Tinikeni pa kuti muye ku filimo

Tinikeni pa kuti mumone imitwe iilimo

Inte sha kwa Yehova

Saleni ululimi Cibemba

Yeremia 20:1-18

20  Nomba Pashihuri mwana Imere,+ shimapepo, uwali umukalamba mu ng’anda ya kwa Yehova,+ aleumfwa uko Yeremia alesesema aya mashiwi.  E lyo Pashihuri aumine kasesema Yeremia+ no kumubika mu makusu+ ayali mu Mpongolo ya pa Muulu iya kwa Benjamini, iyali mu ng’anda ya kwa Yehova.  Lelo ubushiku bwakonkelepo Pashihuri afumishe Yeremia mu makusu,+ na Yeremia amwebele ati: “Yehova nakwinika+ ati Umwenso konse konse,+ kabili tawakaleitwa ati Pashihuri na kabili.  Pantu Yehova atila, ‘Mona, ndekucita ukuba uwa kulenga umwenso kuli we mwine na kuli bonse abanobe, na bo bakafwa ku lupanga lwa balwani+ babo ilyo ulemonako na menso yobe;+ na bena Yuda bonse nkabapeela mu minwe ya mfumu ya ku Babiloni, na yo ikabatwala muli bunkole ku Babiloni no kubepaya ku lupanga.+  Kabili nkapeela fyonse ifyatutilwa ifya musumba uno ne fya mu kucucutika fyonse ifya uko na fyonse ifyauma umutengo ifya uko; ne fyuma fyonse ifya shamfumu sha kwa Yuda, nkafipeela mu minwe ya balwani babo.+ Na bo bakafipokolola no kufisenda, bakafitwala na ku Babiloni.+  Na iwe Pashihuri na bonse abekala mu ng’anda yobe, mukaya muli bunkole;+ ku Babiloni e ko mukaya, kabili kulya e ko mukafwila kabili kulya e ko mukashiikwa na banobe,+ pantu wabasesemene ubufi.’”+  Mwambepa, mwe Yehova, kabili nabepwa. Mwabomfya amaka yenu pali ine, kabili mwacimfya.+ Naba ica kuseka akasuba konse; bonse balempumya.+  Pantu lyonse ilyo nasosa, ndapunda. Ubucushi no bonaushi e fyo ndebilikisha!+ Pantu naseebanine pa cebo ca kwa Yehova kabili balenseka akasuba konse pa mulandu wa ciko.+  Kabili natile: “Nshakamulumbule, nshakasosele na kabili mwi shina lyakwe.”+ E lyo mu mutima wandi caba kwati mulilo uulepya, uwacilikilwa mu mafupa yandi; kabili nalinakile ukucisunga mu nda, kabili nalifililwe ukushipikisha.+ 10  Pantu nalyumfwile ukulanda kwa bengi ukubi.+ Kwali no mwenso konse konse. Kabili baleti: “Mushinineni, pa kuti tumushinine.”+ Abantu bonse abaletila “Umutende!”—balelolela ukuti njipunune,+ kabili balesoshanya abati: “Napamo akabepwa;+ pa kuti na ifwe tukamucimfye, no kumukanda.” 11  Lelo Yehova ali na ine+ nge mpalume iya maka icine cine.+ E mulandu wine abancusha bakaipunwina no kufilwa.+ Bakekatwa insoni nga nshi, pantu bakafilwa. Ukuseebana kwabo ukwa muyayaya takwakalabwe.+ 12  Lelo, mwe Yehova wa mabumba, muceeceeta abalungama,+ mumona imfyo no mutima.+ Lekeni nkamone ifyo mukabakanda;+ pantu kuli imwe e ko nasokolwela umulandu wandi.+ 13  Imbileni Yehova, mwe bantu! Lumbanyeni Yehova! Pantu napokolola umweo wa mulanda ukufuma mu minwe ya ncitatubi.+ 14  Bube ubwatiipwa ubushiku ubo nafyelwemo! Ubushiku mayo amfyelemo bwiba ubwapaalwa!+ 15  Abe uwatiipwa uwashimikile tata ilyashi lisuma ilya kuti: “Nakufyalwa umwana mwaume!” Amulengele ukusekelela nga nshi.+ 16  No yo muntu abe nge misumba iyo Yehova aonaula ukwabula no kulanguluka.+ Kabili aleumfwa ukulila ulucelo ne penga lya kusoka pa nshita ya kasuba pa kati.+ 17  Nga cinshi ashanjipaile fye mwi fumo, na mayo nga ali e nshiishi yandi kabili nga aimite ifumo umuyayaya?+ 18  Nga cinshi ico nafumiine mwi fumo,+ ku kumona ukucucutika no bulanda,+ ne nshiku shandi ukupwila mu nsoni?+

Amafutunoti