Elenganya ifi:

Ulefwaya ukuya ku parte lelo tawishibe abafyashi bobe nga balakusuminsha. Cinshi wingacita pali ifi?

  1. WIBEPUSHA—KABIYE FYE

  2. WIBEPUSHA—NO KUYA WIYAKO

  3. BEPUSHE—NO KUMFWA IFYO BALALANDA

1. WIBEPUSHA—KABIYE FYE

Ico Wingafwaila ukucita ici: Ufwaya ukulanga abanobe ukuti ulaicitila ifyo ulefwaya. Umona kwati walicenjela ukucila abafyashi bobe, e lyo taufwaya ukukonka ifyo balanda.—Amapinda 14:18.

Ifingafumamo: Abanobe kuti bakutasha, lelo bakasambililako icintu icibi kuli iwe, ne ci, bucenjeshi. Nga kuti wabepa abafyashi bobe, ninshi na banobe kuti wababepa. Abafyashi bobe nga baishiba, bakomfwa ububi no kumona ukuti walibasuula, ne co cikalenga balekulesha ukufuma pa ng’anda!—Amapinda 12:15.

2. WIBEPUSHA—NO KUYA WIYAKO

Ico Wingafwaila ukucita ici: Kuti watontonkanya ukuti ifyalacitika uko bakwitile te fisuma, e lyo na abo mwalayaba nabo tabakwata imibele isuma. (1 Abena Korinti 15:33; Abena Filipi 4:8) Lelo, kuti nalimo ulefwaya ukuyako nomba naufilwa ukupoka ulusa ku bafyashi bobe.

Ifingafumamo: Nga wakaana ukuyako pa mulandu wa kuti nawishiba ukuti ifileya mu kucitika te fisuma, ukeba abanobe ico ushailileko ukwabula no kupita mu mbali. Lelo nga wakaana ukuya pa mulandu fye wa kutiina ukupoka ulusa ku bafyashi bobe, kuti waumfwa ububi kabili kuti ulemona kwati ni we fye ushicita ifileetela abantu insansa.

3. BEPUSHE—NO KUMFWA IFYO BALALANDA

Ico Wingafwaila ukucita ici: Walishiba ukuti abafyashi balikwata amaka ya kukweba ifya kucita kabili ulafwaya ukukonka ifyo bakweba. (Abena Kolose 3:20) Walitemwa abafyashi bobe kabili ulafwaya ukupoka ulusa pa kuya kumo pa kuti wilabakalifya. (Amapinda 10:1) Kabili kuti wabalondolwela uko uleya ne fyalacitika.

Ifingafumamo: Abafyashi bobe bakamona ukuti walibatemwa kabili walibacindika. Nga bamona ukuti ifyo ulefwaya ukucita fili fye bwino, bakalakusuminisha.

Ica Abafyashi Bakaanina

Nga balya abamona amasanso yengesa pa balesamba, abafyashi bobe balamona bwangu amasanso wingakwata

Cimo ico bakaanina kuti twacilandila muli iyi inshila: Bushe kuti watemwa ukuyasamba insamfi ukwaba abamona amasanso yalecitikila abalesamba nelyo ukushaba? Kuti wasala ukwaba abamona amasanso pantu ilyo uli mu menshi, teti umone sana amasanso. Lelo abamona amasanso, bekala apasansuka pa kuti balemona bwangu ubusanso. E fyo na bafyashi bobe baba. Ifyo baishiba ne fyo bamona fingi. Kanshi kuti bamona bwangu amafya ukucila iwe. Ukupala balya abamona amasanso, ico abafyashi bobe bafwaya te kukulesha ukwangala, lelo kukwafwa ukutaluka amafya pa kutila uleba ne nsansa mu bumi.

Cimbi icilenga ni ici: Abafyashi bobe balafwaisha ukukucingilila. Ukukutemwa e kulenga ukuti bakusuminishe nelyo bakukaanye. Nga wablomba ulusa, balamona nga kuti cawama bakusuminisha ukucita ico ulefwaya e lyo pa numa balaumfwa ububi pa fyafumapo. Nga bashininkisha ukuti tapali ifyabipa ifingakucitikila balatala basuminishanya e lyo bakusuminisha.

Ifingalenga Balekusuminisha

Ifyo ulingile ukucita

Ba ne cishinaka: Yipushe ati: ‘Cinshi ndefwaila ukuyako? Bushe ni co ifilecitika kulya nalifitemwa, nelyo bushe ndefwaya fye ukucitako ificita abanandi? Bushe ni co kuli umulumendo nelyo umukashana uo natemwa?’ Wifisa abafyashi bobe, bebe ico ulefwaila ukuyako. Nabo balipo abaice, kabili balikwishiba bwino, kanshi kuti bailuka bwino bwino ico ulefwaila ukuyako. Bakomfwa bwino nga wabeba icishinka, kabili ifyo bakakweba fikakwa sana. (Amapinda 7:1, 2) Lelo nga ulebabepa, tabakakucetekele kabili te lingi bakulakusuminisha.

Inshita ya kubeba: Abafyashi bobe nga babwela fye ku ncito nelyo nga balecita ifintu fimo ifyacindama, te nshita ya kulomba ulusa. Kuti cawama wabeba ilyo baletuusha. Lelo wilolela mpaka kwashala fye inshita iinono e lyo walabapamfya ukuti bakwasuke bwangu. Abafyashi bobe tabakatemwe ukukwasuka mu lubilo. Bepushe ilyo kucili inshita, pa kuti bakwata inshita ya kutontonkanyapo.

Ifya kulondolola: Ulelondolola bwino pa kulomba ulusa. Abafyashi teti bakusuminishe nga wa-asuka ati “nshishibe,” maka maka nga bakwipusha ati: “Ni bani balebako?” “Bushe kwalaba umukalamba uwa kumona ifilecitika?” nelyo “Ni nshita nshi walabwela pa ng’anda?”

Imibele yobe: Wilamona abafyashi kwati balwani. Ulebamona ukuti bafwaya ukukwafwa—pantu, na kuba bacita fyonse pa kuti bakwafwe. Nga ulebamona ifyo abafyashi bobe, ukalalanda nabo bwino kabili nabo bakalakusuminisha ukucita ifyo ulefwaya.

Leka abafyashi bobe beshibe ukuti naukula ica kutila kuti wakonka ifyo bakweba. Nga wacita ifyo, bakakucindika. Ilyo ukalomba ulusa na kabili, bakakusuminisha.