UKULUNDULUKA ukulecitika mu cilonganino ca kwa Yehova ica mwi sonde lyonse nakulenga ukuti kube ukukabila kwa Mayanda ya Bufumu, Ifikuulwa fya Kulonganinamo Ukulongana Kukalamba, ifikuulwa fya masukulu ya Bufumu, amaofeshi ya bakapilibula e lyo ne misambo mu ncende ishalekanalekana. E co, mu October 2013, Ibumba Litungulula lyalipangile dipartmenti iipya pa kuti umulimo wa kukuula no kuwamya ifikuulwa ulebombwa bwino, ukwabula no kupoosapo indalama ishingi. Iyi dipartmenti iipya, iyo baleita ukuti Worldwide Design/Construction Department, mu kwipifya WDC (Dipartmenti ya Makuule Mwi Sonde Lyonse),  yabela ku maofeshi yakalamba ku Brooklyn, mu New York kabili Komiti ya Kusabankanya iya Ibumba Litungulula e yangalila iyi dipartmenti.

WDC e ilolekesha na pa madipartmenti ya makuule ayaba mu fitungu fyalekanalekana ayo beta abati, Regional Design/Construction Departments ayabela pa misambo ya ku Australia, ku Germany, ku South Africa, na ku United States. Aya madipartimenti e yangalila umulimo wa kushila amapulani, ukukuula no kuwamya ifikuulwa mu fyalo babombela. Ubuyo bwabo bwa kukuula Amayanda ya Bufumu mu kwangufyanya. Kale, ubukuule bwa Mayanda ya Bufumu bwaleyangalilwa na Komiti ya Makuule (RBC) nelyo na programu ya kukuula Amayanda ya Bufumu mu fyalo ifipiina. Aya mabumba ya bwangalishi yabili nabayabika pamo pa kuti umulimo wa bukuule uleenda bwangu.

Pa kuti umulimo wa kukuula Amayanda ya Bufumu ne Fikuulwa fya Kulonganinamo Ukulongana Kukalamba ubombwe bwino, dipartimenti beta ukuti, Local Design/Construction Department yalipangwa mu musambo umo na umo. Komiti ya Musambo e yangalila iyi dipartmenti. Icawamako kuli iyi mitantikile ipya ca kuti, imisambo yonse nomba kuti yasonta bamunyinefwe aba kukuula Amayanda ya Bufumu ne Fikuulwa fya Kulonganinamo Ukulongana Kukalamba mu calo cabo.

Mu April 2014 kwali amakuule ayakalamba 270 ayalefwaikwa, amaofeshi ya bakapilibula 90, Ifikuulwa fya Kulonganinamo Ukulongana Kukalamba 35 e lyo na maofeshi ya misambo 130. Na kabili, Amayanda ya Bufumu ukucila pali 14,000 yalefwaikwa ukukuula nelyo ukuyamya.

Ala mwandini icitetekelo cilakoselako nga nshi nga mwamona ifyo abantu ba kwa Yehova baikatana nangu  ca kuti balipusana intambi, indimi ne fyalo uko bafuma, lelo bonse balebombela pamo ukukuula ifikuulwa ifileleta ilumbo no bukata kwi shina lyakwe ilya mushilo! Ba Dan Molchan ababombela mwi Ofeshi lya Komiti Isakamana Ababomba pa Bethel batile, “Umulimo wena ukalamba, kabili tulatasha sana amapepo ayo aba bwananyina batupepelako pamo ne misangulo ya kwafwilisha umulimo. Lelo tulatasha nga nshi bamunyinefwe na bankashi abaipeelesha ukubomba iyi milimo.”