Bonse fye tufwaya ukwikala mu calo umwaba umutende. Ukufuma fye na kale, intungulushi mu fyalo ifyalekanalekana shalyesha ukupwisha ifimfulunganya no kulenga mu calo mwaba umutende. Inshita shimo, ishi intungulushi shilacita ifilenga mu calo mwaba umutende. Nomba ku ca bulanda, nga papita fye inshita iinono mu calo mulaba ifimfulunganya na kabili. Bushe kukabako inshita ilyo mwi sonde lyonse mukaba umutende? Ee! Moneni ifyo twingasambililako kuli Yesu.

Ifyo Yesu akacita

 Baibo yalilondolola ifyo Yesu ali no kucita nomba line pa kulenga mwi sonde lyonse mwaba umutende.

•   “[Yesu] bakamwinika ukuti . . . Kateka wa Mutende. Ukuteka kwakwe kukaba fye konse kabili umutende tawakapwe.” (Esaya 9:6, 7) Apo Yesu ni Mfumu ya Bufumu ba kwa Lesa, akalenga mwi sonde lyonse mukabe umutende umuyayaya.

•   “Akapususha umupiina uulepunda mutuule . . . e lyo no uushakwata bakumwafwa.” (Amalumbo 72:12-14) Yesu akabomfya amaka bamupeela pa kulenga mu calo mukabe umulinganya, na pa kupwisha inkondo, ubunkalwe no kucula.

•   “Takwakabe uluko ulukemya ulupanga pa kuti lulwishe uluko lunankwe, kabili takwakabe uluko ulukasambilila ifya kulwa inkondo na kabili.” (Esaya 2:4) Ilyo Yesu akalateka, abantu tabakalesambilila ifya kulwa inkondo, lelo ba kulasambilila ifyo balingile ukucita pa kuti mu calo mube umutende.

 Pa kuti mwishibe ifyo Yesu akacita pa kulenga mwi sonde lyonse mukabe umutende e lyo ne fyo mwingacita pa kuti mukapusuke, tambeni vidio iipi iitila Bushe Ubufumu bwa kwa Lesa ni Cinshi?

Ifyo Yesu alesambilisha

 Na muno nshiku mwine, ifyo Yesu alesambilisha ilyo ali pano isonde fyalilenga abantu abengi nga nshi baba no mutende. Mu Lyashi lya pa Lupili, Yesu alilandile pa mashinte ya mafunde ayalenga abantu balaumfwana bwino. Moneni fimo ifyo Yesu asambilishe.

•   “Ba nsansa abalenga paba umutende.” (Mateo 5:9) Yesu akoseleshe abasambi bakwe ukuti tabalingile ukupelela fye pa kukanacita ifingalenga bapusana, lelo balingile no kucita ifingalenga kwaba umutende.

•   “Uye ubalilepo ukumfwana na munonko e lyo ubwele utuule ica bupe cobe.” (Mateo 5:23, 24) Yesu akoseleshe abalekutika kuli ena ukuti nga bapusana, balingile ukutendeka bwangu ukumfwana na kabili. Asambilishe ukuti nga tuleumfwana bwino na bantu banensu e lyo twingaba ifibusa sana na Lesa.

•   “Lekeni ukupingula abantu pa kuti na imwe bekamupingula.” (Mateo 7:1) Yesu atusokele ukuti tatulingile ukulapingula abanensu bubi bubi nelyo ukwenekela ukuti balacita ifyo ifwe tushingakumanisha ukucita, pantu ici kuti calenga twapusana. Yesu asambilishe abasambi bakwe ukuti, mu cifulo ca kulafwailisha ifilubo, balingile ‘ukulaelela’ abantu banabo nga balufyanya.—Luka 6:37.

 Abantu mu ncende ishalekanalekana balakonka ifyo Yesu alesambilisha. Na mu ncende umwaba sana ubunkalwe ne fimfulunganya, mwaliba abantu abasambilila ifya kumfwana bwino na bantu banabo ukwabula ukukalipa, kabili nga kwaba ababakalifya, balababelela uluse no kubalanga ukuti balibatemwa.

 Pa kuti mumone ifyo abantu bamo baishileba aba mutende pa mulandu wa kuti balakonka ifyo Yesu alesambilisha, belengeni icipande citila “Ifyo Twingaba no Mutende Nangu ca Kuti Twikala mu Calo Umwaba Inkondo.”