Ifyo Umulimo wa Kushimikila ku Balanda IciChinese Walunduluka

Mu 2005, iofeshi lya musambo lyasontele ba Tin Wa Ng abalebombela pa Bethel ukutendeka ukubomba bupainiya bwaibela pa kuti baleshimikila abena China abaleikala mu Dominican Republic. Bafyalilwe no kukulila mu Dominican Republic. Abafyashi babo bakukiile ku Santo Domingo ukufuma ku China.

Pa 1 January, 2008, icilonganino ca Mandarin Chinese calipangilwe mu Santo Domingo, kabili mu 2011 ibumba na limbi lyalipangilwe mu Santiago. Bakasabankanya 70 na bapainiya ba nshita yonse 36 e lyo na bapainiya ba kwafwilisha abengi balabombesha sana ica kuti balatungulula amasambililo ya Baibolo 76 cila mweshi.

 Ukufwaya no Kushimikila Abalanda IciNgeleshi

Ilyo calefika mu 2007, bakasabankanya 27,466 mu filonganino 376 e baleshimikila imbila nsuma kabili baletungulula amasambililo ya Baibolo ayali 49,795. Na lyo line, nangu ca kuti kwali abantu abanono abalelanda iciNgeleshi, takwali icilonganino muli ulu lulimi. Kanshi mu April 2008 iofeshi lya musambo lyapeele ba Donald na ba Jayne Elwell abali bamishonari umulimo wa kupanga ibumba lya balelanda iciNgeleshi mu Santo Domingo. Ica kubalilapo ico ili ibumba ilinono ilya bakasabankanya abacincila lyacitile, kufwailisha no kumona ni kwi abalelanda ululimi lwa ciNgeleshi baleikala. Lyena, balitantike bwino ifya kubomba muli ici cifulo pa kuti bengalashimikila sana.

Pa mulandu no ku ukubombesha, ibumba lya balelanda iciNgeleshi mu Santo Domingo lyalekulilako, kabili icilonganino umwali bakasabankanya 39 calipangilwe mu July 2009. Ifi fine e fyo cali na mu fifulo fimbi muli ici calo. Ilyo calefika mu November 2011, mu Dominican Republic mwali ifilonganino fya ciNgeleshi 7 ne bumba limo abalebomfya ulu lulimi.

Umwanakashi Nkomamatwi Kabili Impofu Asalapo Ukubombela Yehova

Painiya waibela alelanshanya na ba Lorys ukubomfya ifishibilo fya mu minwe.

Ba Lorys abalwele ubulwele ubulenga umuntu alafilwa ukumona no kumfwa ubo batila Usher Syndrome, bakulile ukwabula abafyashi. Ukufuma fye ku kufyalwa kwabo, bali bankomamatwi kabili batendeke ukulafilwa ukumona ilyo bali ne myaka 16. Balamonako panono akasuba lelo ubushiku bwena tabamona nangu panono. Inshila iyo bengalanshanishishamo fye na bantu akasuba nga kawa, kupanga ifishibilo mu minwe.

Bapainiya baibela, umulume no mwina mwakwe bamonene na ba Lorys ilyo bali ne myaka 23. Pali ilya nshita ninshi ba Lorys bekala no mwaume impofu kabili balikwete no mwana umwanakashi uwa mwaka umo. Uyu mwana ena tali  nkomamatwi. Ilyo ba Lorys babetile ukuya mu kulongana balisumine kabili balitemenwe sana ifyo basambilile.

Tapapitile na nshita, ba Lorys balyalwike sana mu fintu ifingi. Ku ca kumwenako, ilyo baishibe ukuti tacali bwino ukulaikala no mwaume uo bashaupana nankwe ukulingana ne funde, balimulondolwelele ifyo ukuupana ukulingana ne funde kwacindama kabili bamwebele no kuti tabali na kusuula ifyo Baibolo ilanda pa kuba ne mibele isuma. Uyu mwaume alipapile sana ifyo ba Lorys bamwebele ukwabula  no kupita mu mbali kabili alisumine ukuti bali no kuupana bwino.

Pa numa ya kuupana, ba Lorys balifikilepo ukuba kasabankanya kabili tapakokwele balibatishiwe. Ilyo balesambilila Baibolo na ba Nte, ba Lorys balisambilile ululimi lwa bankomamatwi ulwa American Sign Language (ASL). Ukutula lilya line, balasambilishako umwana wabo ulu lulimi e lyo balamusambilisha ne cine.

Icinkukuma Icaonawile Ifintu mu Haiti

Abena Dominican na bena Haiti tabakatale abalaba ifyacitike pali Cibili, pa 12 January, 2010. Ubu e bushiku kwali icinkukuma icaonawile sana ifintu mu Haiti. Bwangu bwangu Ibumba Litungulula ilya Nte sha kwa Yehova lyaebele umusambo wa ku Dominican Republic ukutuma indalama ku musambo wa ku Haiti pa kuti shafwilisheko abasanshilwe. Apo indalama isho baali no kutuma shali ishingi sana, ba Evan Batista, badokota ba pa Bethel abalepa amamita 1.90  kabili abafina amakilogramu 127 ebo batumine ukutwala indalama.

Caliweme filya fine batumine munyinefwe Batista pantu ilyo afikile ku mupaka wa calo, bamwebele ukuti badokota balefwaikwa sana. Abengi abacenenwe mu cinkukuma balebatwala ku Cikuulwa ca Kulonganinamo Ukulongana Kukalamba icali mupepi no musambo wa ku Haiti ku kundapwa. Ilyo bamunyinefwe baishibe ukuti ba Batista ni badokota ba pa musambo, balitumine foni ku musambo wa ku Dominican Republic no kubepusha nga kuti munyinefwe Batista aikalako inshiku na shimbi mu Haiti. Aba ku musambo balisumine kabili ba Batista balitampile ukubomba umulimo wa kwafwilisha aba bwananyina mu Haiti mu fyo balekabila. Bapekenye fyonse ifi ninshi papita fye amaawala ayanono ukutula apo icinkukuma capitile.

Aba bwananyina balyafwilishe abasanshilwe ilyo kwali icinkukuma mu 2010 mu Haiti

Bwangu bwangu bamunyinefwe aba ku dipartimenti iishita ifya pa musambo, mu Dominican Republic, balilanshenye na makampani ayo baleshitako ifya kulya. E ico pali Cine, pa 14 January ne nshita ya 02:30 ku macaca balitumine umupunga, cilemba, ne fya kulya fimbi ifyafinine amakilogramu ukucila pali 6,800. Ifi ifya kulya e fyabalilepo ukufika ku mupaka wa calo ca Haiti ukufuma ku fyalo fimbi. Pa numa, bulya bwine bushiku, badokota na bambi batatu ukufuma ku Dominican Republic baendele na motoka pa maawala 7 ukuya ku musambo wa ku Haiti. Bafikile mu cungulo sana, lelo mu nshita ya kuya uko baali no kufikila, baile mu kumona abacenenwe kabili balibombele mpaka na pa kati ka bushiku. Ubushiku bwakonkelepo, badokota na bambi bane na banasi bane balifikile ukufuma ku Dominican Republic. Kwena calyafishe ukubombela abantu abalekabila opareshoni pantu balebabombela fye mu kalitenti ako bapangile palya pene pa Cikuulwa ca Kulonganinamo Ukulongana Kukalamba. Pa mulungu fye umo, aba badokota na banasi, bonse pamo 12 balyundepe abantu abacenenwe ukucila pali 300.

Cila bushiku, kwaleba abo baletwala ku Dominican  Republic ku kuyaundapwa nga ca kuti nabacenwa sana. Inshita shimo, imyotoka shilya shine ishaletwala ifya ku kumbusuka e shalesenda na balwele ku fipatala ifyapusanapusana mu Dominican Republic. Iofeshi lya musambo lyalipekenye amabumba ya ba Patient Visitation Groups (Amabumba ya Bapempula Abalwele mu Fipatala) ayalekoselesha abacenenwe, no kushininkisha ukuti balebapeela umuti ne fintu fimbi ifyo balekabila. Bamunyina mu filonganino ifyali mupepi e balepekanishisha aba bwananyina ifya kulya no mwa kusendama abaletensha abacenenwe.

Inte sha kwa Yehova balisangwilileko ifintu ifingi ifyacilile pa matani 454 e lyo ne fya kulya ifingi sana

Ukubombesha no kuipeelesha kwa bantu ba kwa Yehova pa numa ya cinkukuma kwashininkishe ukuti amashiwi yaba pa Amapinda 17:17 ya cine. Yatila: “Ukutemwa kwa kwa cibusa wa cishinka takupwa, kabili uyu cibusa ni munyina uufyalwa ilyo kuli ubucushi.” Ificitika filanga ifyo Yehova asakamana abantu ba cishinka na lintu bali mu bwafya ukupitila mu mupashi wakwe e lyo na mu ba bwananyina. Uyu mulimo wa kwafwilisha abasanshilwe walitwalilile pa myeshi iingi. Inte sha kwa Yehova balisangwilileko ifintu ifingi ifyacilile pa matani 454 e lyo ne fya kulya ifingi sana. Bamunyinefwe na bankashi 78 abasambilila ifya kundapa abantu abafumine mu fyalo ifyalekanalekana pamo na bambi ababomfi ba kuitemenwe bali-ipeleshe ukwafwilisha aba bwananyina abasanshilwe. *

^ par. 1 Nga mulefwaya ukwishibilapo na fimbi moneni Awake! ya December 2010, amabula 14-19