Limbi ulepushapo ati, “bushe caliba fye bwino ukucita ubulalelale, maka maka ifi abengi balacita ico?”

Tala Tontonkanya!

Icishinka: Te bonse abacita ubulalelale.

Ca cine, nalimo ulabelengapo ukuti abaice abengi balacita ubulalelale. Ku ca kumwenako, ifyo bafwailishe ku America filanga ukuti ilyo abana be sukulu ababa ku sekondari balepwisha isukulu, ninshi abengi balicitapo ubulalelale. Lelo nangu ca kutila bengi bacita ubulalelale, icishinka ca kuti te bonse.

Cinshi cicitika ku bacita ubulalelale? Abafwailisha pali ili lyashi basanga ukuti abaice abengi abacita ubulalelale balakwata aya amafya twalalandapo.

Ukumfwa Ububi. Abaice abengi abacitapo ubulalelale balanda ukuti balomfwa ububi pa numa.

Ukucita ubulalelale cimo no kubuula icikope icisuma e co wabika pa mwinshi ukuti balekumwinapo ulukungu

Ukukanacetekelwa. Pa numa ya kucita ubulalelale, balaipusha ati, ‘Ni nani umbi uo uyu muntu nalaala nankwe acitapo nankwe ubulalelale?’

Icitemwiko Cilapwa. Abakashana abengi bafwaya umuntu uwingabacingilila, te wa kubabomfya fye. Abalumendo abengi nabo tabatemwa sana umukashana uusumina ukulaala nabo.

Icishinka ca Kuti: Umubili obe walicindama sana, wilalenga baleusaalula. Uleumfwila amafunde ya kwa Lesa ayakaanya ubulalelale pa kuti cilemoneka ukuti walikwata imibele isuma. Ilyo ukoopa nelyo ukuupwa, e lyo ukalaipakisha icupo no mwina mobe ukwabula ukumfwa ububi nelyo ukusakamikwa pa mafya yesa ku balaala no ushili mwina mwabo.—Amapinda 7:22, 23; 1 Abena Korinti 7:3.