Esaya 38:1-22

38  Awe mu nshiku shilya Hisekia alilwele ubwa kufwa.+ E ico Esaya+ mwana Amose kasesema aile kuli ena no kumweba ati: “Yehova atila, ‘Eba aba mu ng’anda yobe ifya kucita,+ pantu iwe ukufwa kwena ulefwa kabili tawabe no mweo.’”+  Awe Hisekia apilibukile ku cibumba,+ alapepa kuli Yehova+  no kutila: “Napapaata, mwe Yehova, ibukisheni+ ifyo naenda+ mu cishinka+ no mutima onse+ ku cinso cenu kabili nalicita icisuma mu menso yenu.” Awe Hisekia alililile nga nshi.+  Kabili amashiwi+ ya kwa Yehova yaishile kuli Esaya, ayati:  “Kabiye, kabili usose kuli Hisekia, auti: ‘Yehova Lesa wa kwa Davidi icikolwe+ cobe atila: “Ning’umfwa ipepo lyobe.+ Nimona ifilamba fyobe.+ Mona ndelundako imyaka ikumi na isano (15) ku nshiku shobe;+  kabili nkapokolola iwe na uno musumba ku mfumu ya Asiria, kabili nkacingilila uno umusumba.+  Kabili ici e cishibilo icafuma kuli Yehova ica kukulanga ukuti Yehova akacita ifyo asosele:+  Mona, icinshingwa icili pa matabo, ico akasuba+ kalengele ukuba pa matabo ya kwa Ahasi, ndecilenga ukubwelela ku numa amatabo ikumi (10).”’”+ Awe akasuba kabwelele ku numa amatabo ikumi ukufuma pa matabo apo kali.+  Aya e mashiwi Hisekia imfumu ya Yuda alembele ilyo alwele+ no kupola ku bulwele bwakwe.+ 10  Ine natile: “Mu nshiku shandi nkaya mu mpongolo+ sha ku Nshiishi.*Nabampoka inshiku shandi ishashala.”+ 11  Natile: “Nshakamone Jah, cine cine nshakamone Jah, mu calo ca ba mweo.+Nshakaloleshe na kabili pa bantunse, nkaba na bekashi ba mu calo ca mfwa. 12  Ubwikalo bwandi nabutintwa+ no kufumishiwa kuli ine nge tenti lya bacemi.Nimfunga ubumi bwandi kwati ni kapikula wa nsalu;Bamputula+ nga filya baputula insalu ku ca kupikwilako.Ukutula akasuba ukufika ubushiku mulendekelesha fye.+ 13  Naisansamusha ukufika ulucelo.+Atwalilile ukufunaula amafupa yandi kwati ni nkalamo;+Ukutula akasuba ukufika ubushiku mulendekelesha fye.+ 14  Ndalongofyanya kwati ni pwele;+Ndelila fye nge nkunda.+Amenso yandi yalolekesha ku muulu:+‘Mwe Yehova, ndecula. Ngafweni.’+ 15  Cinshi ndesosa, kabili cinshi na o alasosa kuli ine?+Umwine alicitapo fimo kale.+Nyenda bulanda bulanda imyaka yandi yonse mu kucula kwa mweo wandi.+ 16  ‘Mwe Yehova, ku mashiwi yenu e ko abantu babela aba mweo; kabili nge fyo caba kuli bonse, mu fyo mucita e mwaba amaka ya bumi bwandi.+Kabili mukamposha no kunsunga uwa mweo.+ 17  Moneni! Ukucila ukuba umutende naponenwa no bubi;+Kabili imwe mwatemwa umweo wandi kabili tamu-ulekele ukuya ku cilindi ca bonaushi.+Pantu mwapoosa ku numa yenu imembu shandi shonse.+ 18  Pantu Inshiishi* te kuti imulumbanye;+ imfwa na yo te kuti imucindike.+Abaleya mu nindi te kuti basubile mu cishinka cenu.+ 19  Uwa mweo, uwa mweo, e wingamulumbanya,+Nge fyo na ine ndecita buno bushiku.+Wishi kuti asambilisha+ abana bakwe icishinka cenu. 20  Mwe Yehova, mpususheni,+ kabili tukalisha inyimbo sha pa filimba fyandi ifya nsale+Inshiku shonse isha mweo wesu pa ng’anda ya kwa Yehova.’”+ 21  Kabili Esaya atile: “Lekeni babuule icimamantwa ca makunyu ayauma no kusuba pa cipute,+ pa kuti apole.”+ 22  Nomba Hisekia aipwishe ati: “Bushe cishibilo nshi ica kulanga ukuti nkaya ku ng’anda ya kwa Yehova?”+

Amafutunoti

Moneni Icipande calenga 3 ica Ifyalundwako.
Moneni Icipande calenga 3 ica Ifyalundwako.