Aba mu cilye icikalamba ica mu Israel e lyo na bakapokola balicingilila insambu ba Nte bakwata isha kulongana pamo mu kupepa. Icilye capingwile nomba line ukuti abakalamba ba musumba wa Ra’anana balingile ukusuminisha ba Nte ukulonganina mu cikulwa ca Metro West Sports Center ico basonkeele ukuti balonganinemo ukulongana kukalamba kubili. Abakalamba ba mu musumba baleseshe ba Nte ukulonganina muli ici cikuulwa ninshi kwashala fye ubushiku bumo ukuti ukulongana kutendeke. Icalengele bacite ifi ni co aba mu filonganino fya mapepo fimbi balibapatikishe ukuti besuminisha ba Nte ukulonganinamo.

Inte sha kwa Yehova shalisuminishenye na bakalamba ba musumba ukuti bakalonganinemo ukulongana kukalamba pa 18 April na pa 2 May mu 2015. Mu April pa 15, ba Nte balimwene ukuti limbi abakalamba ba musumba kuti babakaanya ukulonganina muli ici cikuulwa pantu umubomfi mukalamba uwa mu musumba alandile ukuti alemona kwati ukulongana kwa ba Nte ukwali no kubako pa 18 April kuti kwaleta ifimfulunganya. Nangu ca kuti bakapokola balilandile ukuti bakabako pa kuti kwikaba ifimfulunganya, abakalamba ba musumba wa Ra’anana balyebele ba Nte ubushiku bwakonkelepo ukuti bekalonganina muli ici icikuulwa. Aba ku milabasa balandile ukuti icalengele bacite ifi, ni co aba mu filonganino fya mapepo baebele abakalamba ba mu musumba ukuti bakaleka ukubatungilila nga basuminisha ba Nte ukulongana.

Nangu ca kuti ilyo line fye ba Nte balitwele umulandu ku cilye ca Lod District Court pa kuti cebe abakalamba ba musumba ukubasuminisha ukulongana, icilye califililwe pantu inshita yalicepele apo ukulongana kwa kubalilapo kwali no kubako pa 18 April. Icawemeko ca kuti ba Nte balikumanishe ukusonkela icikuulwa cimbi, nangu ca kuti indalama balipile shalicilile imiku 6 isho balipile pa kusonkela icikuulwa ca sports center.

Pa 29 April, icilye ca Lod District Court calandile kuti abakalamba ba musumba wa Ra’anana balingile ukusuminisha ba Nte ukulongana, no kutila filya bacitile “baliikele pa nsambu sha kupepa, isha kulongana, isha kucindikwa, e lyo ne sha buntungwa bwa kucitako ifyo abantu bambi bacita, isho ba Nte bakwata.” Ilyo line fye abakalamba ba musumba balitwele umulandu ku cilye cikalamba ica High Court of Justice kabili pa 1 May, ici cilye na co calisumiine ku fyo icilye cinono capingwile. Ilyo babwekeshepo ukutwalako uyu umulandu na kabili icilye calandile ukuti ifyo icilye cinono capingwile fyali fye bwino.

Ifyo icilye ca High Court of Justice capingwile fyalengele Inte sha kwa Yehova balonganine muli ici cikuulwa pa 2 May. Intungulushi sha mapepo muli uyu umusumba, ukubikako fye no mukalamba wa bashimapepo, e lyo na ba mu cilonganino ca ultraorthodox ico abantu baishiba ukuti mwaba aba lubuli, balyumfwene ukuti “balongane ku kupepa” uko baitile abantu 1,500. Bakumanine pa ntanshi ya cikuulwa ico ba Nte 600 balonganinemo. Nangu ca kuti batile baile mu kupepa batendeke ukucita ifimfulunganya. Bamo pali aba balitendeke no kucusha ba Nte ukubikako fye na banakashi na bana. Balitendeke ukubatuka, ukubafwishila amate, ukubasunka, no kubatobela ama motoka. Bwangu bwangu bakapokola balicingilile ba Nte. Ifyo bakapokola bacitile fyalengele ba Nte balongana bwino, kabili balibwelelemo ku mwabo mu mutende.

Inte sha kwa Yehova mu Israel shalitasha sana ku buteko pa fyo bacingilile insambu shabo isha kulongana pamo no kupepa mu mutende.