Tinikeni pa kuti muye ku filimo

TURKMENISTAN

Abo Bakaka pa Mulandu wa fyo Basuminamo

Abo Bakaka pa Mulandu wa fyo Basuminamo

Ukufuma mu June ukufika mu November mu 2018, abalashi ba buteko bwa calo ca Turkmenistan balikakile ba Nte 9 abakeene ukwingila ubushilika pa mulandu wa kampingu yabo. Ba Ihlosbek Rozmetov, ba Veniamin Genjiyev, ba Maksat Jumadurdiyev, ba Isa Sayayev, ba Ruslan Artykmuradov, ba Sokhbet Agamyradov, ba Serdar Atayev, na ba Gurbangylych Muhammetgulyyev babapingwilile ukukakwa pa mwaka umo, e lyo ba Mekan Annayev bena babapingwilile ukukakwa imyaka ibili.

Aba ba Nte 9 abacaice e bo bakakile nomba line mu Turkmenistan pa mulandu wa kukaana ukwingila ubushilika. Na kabili mu January mu 2018, ubuteko bwasanguke ba Arslan Begenjov na ba Kerven Kakabayev umulandu wa kukaana ukwingila ubushilika kabili babapingwilile ukukakwa mu cifungo pa mwaka umo. * Ukufuma mu February mu 2015, ba Arslan Begenjov na ba Kerven Kakabayev e ba Nte abaume abo babalilepo ukukakwa pa mulandu wa kukakana ukwingila ubushilika mu Turkmenistan. Aba ba Nte babili e lyo na bambi 8 pali balya 9 abo bakakile nomba line, bababika mu cifungo beta ukuti Seydi prison (LBK-12). Muli ici cifungo e mo bakaka na ba Bahram Hemdemov kabili emo baba pa myaka ukucila pali itatu.

Ba Bahram Hemdemov Balibafyengele no Kubakaka

Pa 14 March mu 2015, bakapokola mu Turkmenabad balingilile ba Nte abalelongana mu mutende mu ng’anda ya ba Bahram Hemdemov. Ba Nte 38 balibekete kabili babapeele umulandu wa kupepa ukwabula insambu. Ba Nte 30 balibalipilishe indalama, e lyo abali 8 balibakakile inshiku 15, kabili bonse aba balibacushishe sana. Mu kuya kwa nshita, icilye ca Lebap Regional Court capingwile ukuti ba Bahram Hemdemov babakake imyaka 4. Apo ifintu fyalibipile sana mu cifungo, ba Bahram Hemdemov balitendeke ukulwala. Ukufika na nomba tababafumya mu cifungo, kabili tabababika pa bafungwa abo ubuteko bubelela uluse.

Ba Nte Tabalabapeela Insambu sha Kupepa ne sha Kukaana Ukucitako Ifyapusana ne fyo Basuminamo

Mu 2015 na mu 2016, akabungwe ka United Nations Human Rights Committee (CCPR) kalipingwile bwino imilandu 10 isho ba Nte abaume batwele kuli aka kabungwe pantu balibakakile no kubacusha pa kukaana ukwingila ubushilika pa mulandu wa fyo basuminamo. Pali ino nshita kwashala imilandu 7 isho akabungwe ka CCPR takalapingula isho ba Nte batwala kuli aka kabungwe pa mulandu wa kuti ubuteko bwa calo ca Turkmenistan bwalibekala pa nsambu shabo isha kukaana ukwingila ubushilika pa mulandu wa fyo basuminamo.

Muli lipoti ya mu April mu 2012, akabungwe ka CCPR kaebele ubuteko bwa calo ca Turkmenistan ukutila “amafunde ya ici calo ayalanda pa kulembesha utubungwe twa mapepo yafwile ukucindika insambu abantu bakwata isha kupepa ne sha kukaana ukucita ifyapusana ne fyo basuminamo, nga fintu ulupapulo lwa [International Covenant on Civil and Political Rights] lulanda.” Mu 2008, ba Nte balitwele ifipepala fya kulembeseshapo icilonganino ku buteko, lelo ubuteko tabwabebapo nangu cimo.

Bushe Icalo ca Turkmenistan Cikaleka Ukucusha ba Nte?

Inte sha kwa Yehova balitemwa sana pa fyo ubuteko bwa calo ca Turkmenistan bwafumishe ba Nte mu cifungo mu 2014 pa mulandu wa kuti balibafyengele. * Nangu ca kuti ifyalo fimbi fyalyebele icalo ca Turkmenistan ukulacindika insambu abantu bakwata isha kukaana ukwingila ubushilika pa mulandu wa fyo basuminamo, ubuteko bwa Turkmenistan tabwacindike ishi nsambu ilyo bwapeele ba Nte imilandu nomba line. Ba Nte baleenekela ukuti ubuteko bwa calo ca Turkmenistan bukatendeka ukukonka ifyo akabungwe ka CCPR kapingwile. Aka kabungwe kalandile ukuti icalo ca Turkmenistan cilingile ukucindika insambu shonse isho abantu bakwata, maka maka insambu sha kukaana ukwingila ubushilika pa mulandu wa fyo basuminamo.

Ifyalecitika Ukufuma mu 2008

  1. Pa 12 December mu 2018

    Ba Nte 12 babakaka.

  2. Pa 28 November mu 2018

    Ba Gurbangylych Muhammetgulyyev babapeela umulandu no kubakaka pa mwaka umo pa kukaana ukwingila ubushilika pa mulandu wa fyo basuminamo.

  3. Mu September mu 2018

    Apo kateka wa calo ca Turkmenistan ali no kufumya abafungwa bamo mu cifungo pa 24 September, abalashi ba cifungo baeba ba Kerven Kakabayev, ba Mekan Annayev, na ba Veniamin Genjiyev ukutila nabo bene balababelela uluse no kubafumya mu cifungo. Nangu ca kuti amashina ya aba ba Nte yali pa bafungwa kateka ali no kufumya mu cifungo, tababafumishe mu cifungo ilyo abafungwa 1,722 babafumishe pa 25 September.

  4. Pa 28 August mu 2018

    Ba Serdar Atayev babapeela umulandu no kubakaka pa mwaka umo pa kukaana ukwingila ubushilika pa mulandu wa fyo basuminamo.

  5. Pa 27 August mu 2018

    Ba Sokhbet Agamyradov babapeela umulandu no kubakaka pa mwaka umo pa kukaana ukwingila ubushilika pa mulandu wa fyo basuminamo.

  6. Pa 13 August mu 2018

    Ba Ruslan Artykmuradov babapeela umulandu no kubakaka pa mwaka umo pa kukaana ukwingila ubushilika pa mulandu wa fyo basuminamo.

  7. Pa 9 August mu 2018

    Ba Isa Sayayev babapeela umulandu no kubakaka pa mwaka umo pa kukaana ukwingila ubushilika pa mulandu wa fyo basuminamo.

  8. Pa 17 July mu 2018

    Ba Veniamin Genjiyev na ba Maksat Jumadurdiyev babapeela umulandu no kubakaka pa mwaka umo pa kukaana ukwingila ubushilika pa mulandu wa fyo basuminamo.

  9. Pa 11 July mu 2018

    Ba Ihlosbek Rozmetov babapeela umulandu no kubakaka pa mwaka umo pa kukaana ukwingila ubushilika pa mulandu wa fyo basuminamo.

  10. Pa 26 June mu 2018

    Ba Mekan Annayev babapeela umulandu no kubakaka pa myaka ibili pa kukaana ukwingila ubushilika pa mulandu wa fyo basuminamo.

  11. Pa 29 January mu 2018

    Ba Kerven Kakabayev babapeela umulandu no kubakaka pa mwaka umo pa kukaana ukwingila ubushilika pa mulandu wa fyo basuminamo.

  12. Pa 17 January mu 2018

    Ba Arslan Begenjov babapeela umulandu no kubakaka pa mwaka umo pa kukaana ukwingila ubushilika pa mulandu wa fyo basuminamo.

  13. Pa 12 May mu 2017

    Ubuteko bwa calo ca Turkmenistan bwafumya ba Mansur Masharipov abo baikete pa 30 June mu 2016.

  14. Pa 18 August mu 2016

    Ba Mansur Masharipov babapeela umulandu apabula ifishinka kabili babakaka umwaka umo.

  15. Mu July mu 2016

    Akabungwe ka CCPR kalanda ifyo kapingwile imilandu 6 umwali ba Nte abo bapeele imilandu pa kukanaingila ubushilika pa mulandu wa fyo basuminamo.

  16. Pa 14 December mu 2015

    Akabungwe ka CCPR kalanda ifyo kapingwile imilandu itatu umwali ba Nte abo bapeele imilandu pa kukanaingila ubushilika pa mulandu wa fyo basuminamo. Balipingwile bwino umulandu na umbi pa 19 May mu 2015.

  17. Pa 19 May mu 2015

    Ba Bahram Hemdemov babekata pa mulandu wa fya mapepo kabili babakaka imyaka 4. Ilyo bashilababika mu cifungo, balibekete pa myeshi ibili ukwabula ukubalubulwisha.

  18. Mu February na mu March mu 2015

    Ba Nte babili abo bakakile pa mulandu wa kukaana ukwingila ubushilika babafumya mu cifungo. Akabungwe ka CCPR kalanda ifyo kapingwile bwino umulandu uo Nte umo bamupeele pa kukaana ukwingila ubushilika pa mulandu wa fyo asuminamo.

  19. Pa 18 November mu 2014

    Ba Nte babili babakaka pa kukaana ukwingila ubushilika pa mulandu wa fyo basuminamo.

  20. Pa 22 October mu 2014

    Kateka wa calo ca Turkmenistan abelela ba Nte 8 uluse kabili abafumya mu cifungo.

  21. Pa 30 September mu 2014

    Ba Nte 7 babakaka pa kukanaingila ubushilika pa mulandu wa fyo basuminamo, e lyo ba Nte bambi babili babakaka pa milandu iyabula ifishinka iyo babapeele pa mulandu wa fya mapepo.

  22. Pa 2 September mu 2014

    Ubuteko bwa calo ca Turkmenistan bwafumya ba Bibi Rahmanova abo bapingwile ukubika mu cifungo pa myaka 4 kabili babakakila ku nse.

  23. Pa 18 August mu 2014

    Ba Bibi Rahmanova babapeela imilandu yabula ifishinka kabili bapingula ukubakaka imyaka 4.

  24. Pa 25 July mu 2014

    Ba Nte 5 babakaka mu cifungo pa kukanaingila ubushilika pa mulandu wa fyo basuminamo, e lyo bambi babili pa milandu yabula ifishinka iyo babapeele pa mulandu wa fya mapepo.

  25. Pa 6 April mu 2014

    Ba Nte 26 babekata, 13 pali aba tapali icili conse ico bacitile icingalenga babekate. Aba ba Nte 13 babebele ukulipila indalama pa kuti babalekeleko.

  26. Mu November mu 2013

    Ba Nte 8 batwalilila ukuba mu cifungo pa kukanaingila ubushilika pa mulandu wa fyo basuminamo, e lyo Nte umo atwalilila ukuba mu cifungo pa milandu yabula ifishinka iyo bamupeele pa mulandu ne fya mapepo.

  27. Pa 29 August mu 2013

    Ba Nte batatu batwala imilandu ku kabungwe ka CCPR pa mulandu wa kuti ubuteko bwa calo ca Turkmenistan tabucindike insambu shabo isha kukaana ukwingila ubushilika pa mulandu wa fyo basuminamo.

  28. Pa 1 May mu 2013

    Ba Nte babili batwala imilandu ku kabungwe ka CCPR pa mulandu wa kuti ubuteko bwa calo ca Turkmenistan tabucindike insambu shabo isha kukaana ukwingila ubushilika pa mulandu wa fyo basuminamo.

  29. Pa 24 January mu 2013

    Bakapokola 30 baingilila ba Navruz Nasyrlayev mu ng’anda no kubasansa ninshi papitile fye imilungu iinono ukufuma apo ubuteko bwa calo ca Turkmenistan bwaishibile ukuti ba Nte nabatwala imilandu ku kabungwe ka CCPR. Aba bakapokola bapuma ulupwa lwa ba Navruz Nasyrlayev e lyo na beni abaishile mu kubatandalila.

  30. Pa 7 September mu 2012

    Ba Nte 10 batwala imilandu ku kabungwe ka CCPR pa mulandu wa kuti ubuteko bwa calo ca Turkmenistan tabucindike insambu shabo isha kukaana ukwingila ubushilika pa mulandu wa fyo basuminamo. Ba Navruz Nasyrlayev e bali pa ntanshi mu kutwala imilandu ku kabungwe ka CCPR.

  31. Pa 21 August mu 2008

    Inte sha kwa Yehova baya mu kulembesha icilonganino cabo ku buteko bwa calo ca Turkmenistan.

^ para. 3 Inte sha kwa Yehova abakaana ukwingila ubushilika pa mulandu wa fyo basuminamo balabapeela imilandu ukubomfya ifyaba mu cipandwa 219(1) ica mu lupapulo lwa Criminal Code icitila: “Umuntu nga akaana ukwingila ubushilika ukwabula imilandu iyo amafunde yalandapo ukuti e yo engakaanina ubushilika, bafwile ukumupeela imilimo iyakosa iyo afwile ukubomba ukufika ku myaka ibili pa kuti bamukande, nelyo kuti bamukaka ukufika ku myaka ibili.”

^ para. 10 Belengeni icipande icileti “Turkmenistan Releases Jehovah’s Witnesses Imprisoned for Their Faith” e lyo ne cileti “Mother Released From Prison in Turkmenistan.”