Yeremia 29:1-32

29  Kabili aya e mashiwi yali muli kalata iyo Yeremia kasesema atumine ukufuma ku Yerusalemu ukuya ku bakalamba abashelepo pali balya basendele muli bunkole na kuli bashimapepo na bakasesema na bantu bonse, abo Nebukadnesari asendele muli bunkole ukubafumya mu Yerusalemu no kubatwala ku Babiloni,+  pa numa ya kuya kwa mfumu Yekonia+ na namfumu+ na babomfi ba kwi sano, na bacilolo ba kwa Yuda na Yerusalemu,+ na bacenjela mu fya kupangapanga na bakakuula ba mpungu+ ukufuma mu Yerusalemu.  Apeele iyi kalata kuli Elasa mwana Shafani+ na Gemaria mwana Hilkia, abo Sidekia+ imfumu ya kwa Yuda atumine ku Babiloni kuli Nebukadnesari imfumu ya ku Babiloni. Ifi e fyali muli kalata:  “Ifi e fyo Yehova wa mabumba, Lesa wa kwa Israele, asosa kuli bankole bonse, abo natwele muli bunkole+ ukufuma ku Yerusalemu no kubatwala ku Babiloni,  ‘Kuuleni amayanda no kwikalamo, kabili limeni amabala no kulya ifisabo fya yako.+  Upeni abanakashi no kufyala abana baume na bana banakashi;+ kabili fwayeni abanakashi aba kuti abana benu abaume bope kabili ufyeni abana benu abanakashi ku baume, pa kuti bafyale abana baume na bana banakashi; kabili fuleni uko kwine, mwicepa iyo.  Kabili lombeni ukuti mu musumba uo namutwalako muli bunkole mube umutende, kabili upepeleniko kuli Yehova, pantu nga mwaba umutende, na imwe mukaba no mutende.+  Pantu Yehova wa mabumba, Lesa wa kwa Israele atila: “Mwileka bakasesema benu abali mu kati kenu na bakabuka benu bamubepe,+ kabili mwiumfwa ku filoto fyabo ifyo balelota.+  Pantu ‘bufi balesesemena mwi shina lyandi. Nshabatumine,’+ e fyasosa Yehova.”’” 10  “Pantu Yehova atila, ‘Ilyo ikafikilishiwa imyaka amakumi cinelubali (70) ku Babiloni, nkamupempula,+ kabili nkafikilisha kuli imwe amashiwi yandi ayasuma no kumubwesesha kuli cino cifulo.’+ 11  “‘Pantu ninjishiba amatontonkanyo ayo ndetontonkanya pali imwe,’+ e fyasosa Yehova, ‘amatontonkanyo ya mutende, te ya bubi iyo,+ aya kumupeela inshita ya ku ntanshi iisuma ne subilo.+ 12  Kabili mukalilila kuli ine, mukesa no kupepa kuli ine, na ine nkomfwa kuli imwe.’+ 13  “‘Kabili mukamfwaya no kunsanga,+ pantu mukamfwaya no mutima wenu onse.+ 14  Kabili nkaleka mukansange,’+ e fyasosa Yehova. ‘Nkalonganika na bankole benu bonse no kumulonganika ukufuma mu nko shonse ne cifulo conse umo namupashiile,’+ e fyasosa Yehova. ‘Kabili nkamubwesesha ku cifulo uko namufumishe ilyo namutwele muli bunkole.’+ 15  Lelo muleti, ‘Yehova alitwimisha bakasesema mu Babiloni.’ 16  “Pantu e fyasosa Yehova ku mfumu yaikala pa cipuna ca bufumu ica kwa Davidi+ na ku bantu bonse abekala muli uno musumba, bamunyinenwe abashaile pamo na imwe muli bunkole,+ 17  ‘Yehova wa mabumba atila: “Moneni, ndebatumina ulupanga,+ icipowe,+ ne cikuko,+ kabili nkabalenga ukuba nga makunyu ayaonaika ayo umuntu ashingalya pa mulandu wa kubipa.”’+ 18  “‘Kabili nkabakonka no lupanga, ne cipowe ne cikuko, kabili nkabalenga bakabe ica kututumya mu mabufumu yonse aya pano isonde,+ no kuba icitiipu ne ca kupapa ne ca kulishishapo umunsoli no kuba abaseebana mu nko shonse umo nkabapashila,+ 19  pa mulandu wa kuti tabaumfwilile amashiwi yandi ayo natumine kuli bena mu babomfi bandi bakasesema, nalecelela no kubatuma,’+ e fyasosa Yehova. “‘Lelo tamwaumfwile kuli ine,’+ e fyo Yehova asosa. 20  “Lelo imwe umfweni amashiwi ya kwa Yehova, bonse mwe baba muli bunkole,+ mwe bo nafumishe mu Yerusalemu no kumutwala mu Babiloni.+ 21  E fyo Yehova wa mabumba, Lesa wa kwa Israele, asosa pali Ahabu mwana Kolaya na pali Sidekia mwana Maaseya, abalesesemena ubufi mwi shina lyandi kuli imwe,+ ‘Moneni, nkabapeela mu minwe ya kwa Nebukadresari imfumu ya ku Babiloni, kabili akabepaila pa menso yenu.+ 22  Kabili kuli bena e ko bonse abaYuda abali muli bunkole mu Babiloni bakafumya amashiwi ya kulapisha, aya kuti: “Yehova akucite nga Sidekia na Ahabu,+ abo imfumu ya ku Babiloni yaocele mu mulilo!”+ 23  pa mulandu wa kucita ubupumbu muli Israele,+ kabili bacita ubucende na bakashi ba banabo+ no kulandila ubufi mwi shina lyandi, amashiwi ayo nshabebele.+ “‘“Nine naishiba kabili ndi nte,”+ e fyasosa Yehova.’” 24  “Kabili usose kuli Shemaya+ uwa ku Nehelamu auti, 25  ‘Yehova wa mabumba, Lesa wa kwa Israele atila: “Pa mulandu wa kuti nautumina mwi shina lyobe amakalata+ ku bantu bonse abali mu Yerusalemu, na kuli Sefania+ mwana Maaseya, shimapepo, na kuli bashimapepo bonse, auti, 26  ‘Yehova nakulenga ukuba shimapepo mu cifulo ca kwa Yehoyada shimapepo, ukuba kangalila mukalamba uwa mu ng’anda ya kwa Yehova,+ kabili umuntu onse uwapena+ kabili ulecita nga kasesema, ukamubike mu makusu;+ 27  nomba cinshi ico mushikalipilile Yeremia uwa ku Anatote+ ulecita nga kasesema kuli imwe?+ 28  Pantu e mulandu wine atumine amashiwi kuli ifwe mu Babiloni ati: “Bunkole bukatantalila. Kuuleni amayanda no kwikalamo, kabili limeni amabala no kulya ifisabo fya yako,+—”’”’” 29  Kabili Sefania+ shimapepo abelengele iyi kalata ninshi na Yeremia kasesema aleumfwako. 30  E lyo icebo ca kwa Yehova caishile kuli Yeremia no kutila: 31  “Tuma amashiwi kuli bonse ababa muli bunkole+ auti, ‘E fyasosa Yehova pali Shemaya uwa ku Nehelamu ati: “Pa mulandu wa kuti Shemaya nasesema kuli imwe, na ine nshamutumine, kabili eseshe ukumulenga ukucetekela ubufi,+ 32  Yehova atila, ‘Moneni, nkakanda Shemaya+ uwa ku Nehelamu na bana bakwe.’+ “‘“‘Takwakabe umuntu wakwe uukekala mu kati ka bantu aba;+ kabili takamone ubusuma ubo ndecitila abantu bandi,’+ e fyasosa Yehova, ‘pantu ico asosele, kupondokela Yehova apabuuta.’”’”+

Amafutunoti