Bamishonari Batwalilila Ukushimikila mu Bumfisolo

Ilyo babindile umulimo wa kushimikila imbila nsuma e lyo ifintu fyatampile ukubipila sana aba bwananyina mu Dominican Republic. Ba Alma Parson abali bamishonari batile, ‘Balisele Amayanda ya Bufumu, no mulimo balibindile. Aba bwananyina baleeshiwa no kucula  sana.’ Na kabili, balibafumishe incito shalipwile, bambi balibakakile. Na lyo line, ba Alma Parson balandile ukuti: ‘Pa miku iingi, calimoneke apabuta tuutu ukuti Yehova aletutungulula kabili aletucingilila.’ Apo balicetekele ukuti Yehova ali no kulabatungulula, aba bwananyina balitwalilile ukushimikila mu bumfisolo.

Tabaletusuminisha ukulalongana. Ba Lennart Johnson batile: ‘Aba bwananyina batendeke ukulalonganina mu mayanda mu tumabumba. Twalesambilila ifipande fya mu Ulupungu lwa kwa Kalinda ifyo balekopolola ukubomfya mashini iyo beta abati mimeograph. Bonse abali ne cishinka twaletasha sana pa fyo Yehova aletukosha ukupitila muli utu tumabumba.’

Ba Roy Brandt na bena mwabo ba Juanita nabo balitwalilile ukushimikila na lintu kwali icibindo

Pali iyi nshita batifitifi ba buteko e lyo bacililemo ukulasopa no kucusha sana aba bwananyina. Lelo, ifi tafyalengele aba bwananyina batiine. Pa 15 September, 1950, kalemba wa buteko Hungría, alembeele Kateka wa calo ukuti: “Ba Lee Roy Brandt na bakalamba bambi abe bumba lya Nte sha kwa Yehova balesa lyonse kwi ofeshi lyandi ku kuilishanya pa malyashi ya bufi ayo icilye ca mu calo cesu capingwile ukuti yapwe, no kufumyapo icibindo ico bashikonka no kukonka. Cila bushiku tulapokelela amalipoti ukufuma ku ncende ishalekanalekana ukuti balitwalilila ukulabepa abantu mu bumfisolo kabili balasuusha ne fyo ubuteko bucita.” Na pa kupwisha kalata yakwe aebele kateka ukuti atamfye intungulushi sha ba Nte ishafuma ku fyalo fimbi.

“Balitukoseshe”

Ilyo umwaka wa 1950 walepwa, ba Knorr na ba Henschel balitandalile icalo ca Dominican Republic. Pa  numa bamishonari bamo babatumine ukuya mu kubombela ku Argentina, ku Guatemala, na ku Puerto Rico. Bambi balitendeke ukubomba incito pa kuti batwalilile ukwikala mu calo. Ku ca kumwenako, munyinefwe Brandt atampile ukubomba ku kampani ka malaiti, bambi balesambilisha iciNgeleshi. Lipoti yali muli 1951 Yearbook yatile: “Filya bamishonari bashabutwike mu calo ilyo balebacusha, calengele abasambi ba kwa Shikulu aba cishinka abasambilile icine kuli bena bakose. Bonse balitemenwe pa kumona ifyo bamishonari bashipile no kutwalilila ukubomba umulimo wabo.”

‘Filya batwalilile ukwikala mu calo calengele aba bwananyina aba cishinka bakosa’

Ba Dorothy Lawrence bali pali bamishonari abalefunda iciNgeleshi. Na kabili balefunda iciNgeleshi pa nshita imo ine baletungulula na masambililo ya Baibolo. Ne ci calengele abengi basambilila icine.

Aba bakapepa ba kwa Yehova aba cishinka balifwaile inshila isha kushimikilamo na lintu balebasopa sana ku buteko. Limo, balesusula amapepala mu fitabo pa kuti bayabika mu matumba nelyo mu fyola ifyo balesendelamo utupe tumo pa kuti ilyo baleshimikila, aba buteko belaishiba. Amalipoti ya mulimo baleyalemba pa kalipepala akanono kwati balembelepo fye ifintu ifyo balefwaya ukushita. Apo balingile ukulemba amabuuku, ututabo, magazini, ifipempu fya kubwelelamo, e lyo  na maawala, balelembapo popo, cilemba, amani, kabeji, na spinachi. Ulupungu ulo balekopolola ukubomfya Memeograph balelwita ukuti yuca. Ili ishina lyafuma ku cimenwa ico beta abati yuca nelyo kalundwe kabili cilalimwa sana mu Dominican Republic.

Umulimo wa Kupanga Abasambi Watwalilila

Pa 16 June, 1954, Rafael Trujillo alisaine icipangano na ba ku Vatican icapeele bashimapepo ba ku Katolika insambu ishaibela mu Dominican Republic. Pali iyi nshita ninshi ba Nte balibabinda ukushimikila pa myaka ine. Na lyo line, ilyo calefika mu 1955 bakasabankanya mu Dominican Republic balifikile kuli 478. Cinshi cabafwile ukulunduluka nangu ca kuti ifintu fyalibipile umusango uyu? Lipoti iya muli 1956 Yearbook yatile, “Umupashi wa kwa Yehova e waletukosha. Aba bwananyina balikatana, balikosa mu citetekelo kabili balatwalilila abashipa.”

Mu July 1955, aba ku maofeshi yakalamba aya Nte sha kwa Yehova balilembeele Trujillo kalata. Muli iyi kalata balilondolwele bwino sana ifyo ba Nte bamona ukuitumpa mu fikansa fya calo kabili balimulombele ukuti ‘afumyepo icibindo pa Nte sha kwa Yehova na pa  kabungwe ka Watch Tower Bible and Tract Society.” Finshi fyafuminemo?