Tinikeni pa kuti muye ku filimo

Tinikeni pa kuti mumone imitwe iilimo

Inte sha kwa Yehova

Saleni ululimi Cibemba

Yeremia 16:1-21

16  Kabili icebo ca kwa Yehova caishile kuli ine no kutila:  “Wikoopa, kabili wikafyala abana abaume na bana banakashi muno muntu.+  Pantu ifi e fyo Yehova asosa pa bana abaume na bana banakashi abafyalilwa muno muntu, na pali banyina ababafyala na bashibo abalenga ukuti bafyalwe muli cino calo.+ Atila,  ‘Bakafwa ku malwele.+ Tabakabalooshe,+ kabili tabakabashiike.+ Bakaba ngo mufundo pa mushili;+ kabili bakafwa ku lupanga na ku cipowe,+ kabili ifitumbi fyabo fikaba ifya kulya fya fyuni fya mu lwelele ne fya nama sha pe sonde.’+  “Pantu Yehova atila, ‘Wikengila mu ng’anda ya mutebeto uwa baleloosha, kabili wikaya ku kuloosha kabili wikabalilila ubulanda.’+ “‘Pantu nimfumya umutende pali aba bantu,’ e fyasosa Yehova, ‘kumo ne cikuuku no luse.+  Kabili abacindami na balanda bakafwa muli cino calo. Tabakashiikwe,+ kabili abantu tabakabalooshe, kabili abantu tabakaitetaule+ nangu ukubeya ulupala.+  Kabili tabakapeelwe ifya kulya fya kubasansamusha pa kuloosha abafwa;+ nangu ukupeela kapu wa cisansamushi ku ufwililwe wishi nangu uufwililwe nyina.+  Kabili wikengila mu ng’anda ya maliila no kwikala pamo na bo ku kulya no kunwa.’+  “Pantu Yehova wa mabumba, Lesa wa kwa Israele atila, ‘Moneni, mu nshiku shenu nkafumya muli imwe muli cino calo, ishiwi lya kusansamuka ne shiwi lya kusekelela, ne shiwi lya kwa shibwinga ne shiwi lya kwa nabwinga.’+ 10  “Kabili ilyo waeba aba bantu ifi fyonse kabili na bo bakweba abati, ‘Cinshi ico Yehova alandila ukuti ubu bucushi bonse bukesa pali ifwe? Bubi nshi tucitile kabili lubembu nshi tucitile kuli Yehova Lesa wesu?’+ 11  na iwe ukabebe auti, ‘“Pa mulandu wa kuti bashinwe balinshile,”+ e fyasosa Yehova, “kabili balekonka balesa bambi no kubabombela no kubafukamina.+ Lelo bashile ine, kabili tabasungile amafunde yandi.+ 12  Na imwe namubifya ukucila bashinwe,+ kabili moneni mule-enda cila muntu mu kutalama+ kwa mutima wakwe pa kukanang’umfwila.+ 13  Kabili nkamupoosa ukufuma muli cino calo+ no kumutwala ku calo ico mushaishiba+ kabili ico bashinwe bashaishibe, kabili kulya e ko mukabombela balesa bambi+ ubushiku na kasuba, pantu nshakamupaale.”’ 14  “‘E ico, moneni! inshiku shileisa,’+ e fyasosa Yehova, ‘ilyo tacakasoswe aciti: “Na pali Yehova uwafumishe abana ba kwa Israele mu calo ca Egupti!”+ 15  lelo cikasoswa aciti: “Na pali Yehova uwafumishe abana ba kwa Israele mu calo ca ku kapinda ka ku kuso na mu fyalo fyonse ifyo abatamfiisheko!” kabili nkababwesesha ku calo cabo, ico napeele ifikolwe fyabo.’+ 16  “‘Moneni, nketa abalondo abengi,’ e fyasosa Yehova, ‘na bo bakabaloba; na pa numa nketa abalunshi abengi,+ na bo bakabalunga mu mpili shonse na mu tupili tonse na mu ncengo shonse.+ 17  Pantu amenso yandi yalamona imibele yabo yonse. Tayafisama ku menso yandi, nangu ni membu shabo tashafisama ku menso yandi.+ 18  Kabili nkabalilapo ukubakanda pa filubo fyabo fyonse+ no lubembu lwabo, pa mulandu wa kukowesha icalo candi.+ Baisusha ifitumbi ifya bunani ne fya kuselausha fyabo mu calo candi.’”+ 19  Mwe Yehova, mwe maka yandi, mwe cubo candi, mwe ca kufulumukilamo candi mu bushiku bwa macushi,+ aba mu nko bakesa kuli imwe ukufuma ku mpela she sonde,+ no kusosa abati: “Ifikolwe fyesu fyaishibe ubufi+ ne fya fye ne fintu ifishingaafwa kantu.”+ 20  Bushe umuntu kuti apanga balesa? Ifyo apanga te balesa ba cine iyo.+ 21  “E ico, moneni, nkabalenga bakeshibe; kabili pali ilya nshita nkabalenga bakeshibe ukuboko kwandi na maka yandi,+ kabili bakeshiba ukuti ishina lyandi nine Yehova.”+

Amafutunoti