Ifi e fyo ufwile ukutontonkanyapo

Bushe Ifunde lya mu calo wikala lyatila umwana we sukulu afwile ukupelela mu gredi shani? Bushe walifika muli iyo gredi? Nga walekela isukulu pa kati, ninshi wasuula filya Baibolo ilanda ati ‘tulenakila ubuteko.’—Abena Roma 13:1.

Ukulekela isukulu pa kati kwaba kwati kutoloka ukufuma mwi shitima ilyo ushilafika uko uleya

Bushe walifika apo walefwaya ukupela mu masomo? Cinshi ufwaya ukucita ku ntanshi icalenga uleya ku sukulu? Nga tawaishiba ico wila ku sukulu, ulingile ukucishiba! Nga tawishibe ico wila, kuti waba kwati muntu uuninine ishitima lelo teshibe uko alefwaya ukuya. Kanshi lanshanya na bafyashi bobe ifyebo fili pa kamutwe kaleti “Ico Njila ku Sukulu.” Nga taulafika mu gredi iyo mwasuminishanya na bafyashi bobe, ninshi walekela isukulu pa kati.

Cinshi ulefwaila ukuleka isukulu? Napamo kuti wafwaya ukuleka isukulu pa mulandu wa kuti ulefwaya ukula-afwa ulupwa lobe mu fyo bakabila nelyo ukula-afwa bambi ukwishiba Lesa. Icishingawama ukulekelapo isukulu, kutiina amashindano nelyo ukukanafwaya ukucita ifya ku sukulu ifyo bakafundisha bakupeela. Tacanguka ukwishiba ico ulefwaila ukuleka isukulu e lyo no kumona nga ca kuti ico cili fye bwino nelyo tacili bwino. Nga waleka isukulu pa mulandu fye wa mafya ukwete, ukapapa ukuti ukakwata na yambi.

Ukulekela isukulu pa kati kwaba kwati kutoloka ukufuma mwi shitima ilyo ushilafika uko uleya. Ishitima kuti lyaba ilibi ukwendamo, e lyo na abo uninine nabo te kuti nalimo babe abantu abasuma, lelo nga watolokamo, te kuti ufike uko uleya no kuicena kuti waicena sana fye. E fyo cingaba nga walekela isukulu pa kati, kuti wafilwa ukusanga incito. E lyo nga waisanga, kuti ulefola indalama ishinono sana nga kulinganya ku sho wali no kulafola nga walipwile isukulu.

Ukucila ukulekela isukulu pa kati, ufwile ukubombesha pa kuti wapwisha amafya ukwata ku sukulu. Nga wacita ifi, ukalashipikisha amafya kabili ukaipekanya no kushipikisha amafya wingakwata nga watendeka ukubomba.

Ico Njila ku Sukulu

Umulandu ukalamba wila ku sukulu wa kuti, nga wakula ukasange incito iikakwafwa mu mikalile yobe no kukwafwa ukusunga ulupwa ukakwata ku ntanshi. (2 Abena Tesalonika 3:10, 12) Bushe walisalila libela incito wingatemwa ukubomba ne fisambililo ifingakwafwa ukuipekanya ukwisabomba iyo ncito? Pa kuti wishibe nga ca kuti amasambililo yobe yalekwafwa mu fyo ufwaya ukucita, asuka aya mepusho:

  • Finshi nacenjelamo sana? (Ku ca kumwenako, bushe ulomfwana bwino na bantu bambi? Bushe walitemwa ukupanga ifintu nangu ukulungisha ifyonaike? Bushe ulesha ukwishiba icilengele ubwafya ukwete ne fyo wingabupwisha?)

  • Ukulingana ne fyo nacenjelamo, ni ncito nshi ningabomba?

  • Ni ncito nshi shaba uko njikala?

  • Fisambililo nshi ndesambilila ifingangafwa ukusanga isho ncito?

  • Masambililo nshi yambi ayo nsambilila ayengangafwa ukusanga bwangu incito mfwaya?

Uleibukisha ukuti ico wila ku sukulu kusambilila ifintu ifingakwafwa ku ntanshi. Kanshi taulingile ukuya fye ulesambilila ukwabula ukupwisha isukulu pa mulandu fye wa kutiina ukuisakamana. Ico kuti caba kwati muntu uushilefwaya ukwikila mwi shitima nangu nafika.