Ifyo wingacita

Wilaisuula! Wilamona kwati iwe tawakwata amano ya ku sukulu pantu ico kuti calenga wilabikako amano. Nga watampa ukulaisuula, ulingile ukuyeba ukutila kwaliba ifyo wacenjelamo. Umfwa ifyo Paulo acitile ilyo abantu balemuseka napamo pa milandile yakwe ukuti tayali bwino nangu bashakwetepo ifishinka. Abebele ati: “Nangu nshacenjela mu milandile, mu kwishiba mwena nalicenjela.” (2 Abena Korinti 10:10; 11:6) Paulo alishibe umo ashacenjele sana. Lelo alishibe ne fyo acenjelemo. Inga iwe? Ni mwi umo wacenjela? Nga tawishibe umo wacenjela, kuti waipushako umukalamba uo mumfwana nankwe. Kuti akweba umo ucita bwino no kukwafwa ukubika amano kuli ifyo fintu.

Bika amano ku kubelenga. Nga ulefwaya ukusambilila, icifwaikwa sana kubelenga. Nangu ulefwaya nangu taulefwaya ulingile fye ukulabelenga. Ukubelenga kusuma nangu ca kuti te bengi bakutemwa. Na kuba nga wabikako fye amano kuti watampa ukumfwa bwino ukubelenga. Nomba pa kuti ulebelenga bwino, ulingile ukwishiba ifya kubomfya bwino inshita. Uleibukisha ukuti ilyo uli pa sukulu, ico ufwile ukubikako sana kubelenga. Kwena Baibolo yalilanda ukuti kwaliba “inshita ya kuseka” ne “nshita ya kusansamuka.” (Lukala Milandu 3:1, 4; 11:9) E ico, ufwile ulafwaya ukukwatako ne nshita ya kwangala, nga filya ciba ku baice abengi. Lelo pali Lukala Milandu 11:4, patusoka ukuti: “Uulolekesha imikuukile ya mwela takatande; no umona imyendele ya makumbi takaseepe.” Finshi tulesambililako kuli ici? Ulebalilapo ukucita ifyacindama. Uletala wabelenga e lyo waya mu kwangala. Wilasakamana, inshita ya kucita fyonse fibili kuti yamoneka!

Filya ukwimya nshimbi kulenga imicincili ukukosa, e fyo no kubelenga kulenga walacita bwino ku sukulu.