Tinikeni pa kuti muye ku filimo

ABACAICE BEPUSHA UKUTI

Kuti Nacita Shani nga Naponenwa na Macushi?

Kuti Nacita Shani nga Naponenwa na Macushi?

 

Umuntu uuli onse kuti aponenwa na macushi. Baibolo itila: “Te lyonse ababutukisha bacimfya muli nakatango wa lubilo, kabili te lyonse aba maka bacimfya mu bulwi.” “Inshita ya fintu fyabula ukwenekela ifikila fye umuntu uuli onse.” (Lukala Milandu 9:11) Ici cisanshamo na bacaice bamo abaponenwa na macushi. Bushe bacitile shani? Moneni ifya kumwenako fibili.

REBEKAH

Abafyashi bandi balekene ilyo nali ne myaka 14.

Nalifililwe ukusumina ukuti abafyashi bandi nabalekana, nalemona kwati batata balefwaya fye inshita ya kubako beka. Apo batata balitemenwe sana bamayo, naletontonkanya ukuti cinshi bengalekela bamayo? Kabili cinshi benganshila?

Calinkosele ukwebako abantu ifyalecitika. Nshalefwaya ukulatontonkanyapo. Calinkalipe sana. Natampile ukusakamikwa sana, kabili nalefilwa ukulaala.

Ilyo nali ne myaka 19 bamayo balifwile kuli kansa. Bali cibusa candi.

Ukulekana kwa bafyashi bandi kwalibipile lelo imfwa ya bamayo yena yalicililenapo. Na nomba ncili ndaloosha. Kabili utulo e lyo tucililemo ukukanamoneka, kabili ncili ndasakamikwa sana.

Pa nshita imo ine nalisanga ifingi ifya kungafwa. Ku ca kumwenako, Amapinda 18:1 yalatusoka ukuti tatufwile ukulaitalusha ku banensu, e co ndesha ukukonka uku kufunda.

Apo ndi Nte ya kwa Yehova, ndabelenga impapulo shesu ishilanda pali Baibolo kabili shilankoselesha. Ulupapulo lumo ulwangafwile sana ilyo abafyashi bandi balekene, citabo citila Ifipusho Abacaice Bepusha, ne Fyasuko Ifingabafwa. Ndeibukisha nalebelenga icipandwa citila “Bushe Kuti Naba uwa Nsansa nga Ndeikala no Mufyashi umo Fye?” mwi buuku 2.

Ilembo limo ilyo natemwa sana ilingafwa ukucefyako ukusakamikwa lisangwa pali Mateo 6:25-34. Mu cikomo 27, Yesu aipwishe ukuti: “Nani pali imwe nga ca kuti alesakamikwa engalundako ubumi bwakwe panono?”

Ifyabipa fyakulacitikila fye abantu bonse, nomba nalisambilileko kuli bamayo ukuti ifyo tucita nga twakwata aya mesho e fyacindama. Balipitile mu mesho ayengi—ukulekana na batata e lyo no kulwala kansa—lelo nangu balepita muli ifi tabalesakamikwa sana, kabili balicetekele sana Lesa mpaka nelyo bafwile. Nshakalabe ifyo bansambilishe pali Yehova.

 Ifya kutontonkanyapo: Bushe ukubelenga Baibolo ne mpapulo shilanda pali Baibolo kuti kwamwafwa shani ilyo mwaponenwa na macushi?Amalumbo 94:19.

CORDELL

Ilyo nali ne myaka 17, nalimweneko uko batata balefwa. Ukufwilwa batata e cintu icabipisha mu bumi bwandi. Nalyumfwile sana ububi.

Nalifililwe ukusumina ukuti batata nabafwa, no kuti e bo bapombele mu nsalu. Nalemona kwati ‘bakabuuka mailo.’ Nalipelenganishiwe.

Ine no lupwa lwandi tuli Nte sha kwa Yehova, kabili icilonganino calitwafwile sana ilyo batata bafwile. Balitupeele ifya kulya, baliipeeleshe ukwikala na ifwe, kabili baliipalamike kuli ifwe pa nshita iitali. Ifi batwafwile fyalengele nshininkishe ukuti Inte sha kwa Yehova e Bena Kristu ba cine—Yohane 13:35.

Ilembo ilinkoselesha sana ni 2 Abena Korinti 4:17, 18. Litila: “Ubucushi tuculako bwa pa kashita fye kabili bwalyanguka, bukatuletela ubukata ubwapulamo kabili ubwa muyayaya pali nomba tatulebika imitima yesu pa fimoneka kano pa fishimoneka. Pantu ifimoneka fya pa kashita fye, lelo ifishimoneka fya muyayaya.”

Amashiwi yaba mu cikomo ca kulekeleshako yalansansamusha nga nshi. Ukucula kwa batata kwali fye kwa pa kashita kanono, lelo ifyo Lesa atulaya ku ntanshi fikabako umuyayaya. Imfwa ya batata yalilengele natontonkanya pa fyo nalecita mu bumi bwandi kabili yalengele njalule amatontonkanyo yandi.

Ifya kutontonkanyapo: Bushe amacushi kuti yalenga shani umuntu ukupanga bwino ifya kucita mu bumi?—1 Yohane 2:17