.

Balisangile Icuma pa Cishala

Ba Cristina abekala ku Romania tabatalile abaya ku sukulu, kanshi tabaishibe ukubelenga no kulemba. Bali bapiina sana e ico balesanga imikalile mu kutoola utukopo na mabotolo ya pulastiki mu fishala. Bushiku bumo ilyo  baletoola pa cishala, bamwene impapulo umwali ifikope ifisuma nga nshi ifyalelanga abantu abali ne nsansa. Batile, ‘Kufwile kwaliba abantu ba musango uyu muli cino calo.’ Ba Cristina balefwaisha ukwishiba ifyali muli ishi mpapulo, e ico bapeele umuntu umo ukubabelengelako. Ilyo baumfwile ukuti ishi mpapulo shalelanda pa fya kwa Lesa, balyumfwile ububi ukuti abantu balipoosele Icebo ca  kwa Lesa pa cishala. Ba Cristina balitwalilile ukuya ku cishala ku kutoola amabroshuwa, amatrakiti, na magazini. Pali ishi mpapulo paleba ishituntulu ne shalepaulwa. Mu kupita kwa nshita, ba Cristina balisambilile ukubelenga pa kuti baleishibilapo na fimbi ifyali mu mpapulo.

Pa numa, ba Nte baliilemonana na ba Cristina, kabili balitendeke no kubasambilisha Baibolo. Balitemenwe sana ukuti Yehova alibakulile ukubomfya impapulo isho abantu bamo bashacindamike. Pali lelo, balitampa ukulongana kabili balatemwa sana ifyo basambilila. Icibalenga baleba ne nsansa nga nshi ca kuti nomba balakwata magazini iipya, ifitabo ifipya, na mabroshuwa ayapya. Balileka ukufwaya impapulo pa cishala. Cine cine ba Cristina balisangile icuma!

Balesambilila Baibolo mu Mutengo

Germany: Ba Margret baletungulula isambililo lya Baibolo mu mutengo

Cila kacelo, ba Margret abekala ku Germany, balaya baleolola amolu ne mbwa yabo mu mutengo. Batile, “Ilingi line ndalanda na abo nkumana nabo mu nshila. Nga tabapamfiwe, ndalanshanya nabo ifya mu Baibolo.”

Bushiku bumo, balikumene na nakulubantu uwali ne myaka ukucila pali 70 uwatwele imbwa mu kwenda ukulingana no lutambi lwabo. Ba Margret batampile ukulanshanya nankwe. Uyu nakulubantu alitemenwe nga nshi kabili abebele ukuti cila bushiku alapepa kuli Lesa kabili alabelenga na Baibolo. Ukutula lilya line, balekumana no kulanshanya pa fya kwa Lesa. Bushiku bumo uyu nakulubantu aipwishe ba Margret ukuti: “Cinshi calenga ukuti mwishibe sana Baibolo?” Bamwaswike abati icalenga nico ni ba Nte.

Pa miku iingi ba Margret balefwaya ukutendeka isambililo lya Baibolo, lelo uyu nakulubantu alekaana. Na lyo  line, balitwalilile ukulanshanya. Ilyo papitile imyeshi imo, ba Margret na kabili balipwishe uyu nakulubantu nga kuti atemwa ukusambilila Baibolo. Uno muku wena, nakulubantu alilondolwele ukuti ico alekanina ukusambilila ni co umwaume aleikala nankwe alipatile Inte sha kwa Yehova.

Ubushiku bumbi ilyo ba Margret baile baleolola amolu mu mutengo, balisendele Baibolo ne citabo ca Ico Baibolo Isambilisha. Ilyo bamwene uyu nakulubantu, bamwebele abati: “Uno muku nshiletila tulesambilila Baibolo ku ng’anda ku mwenu, lelo ndefwaya tulesambilila muno mwine mu mutengo.” Nakulubantu ifilamba fyalitengelele mu menso kabili alisumine ukutendeka ukusambilila. Pali lelo, alaya mu kusambilila Baibolo mu mutengo pa nshiku 6 mu mulungu. Ukulingana fye ne fyo bucele, ba Margret balatungulula isambililo lya Baibolo ukubomfya umwamfuli na tochi.

Balipelenganishiwe Ilyo Bamwene Bapukunya Umutwe

Nkashi Delphine alesambilisha ba Irina Baibolo ku Bulgaria. Ba Irina balitemenwe ifyo balesambilila kabili balelongana lyonse. Lelo, abena mwabo bena tabalefwaya nangu panono ukuti ba Irina balelanshanya ne Nte sha kwa Yehova. E ico balikuushishe ulupwa lonse ku Sweden, ne ci calengele ukuti ba Irina baleke ukulanshanya na ba Delphine. Bushiku bumo bapainiya babili, ba Alexandra na ba Rebecca balikumene na ba Irina, lelo ba Irina tabaishibe ukulanda iciSwedish nangu panono. Bapainiya balipeele ba Irina akatabo ka Good News for People of All Nations pa kuti babelenge mu ciBulgarian. Pa numa, balibepwishe nga kuti bafwaya impapulo mu lulimi lwabo. Ba Irina balipukwinye sana umutwe. Ilyo bapainiya bamwene ifi, balifuminepo pantu bamwene kwati ba Irina tabalefwaya ukusambilila.

Ilyo papitile inshita, ba Alexandra baibukishe ukuti mu milungu fye iinono ba Linda abena Sweden, abalebombela  ku Bulgaria, bali no kubatandalila. E ico batontonkenye ukuti nalimo kuti cawama nga ca kuti ba Irina basambilila Baibolo mu lulimi lwabo. Ilyo ba Linda bafikile baliile na ba Alexandra ku kuyamona ba Irina. Ba Irina baebele ba Linda ukuti balepepa lyonse kuli Yehova ukutila abafwilishe pa kuti bengatwalilila ukusambilila Baibolo. Ilingi line, ba Irina balesenda icitabo ca Ico Baibolo Isambilisha ica mu ciBulgarian. Balefwaya ukulanga ba Nte ici citabo nga bakumana nabo mu musebo, lelo tabatalile abakumanyapo nangu fye umo. Ala ba Irina balitemenwe ilyo babapeele impapulo ishingi isha mu ciBulgarian!

Ba Linda baipwishe ba Alexandra icalengele batontonkanye ukuti ba Irina tabalefwaya ukusambilila ilyo balandile nabo pa muku wa kubalilapo. Ba Alexandra batile ba Irina balipukwinye umutwe, ku kulanga ukuti tabalefwaya ukusambilila. Ba Linda balimwentwile kabili balondololwele ukuti, abena Bulgaria pa kukaana balakunta imitwe, pa kusumina balapukunya imitwe. E ico ba Irina balitwalilile ukusambilila Baibolo mu ciBulgarian mpaka ilyo baishibe iciSwedish. Balesambilila shani? Balesambilila na ba Delphine ukubomfya intaneti.

Ifyo Bawishi Balecita Fyalengele Ayaluka

Jemima uwikala ku Spain bamusambilishe icine ilyo ali umwaice. Lelo ilyo ali ne myaka 7, ifintu fyalyalwike. Banyina balikeene ukuba Inte ya kwa Yehova kabili balilekene na bawishi. Lintu Jemima ali ne myaka 13, alilekele ukubishanya na ba Nte kabili talefwaya ukumfwa ifyo bawishi balemufunda ukubomfya amalembo.

Ilyo Jemima akulile, aliipoosele mu tubungwe ukubikako no twa fikansa fya calo pantu alemona kwati e twingalenga mu calo mwaba umulinganya. Mu kupita kwa nshita alifililwe ukusanga incito, e ico bawishi ba Domingo batendeke ukubomba nankwe incito ya kupenta.

 Bushiku bumo ilyo balebomba, ba Domingo balimwipwishe nga kuti atemwa ukusambilila Baibolo. Alikeene, lelo abebele ukuti nga afwaya ukusambilila akabeba. Nga balepenta, ba Domingo balekutika kuli Baibolo na magazini iyakopwa, lelo Jemima ena alekutika ku nyimbo shimbi ninshi nabika na tumo utwa mu matwi utwakumfwilako inyimbo.

Mu November 2012, ba Domingo balibetile ukuyasangwa kwi Isukulu Ilya Bena Kristu Abaupana, pantu pali iyi nshita ninshi balyupa na kabili. Jemima calimufikile sana pa mutima ilyo amwene bawishi baya ku kusambilila Baibolo pa myeshi ibili, basha na fyonse no kuipeelesha ukuya konse uko bali no kubatuma. Uyu, e wali umuku wa kubalilapo Jemima ailwike ifyo icine calimbile imishila mu mutima wa bawishi, kabili alefwaya ukwishiba icalengele.

Jemima alilekele ukukutika ku nyimbo shakwe no kutendeka ukulakutika ku fyakopwa ifyo bawishi balekutikako. Na kabili, alitampile no kwipusha amepusho. Bushiku bumo ilyo ba Domingo banine pa mutanto balepenta, Jemima abepwishe ukuti: “Bushe muleibukisha ilyo namwebele ukuti nkamweba nga nafwaya ukusambilila Baibolo? Nomba ndefwaya ukulasambilila.”

Ba Domingo balitemenwe ilyo baumfwile ifi. Mu January 2013, balitendeke ukusambilisha Jemima Baibolo, imiku ibili mu mulungu. Isukulu lyatampile mu April kabili balitwalilile ukusambilila ukubomfya intaneti. Jemima alisangilweko ilyo bawishi balepwisha isukulu kabili alitemenwe sana ifyo amwene. Pa 14 December, 2013, Jemima alibatishiwe.

Jemima atile, “Yehova alintekanishisha sana, kabili nalishiba ukuti tantendwa. Alilenga nakwata ifibusa ifisuma ifyo nshali no kukwata nga nshasambilile icine. Aba bwananyina aba mwi sonde lyonse balanenga naumfwikisha ifyo ukutemwa kwa kwa Yehova kwakula.”

 Umucinshi Usuma

Bushiku bumo pa 30 March, 2014, ilyo ba Vasilii ababomba imyaka iingi pa Bethel ya ku Russia baleshimikila na ka standi ka mpapulo akakwata amawilo mupepi na Bethel, motoka ya bakapokola yaishileshiika apo baali. Kapokola umo alifumine muli motoka no kweba ba Vasilii ukuleka ukushimikila, pantu abena mupalamano bamo baleilishanya pali uyu mulimo. Kapokola umbi alekopa ifyo ba Vasilii na kapokola balelanshanya. Ba Vasilii bamwene ukuti te kuti ciwame ukulaumana na kapokola pa nsambu shabo. Ilyo fyonse ifi fyalecitika, abapita nshila bamo baliminine no kulatamba. Ba Vasilii baliile, lelo pa numa fye ya nshiku shibili balilombele nga kuti balanshanyako no mukalamba wa bakapokola kabili balibasuminishe. Ilyo balelanshanya, ba Vasilii balitashishe uyu kapokola pa milimo iyacindama iyo bakapokola babomba na pa fyo balanshenye mu mutekatima na kapokola uwabebele ukuleka ukushimikila. Uyu kapokola aebele inkonkani yakwe ukuti, “Pa myaka yonse 32 iyo nabomba iyi ncito, takwatala akuba umuntu nangu umo uwatashapo imilimo tubomba!” Ilyo balelanshanya, ba Vasilii balilondolwelele uyu kapokola ukuti umulimo wesu uwa kushimikila ku cintubwingi wa mwi funde. Umukalamba wa bakapokola aipwishe ba Vasilii ico bashakanine ilyo ulya kapokola abebele ukuleka ukushimikila nangu ca kuti balishibe ukutila tabapulile mwi funde. Ba Vasilii bamwaswike ukuti: “Pantu nalicindika bakapokola. Bushe nga camoneke shani ku bantu bonse abaletamba nga ca kuti naebele bakapokola ukuti tabaishiba amafunde?” Uyu umukalamba wa bakapokola ne nkonkani yakwe balitemenwe nga nshi kabili baebele ba Vasilii ukuti tabakabaleshepo na kabili nga baleshimikila pali ka standi.

[Futunoti]

^ par. 2 Ku Finland, icishibilo icimoneka ifi “:” (colon) e co babomfya mu nsamushi sha division, e kutila insamushi sha kwingishamo.